Pathien Lekhabu Inthieng Chongtung Thar Sinthongei 13

Barnabas le Saul an thangna le an tîrna

1 Hanchu, Antioch koiindangngei lâia Dêipungei le minchupungei an oma; Ma ngei hah Barnabas ngei, Simeon (miduk an ti) ngei, Cyrene khuoa Lucius ngei, Manaen (Râiôt Herod'n* a vâi minlien) ngei le Saul ngei an ni. 2 Pumapa sin an thoa, bu an ngêi lâiin Ratha Inthiengin an kôm, “Barnabas le Saul hih ko koina lama sintho rangin mi pêk roi,” a tia.

3 Bungêiin chubai an tho zoiin chu an chunga kutngei an minngama, an tîr ngei zoi.

Cyprus tuihuola

4 Ha anghan, Ratha Inthieng tîrin an sea, Seleucia khuo an tunga, ha mun renga Cyprus tuihuola rukuongin an se zoia. 5 Hanchu, Salamis khuoa an tungin chu Judangei Synagog ngeia Pathien thurchi an misîra. John Mark hah an insanpui rangin an tuong sa.

6 Tuihuol hah Paphos dênin an chai suoa, dôithei, dêipu inti Juda inkhat a riming Bar-Jisua an tonga. 7 Ama hah tuihuol râiôt Sergius Paulus mi vâr tak khom a malpa ania. Ha râiôt han Pathien chong rangâi a nuom sikin Barnabas le Saul a koia. 8 Hannirese, dôipu Elimus (Greek riming) han râiôt hah takminsôn loi rang pûtin anni hah a lei deia. 9 Hanchu Saul, Paul an ti sa ngâi hah Ratha Inthiengin a sipa, dôipu hah a en ngita, a kôm, 10 male “Nangma khori nâipasal! satnangei nâm râlpa, milak ngei nâmin ni minsipa, zoratin Pathien chongtakngei hih chong milak min chang rang no bôk ngâi ani. 11 Atûn Pumapa kut nu chunga achum rang ani, ni mit jîng a ta, sûn khovâr mu khâino tini,” a tia.

Sûm le ijîngin ama hah abok kelen zoia, a kairuoi rang mi zongin ânvâk titira. 12 Râiôt han ahong mu lehan khoimo atung hah, a iem zoia; Pumapa minchuna chungroi hah a kamâm oka.

Pisidia rama Antioch

13 Paul le a champuingei hah Paphos khopuilien renga rukuongin an sea, Pamphylia rama Perga an tunga, mahan John Mark'n anni hah a mâka, Jerusalema a kîr nôk zoia. 14 Anni hah Perga renga an se tita, Pisidia rama Antioch an tunga, male Sabbathnin chu Synagog taka an lûta, an insunga. 15 Moses balam le dêipungei lekhabungei an miziekngei hah an pore suole chu Synagog ulienngeiin an kôm mi an tîra: “Sûngsuokngei, mohôkna chong nin dôn aomin chu mipuingei kôm misîr rangin nangni kin nuom ani,” an tia. 16 Paul ândinga, a kutin a jâpa, thurchi misîr a phut zoia:

“Ki Israel champuingei le Jentialngei murdi Pathien biek ngei, ko chong rangâi roi! 17 Israelngei Pathien mingei ei richibulngei a lei thanga, Egypt khuolmingei anghan an om lâiin nam lienpân a sina, a ranak lienin Egypt renga a kai suo ngeia, 18 male kum sômminli ramchâra an sinthongei hah a en chien theia. 19 Canaan rama nam sari an inmanga, a mingei a ram puma a minchang zoi. 20 Ma ngei nâm hah Kum raza minli sômrangnga alût ani.

“Masuole han roijêkpungei a pêk ngeia, dêipu Samuel dêna han. 21 Male Rêng an ngêna, ma anghan Pathien'n Saul, Kish nâipasal, Benjamin rûia mi hah kum sômminli sûnga an rêng rangin a pêk ngeia. 22 Ama hah an hengpai suole chu Pathien'n David hah an rêng aminchanga, ma chungroi hah Pathien'n hi anghin a misîra; ‘David Jesse nâipasal, ku lungdo mi ka mân zoi, ama han sin ranga ku nuom murdi sin a tih,’ a tia. 23 Mahi Jisua, David richisuonpârngei lâi renga han Israel mingei Sanminringpu'n ai sin ani, Pathien'n a lei khâm anghan. 24 Jisua'n a sin a phut mân han, Israel mingei an sietnangei renga an insîra baptisma an changna rangin John'n thurchi a misîr pe ngei ngâia. 25 Male John'n a sintum a zoi rangto han mipuingei kôm, ‘Keima hih tumo ani mi nin ti? nin ngâkpu hah keima hih ni mu ung. Aniatachu, rangâi ta u! ku nûka juong a tih, kei chu a kekok khek rang luo inhoi mu ung,’ a tia.

