Waina meta wine hededehemasalahana ku hasili.

Waina pakuna Isalaela unai, Yesu yona huyamiya wa unai waina pakuna suisui hesau dahina unai se ginauli. Waina hauhauna bena paku hauhauna unai se hemwayau, matawuwuna waina hauhauna meta ye waiwaini unai paku hauhauna sola ma bigabigana kabo gonowana ye sese. Na paku beyabeyadi meta se kwailolo na nige gonowana se sese. (Mataiyo 9:17, Maleko 2:22, Luka 5:37-38)

Wasa namwanamwana nuwanuwatuna Buka Tabuna unai meta Yaubada idohagi na ye gadosisiyeida na yababa yo boita udiyedi ye gilihaida Keliso Yesu debanawai. Wasa namwanamwana hedehededena hesau meta ewaneliya, iya ede kalina Giliki unai se hai.

Wine meta kaiwa hesau Isalaela unai se kumakumai na koyana se ginaginaulidi. Koya ginaulina Yesu ye hasili Maleko 12:1 unai.

Tamowai wine kaniyodi se gigidi na se tamdi, meta kaedi se hepaisowa se utuꞌutui kabatamtam tehanawai. Masina wa se ini waina pakudi udiyedi na se tole ye lau ee ye bui na ye bayao. Numanuma ne hesana ede waina. Waina wa ye hemala mayadai badobado numanumana siya Dius kalidiwai.

Buka Tabuna unai wine koyana meta Isalaela bodadi heyaheyasonidi (Mataiyo 21:33-41).

Winega meta kai hekadi yo waila kabahepanedi, na waina o kaiwa kaniyodiyao hekadi udiyedi se ginauli. Winega kamnana meta ye malulu. Loma yodi tauꞌiyala winega gagilina se ini kadi waila unai na ye hemala kadi numanuma, na tenem iya ede se mosei Yesu unai sataulo kewanaena (Mataiyo 27:48, Maleko 15:3, Luka 23:36, Yowane 19:29).

Wipi meta Loma yo tamowai hekadiyo yodi kaipidipidili. Wipi udiyedi yababa tauginaulidi tamowaidiyao se pidilidi. Wipina ne se ginaulidi meta suisui dahina unai maina kubwakubwadi se bolidi na maina gwaudi se paigogoidi na siliya yo pawati matamatadiyao se hepatudi maina wa udiyedi. Na wipina ne unai tamowai dagelana se pidili meta dahina ye kopahai na ye kamkamnakalili (Mataiyo 20:19, Apostolo 5:40).

Wipi kao hesau se hepaisowa kati tautabetabe suisuidiyao se lauhelilidi na se heyaisidi, na wipidi se ginaulidi meta suisui dahidi udiyedi maina lohalohadi se bolidi na se heidi ye hemala maina bayabayaona lohalohana.

Huyana Numa Tabuna bakubakuna unai Yesu taulokulokune ye henakuhepesadi meta mainagaibu ye kabigogoidi na suisui ye henakuhepesadi (Yowane 2:15).

Witi meta Isalaela kadi kai saesaena. Witi kana kao doha lagau lohalohana, na tumana lakidi doha laisi. Witi koyana se ginauli meta nige witi likedi se kumakumaidi, na tumadi se hesuhesuludi koya unai. Na huyana witi se suna na se pogi kabo se bolidi na se toledi kabakabiyawasi tanona unai na yodi bulumakau se woyaidima. Siya kabo unai se takitakikili na molumolu se niuniuli. Molumoluna gunina ne unai weku tupitupidi se hepatudi. Teina unai witi kaniyodi tumadi dahidi se bekuhai. Kabo kabahesuluisini kaikaiwana se hai na witi ma mosomosona se hesuluisinidi na yaumai kabo mosomoso ye yuhihesuwala, na witi tumadi se bekudobi. Kabo se haidi se toledi kabaꞌusaidi udiyedi. Witi tumadi se kutudi weku tabatabadi udiyedi na ye hemala pwalawa (Mataiyo 24:41), na unai kabo beledi tabatabadi se gabudi.