Pathien Lekhabu Inthieng Chongtung Thar Chongphuong 4

Invâna Pathien chubaimûkna

1 Masuole chu inlârna dang ku mua, ko hong ena, invân inkhâr in-ong ku mua. Male bekul miring angati rôl ki riet masa han ni chongpui, “Hin hong inla, hima suole neinun hong om ngêt rang ngei nang min mu ki tih,” a tia. 2 Voikhatrengin Ratha'n mi ompuia. Invân khin rêngsukmun le a chunga mi inkhat ânsung ahong oma. 3 A mâi hah jasper le carnelian lungmantam angin ânlanga, male rêngsukmun rihîla han sûminsâng emerald lung rông anghan ânjâm sa. 4 Rêngsukmun rihîla han rêngsukmunngei adang sômnikminli an om sa, ma rêngsukmunngeia han upa sômnikminli ngei puon ngoi an insila, rângkachak rênglukhumngei inkhumin an insunga. 5 Rêngsukmun renga han kôlinleka dapdaptingei, khuonri rahangngei le mechêk puok rahangngei ahong oma. Rêngsukmun motona han châti sari ngei mochokin aoma, mangei hah Pathien ratha sari ngei hah an ni. 6 Rêngsukmun moton nanâk han crystal lung anga vâr lîm-en tuikhanglien angati khom aom sa.

Rêngsukmun rihîlin kângkhat tieng khom, kângkhat tieng khom iring parânngei minli motontieng le nûktieng amit sipmat an oma. 7 Iring inkhatna hah chu ikeibaknei aphuoa; inikna chu serâtchal aphuoa, inthumna chu a mâi hah munisi mâi aphuoa; male minlina chu minmu vuonglâi aphuo ani. 8 Ma iring parân minli ngei hah manthangei uruk an dôn paka, male anni ngei hah amit sipmat an nia, sûngtieng le pêntieng khom. Sûn le jân inngam loiin lâ an thoa:

“Ânthieng, ânthieng, ânthieng, Pumapa Pathien Râtinchung,

A om sai, a omtit, le a la hong om rangpu chu.”

9 Iring parân minli ngei han rêngsukmuna ânsung ngâipu tuonsôt tuonsôta ring tit kôm han roiinpuina, miritna le minpâkna lângei an thoa. Ma anga an tho racham han, 10 upa sômnikminli ngei han rêngsukmuna ânsungpu makunga inbokin tuonsôt tuonsôta ring titpu chubai an mûka. An rênglukhumngei hah rêngsukmun motona an dara:

11 “Kin Pumapa le kin Pathien! nangma chu

roiinpuina, miritna, le sinthotheina man ruopiel ni ni.

Neinunngei murdi nangman na sina,

male nu lungdoa om le ringna pêk an ni.”

4:2 4:2-3: Ezek 1:26-28; 10:1

4:5 4:5: Jôk 19:16; Chph 8:5; 11:19; 16:18Ezek 1:13; Chph 1:4; Zak 4:2

4:6 4:6: Ezek 1:22

4:6 4:6,7: Ezek 1:5-10; 10:14

4:8 4:8: Ezek 1:18; 10:12Isa 6:2-3