26 “Abraham richisuonpârngei, ki richibulngei le Jentailngei murdi Pathien biek ngei, hi Sanminringna chong hih ei kôm a juongtîr ani. 27 Jerusalema mi omngei le an ruoipungei han sanminringpu ani an riet loi sik le dêipungei chong Sabbathni tina an pore ngâi hah aomtie an rietloi sikin Jisua theiloi min changin dêipungei chong an mintung min dik zoi. 28 Thina rang rak dôr a chunga ite abi an man no khomin that rangin Pilat kôm an ngêna. 29 Male a chungroi Pathien lekhabu'n a miziek murdi atung suole chu Khros renga an musuma, thâna an min jâl zoia. 30 Aniatachu, Pathien'n thina renga a kaithoi nôk zoi, 31 Galilee ram renga Jerusalema ama leh munkhata lei se ngei kôm han sûn tamtak ânlâr ngâia; ha mingei hah atûna hin Israel mingei kôm ama rietpuipungei an ni. 32-33 Ei richibulngei kôma Pathien'n chong a lei khâm hah, eini a richisuonpârngei ta rangin Pathien'n atûna hih Jisua kaithoiin atung ani ti Thurchi Sa nangni kin mintung pe. Lapui inikna taka aom anghan.

‘Ka Nâipasal ni ni;

Avien hin na Pa ko hongni zoi.’

34 Monna mun thâna kîr nôk khâi loi rangin Pathien'n ama hah thina renga a kaithoi rang roi hi anghin a misîra;

‘Satvurna inthieng le adik

David kôma kên khâm hah nang pêk ki tih,’ tiin.

35 Masikin, minpâkna la dangin,

‘Ni mi inthieng chu thâna mon rangin phal no ti nih,’ ati sa.

36 David'n ama zora kai chu Pathien lungdo a sina, masuole chu a thia, a richibulngei leh an phûma, a takpum hah thâna amon zoi. 37 Pathien'n thina renga a kaithoipu ha chu mon mak. 38-39 Ki Israel sûngsuokngei, mahih nin riet rangin kin nuom, Jisua sikin ani sietnangei ngâidamna chong nin kôma misîrin aom; male tukhom ama iem kai chu Moses balamin a mojôk theiloi sietnangei murdi renga an jôk zoia. 40 Masikin, indîn roi, dêipungei lei ti hah nin chunga tung duoi nih.

41 ‘Mumâkpungei, en ta u! kamâm aom ti ungla, thi roi!

asikchu aviena sin ko tho hih,

Mîn nangni ril minthâr pe khom rese

ngei iem no tunui!’ ” ti hah a tia.

42 Paul le Barnabas hah Synagog renga an jôkin chu sabbathni nôka ma chong hah hong misîr nôk rangin mipuingei han an siela. 43 Ânbûm ngei an chîn zoiin chu Judangei le an Juda rotholngei tamtakin Paul le Barnabas an jûia, Tîrtonngei han, Pathien moroina nuoi han om tit rangin an mohôka.

44 Sabbathni nôka chu a khopui pumpui ti dôrin Pathien chong rangâi rangin an hong intûpa. 45 Judangei han mipuingei an mûn chu an narsa oka, Paul thurchi misîr hah an makhala, an misîr minpôta. 46 Aniatachu Paul le Barnabas han hâi uolin an misîra, “Pathien chong hi nin kôma misîr masa rang piel ani; hannirese, nin henga, kumtuong ringna manpui rangin ahunin nin be loi sikin, nangni mâkin Jentailngei tieng pan kin tih. 47 Mahi Pumapa chong mi pêk ani;

‘Jentailngei min vârpu'n nang ki minchang,

masikin rammuol murdi an ring theina rangin ti hi,’ ” an tia.

48 Jentailngei han ha chong hah an rietin chu an râiasâna, Pumapa chong an chôiminsânga; kumtuong ringna chang ranga thang ngei kai chu iempungei an hong chang zoi.

49 Pumapa chong hah ramhuol muntina ânzar zoia. 50 Hannirese Khopuiliena Juda ulienngei le Pathien biek mi Jentail nupang mirit omngei an misieta; Paul le Barnabas hah an nuom an min loa, an ramhuol renga an rujûlpai zoia. 51 Tîrtonngei han anni ngei chunga an mulung hoiloi minlangnân an kepha taka pildi an không mathâka, Iconium an pan zoi. 52 Antioch taka iempungei chu râisânna le Ratha Inthiengin an sip zoi.

*13:1 13:1: Herod: Herod Antipas, Galilee rama ânlal lâiin (en roh Luk 3.1).

13:17 13:17: Jôk 1:7; Jôk 12:51

13:18 13:18: Tel 14:34; Bal 1:31

13:19 13:19: Bal 7:1; Jos 14:1

13:20 13:20: Roi 2:16; 1 Sam 3:20

13:21 13:21: 1 Sam 8:5; 1 Sam 10:21

13:22 13:22: 1 Sam 13:14; 1 Sam 16:12; Lap 89:20

13:24 13:24: Mk 1:4; Luk 3:3

13:25 13:25: Joh 1:20; Mat 3:11; Mk 1:7; Luk 3:16; Joh 1:27

13:28 13:28: Mat 27:22,23; Mk 15:13,14; Luk 23:21-23; Joh 19:15

13:29 13:29: Mat 27:57-61; Mk 15:42-47; Luk 23:50-56; Joh 19:38-42

13:31 13:31: Sin 1:3

13:32-33 13:32-33: Lap 2:7

13:34 13:34 Isa 55:3 (LXX)

13:35 13:35 Lap 16:10

13:41 13:41: Hab 1:5 (LXX)

13:47 13:47: Isa 42:6; 49:6

13:51 13:51: Mat 10:14; Mk 6:11; Luk 9:5; 10:11