Pathien Lekhabu Inthieng Chongtung Thar Philipi Mingei 2

Khrista rangâiinchîna le inlalna

1 Khrista taka nin ringna han nangni a min râta, male a lungkhamna han nin ratha a minngama. Ratha* leh inlopkhômna nin dôna, inkhat le inkhat inriengmuna le inkan inlômna nin dôn ani. 2 Hanchu mindona munkhat dônin, lungkhamna munkhata insem suom rangin, mulungrîl le ratha munkhata omin ka râisânna mikhipphar rangin nangni ke ngên ani. 3 Ranghuolna oîna renga aninônchu insongna ôinangei renga ite sin no ungla, inkhat le inkhat chunga rangâiinchîna dônin zoratin nangni nanâk nêkin mi dangngei asa uolin be roi. 4 Male nangni nin nuomlam vai en loiin mi dangngei an nuomlam khom en sa roi. 5 Hi mulungbôk nin dôn rang hih Khrista Jisua'n a dôn hah ani:

6 Ama chu zoratin Pathien nina a dôna,

aniatachu rangrâtin Pathien leh inangbanga ombang† rangin pût rang mindon mak.

7 Hima nêkin, ama lungdôn a dônngei murdi a mâk rieia,

male tîrlâm nina hah a lâk zoi.

Miriem angin a juong oma

male miriem mêl angin ânlang zoi.

8 Ama chu rangâiinchînin chongjômna lampuia a lôna, thina lampuingei dênrakin,

khros chunga a thina hah.

9 Masika han Pathien'n ama chu mun insângtak chunga a domsânga

male riming dang dangngei nêkin riming inchungtak a pêk zoi.

10 Masikin, Jisua riming miritnân

invâna omngei murdi, pilchunga omngei, le rammuol nuoia omngei‡

khûk an inbilna rangin,

11 male mitinin Jisua Khrista hih Pumapa ani tiin ânlangin

Pa, Pathien roiinpuina rangin phuong an tih.

Vârngei anghan rammuola vâr rang

12 Masikin, ruol moroitakngei, nin kôm ko om lâia zoratin ko chong nin don ngâi anghan, atûn nin kôm ko om loi kâr hin vâng chu nin don uol rang anâng ani. Chi le innîk pumin nin sanminringna minzoi rangin sintho tit ungla, 13 a neinunkhîn nin jôm theina rang le nin sin nuomna rangin Pathien'n zoratin nin sûnga sin a tho sikin. 14 Neinuntin chierna le inkhalna boiin tho roi, 15 han kêng hi rammuola mi nunsiengei le murûkmeret tho ngei lâia Pathien nâi diktak, sietnaboi le inthienghieia om anghan nin ni duoi thei, ârsingeiin invân an êlminvâr angin an lâia nin vâr ngêt rang, 16 an kôm ringna chongbe nin pêk ngei anghan. Ha anghan nin thôn chu, Khrista Nikhuo han ke dengtheina le sinthona ngei murdi mâkana chang mak, tiin minlang theiin nangni minpâk theina rang abi dôn thei ki tih. 17 Ani, ki ringna thisen hih nin taksônna inbôlna ngei Pathien kôm nin pêk angin, bunpai rang nikhom ronga ka râiasâna male ka râisânna nin rêngin nangni kên sempui sa ani. 18 Ma angdên han, nangni khom nin râiminsân ngêt ungla, kei khom nin râisânna mên sempui sa roi.

Timothy le Epaphroditus

19 Masikin nin roi ki rieta mohôkin ko om theina rangin Pumapa lungdo anînchu, Timothy hih nin kôm hongtîr lai thei rangin kên sabei ani. 20 Ama vai hih ki mindona mên sempui ngâi le nin chungroi adiktaka donsûi ngâi ani. 21 Adangngei nâm chu an siksika rang vai an mindona Jisua Khrista rangin chu mindon mak ngei. 22 Male ama chu alut tie minsina aom hah nangni rengin nin rieta, ama le keima hih kho angin mo kin ni, nâipasal le a pa angin kin nia, thurchisa rang jâra munkhata sintho ngâi kin ni. 23 Masikin keima rangin neinunngei kho angin mo a hong inhei ki riet lehan nin kôm hongtîr kelen rangin ka sabei ani. 24 Male keima reng khom nin kôm ânranga hong thei rangin Pumapa han iemna ko dôn ani.

25 Ki sinthopui le ki tienga mi doipui ngâi, nin tîrton anga sintho, mi san ngâipu ei lâibungpa Epaphroditus hih nin kôm hongtîr rang anâng tiin mindona ko dôn ani. 26 Ama hih nin rêngin nangni mu rang a jôt sabaka, a damloi nin riet sikin ânngûikhak ani. 27 Ataktakin ama chu damloiin a thi vânga. Aniatachu Pathien'n inrieng a mua, ama chung vai niloiin, keima khom inngûina lien uola ko om loina rangin mi thop sa ani. 28 Masikin ama nin mu tika nin râisân nôkna rang le ka inngûina ânmang theina rangin nin kôm hongtîr rang ka ngâklal sabak ani. 29 Pumapa jârin ama hah lâibungpa anghan râisânin lei modôm roi. Ama anghan mingei murdi kôm miritna minlang ungla, 30 nangni'n sanna mi nin pêk thei loi, mi pêk rangin Khrista chuonsina jâra a thi vâng dôr a ringna phalin alei inpêk sikin.

*2:1 2:1: Ratha leh inlopkhômna nin dôna; aninônchu Ratha han inkhat le inkhat inlopkhômna han nangni a hong tuong.

†2:6 2:6: ombang; aninônchu hongni.

2:10 2:10,11: Isa 45:23 (LXX)

‡2:10 2:10: rammuol nuoia: Ajîngna nuoia rammuola han mithi ngei ha an la ring bang rangin mindon ani.

2:15 2:15: Bal 32:5