Pathien Lekhabu Inthieng Chongtung Thar Romans 15

Eini niloiin midangngei râiminsân rang

1 Eini taksônna taka râtngei hin eini râisânna rang rok loiin, râtloi ngei râtloina han ei san ngei rang ani. 2 Manêkin taksônna ei phun mindet theina rangin iempu dangei râiminsânin anni ranga neinun sa hah ei tho rang ani. 3 Asikchu Khrista khom ama râisânna rok maka. Pathien lekhabu'n, “Nang êro ngei êrona hah ku chunga achul zoi,” ati anghan ani. 4 Pathien lekhabu'n apêk ngâi sabeina renga tuongdierna le mohôkna ei nei theina rangin Pathien lekhabua lei inziek ngei murdi hah ei inchu rang ani. 5 Khrista Jisua nin jûi anghan nin lâia inngêina ratha han tuongdierna le mohôkna hah Pathien'n nangni min dôn senla. 6 Hanchu, nin rêngin rôl-ûm khatin ei Pumapa Jisua Khrista Pa le Pathien hah nin minpâk thei rang ani.

Jentailngei ranga Thurchisa

7 Pathien roiinpuina rangin Khrista'n nangni a pom angin inpom inlôm chit roi. 8 Nangni ki ril, Pathien taksônomna minlangnân an richibulngei kôma a chonginkhâm tuontungin Khrista hah Judangei ruthûlin sinthopu'n a juong oma, 9 Jentailngei khomin a moroina sika Pathien an minpâk theina rangin. Pathien lekhabu'n:

“Masikin Jentailngei lâia nang minpâk ka ta,

Ni riming minpâkin uoi ki tih,” ati anghan.

10 Ati nôka,

“Jentailngei Pathien mingei leh râiminsân roi,” ati sa.

11 Male,

“Nangni Jentailngei murdi, Pumapa minpâk roi;

Mingei murdi khomin minpâk rese ngei!” ati nôka.

12 Male avêlin, Isaiah khomin,

“Jesse jâisuon la hong inlang a ta;

Jentailngei chunga inlal rangin la hong om a ta,

Ama chunga han an sabeina minngam an tih,” a tia.

13 Ratha Inthieng sinthotheina jâra sabeina nin sip theina rangin sabeina nâr Pathien han ama nin taksônna sikin, râisânna le inngêinangei nangni minsôn pe bang rese.

Paul'n hâitaka lekha a miziekna abi

14 Ku sûngsuokngei, nangni hih satna akip, rietna murdi dônna, inril inlôm thei rang nin ni tiin tak ko sônchêt ani. 15 Nikhomsenla, neinun senkhat nangni min riet nôk rangin hâitakin ma lekha hih ki miziek ania, Pathien'n mi pêk moroina sikin 16 Jentailngei sinthopu rangin Khrista Jisua tîrlâm ki ni. Jentailngei hah Ratha Inthiengin minthienga Pathien inbôlna ringa khôktheiruo min ni ranga Thurchi Sa misîrna hin ochai angin ki sin ani. 17 Masikin Khrista Jisua leh inzomin hima Pathien sinthona hin insongna ke dôn thei ani. 18 Jentailngei ruoia Pathien chong min jômna rangin Khrista'n sintho le chongrilin keima mi manga, a sinthongei pêna chu ite dang ril ngam no ninga, 19 sininkhêlngei le sin kamâmruoingei, Pathien Ratha sinthotheina han mi manga, masika han Jerusalem le akôl revêla ram renga Illyricum dênin Khrista Thurchi Sa chu ku phuong let zoia. 20 Midang lungphûm chunga sinminding ki ni loina rangin Khrista la riet loina muntina Thurchi Sa phuong hi ku lungdo ani. 21 Pathien lekhabu'n:

“A thurchi la rilna ngâi loina mingei han mûng an ta,

A koura la riet ngâi loingei han riet an tih,” tia ânziek anghan.

Paul'n Rom khopuilien vapan rang a bôk

22 Masika hah kêng ani, nin kôma hong rang ki minchâi titna ngâi. 23 Aniatachu, atûn hin hi ram revêla hin chu ki sintho ko zoia, kum tamtak nangni hong mu rang ke lei nuom ngâi anghan. 24 Spain rama se malamin nangni hong mu rang ko bôk ani. Chomola nangni le inlopkhôm zoiin, nangni sanna renga ka panna rang mun tieng se thei rangin ka sabei ani. 25 Atûn tak hin chu Pathien mingei sintho rangin Jerusalema la sêng ki tih. 26 Macedonia le Achaia rama koiindang mingei han phaltakin Jerusalema Pathien mingei kâra inriengngei rangin chôiruol an tho sikin. 27 Inphaltaka an tho ani, aniatachu an kôma an intâng sa piel khom ani. Asikchu, Jentailngei ratha satvurnangei Judangei an insempuiin chu rammuol neinun satvurna tieng khomin Jentailngei Judangei san rang anâng ani. 28 Ma hah ko tho zoiin, an sum ngei an kôm ka bâng let zoiin Spain rama se rangin nangni la hong lût ki tih. 29 Nin kôm ko hong tika chu Khrista satvurna akipin hong ki tih ti ki riet.

30 Sûngsuokngei, ei Pumapa Jisua Khrista le Ratha pêk lungkhamnân Pathien makunga chubai mi nin thopui tatak ngâi rangin nangni ki ngên. 31 Judea rama iemloingei kut renga ko jôk theina rang le Jerusalema ki sintho hih Pathien mingei khôktheiruo ani theina rangin chubai mi thope roi. 32 Pathien'n asa a tiin chu râisânna sipmata nin kôm ko honga ei har inruol theina rangin. 33 Atûn inngêina Pathien hah nin rênga nin chunga om rese, Amen.

15:3 15:3: Lap 69:9

15:9 15:9: 2 Sam 22:50; Lap 18:49

15:10 15:10: Bal 32:43

15:11 15:11: Lap 117:1

15:12 15:12: Isa 11:10

15:21 15:21: Isa 52:15

15:22 15:22: Rom 1:13

15:25 15:25,26: 1 Kor 16:1-4

15:27 15:27: 1 Kor 9:11