9
Amós, Babse-goled-neg-bibichilesad-negburgan daksad
1 Dule-Dummad ibmar-ogumakar-ukleged-aila-dikarba-gwichi an daksad, degi, anga sogded:
“Buarmar-e-bargamalad be omukue,
adi, buarmar giglimakega, dulemar-e-nonogi babatidoed.
Dulemar-burgosurmaladdi es-suidgi an osulogoed.
Dulemar-wargwensaar wakinnosulid,
wargwensaagwar durguosulid.
2 Israel-dulemar neg-uan-napa-uluba dukuye-sogele, amba an onogoed.
Ar amba nibanegse nakweye-sogele, amba an amar-odegoed.
3 Amba Carmelo-yar-birba dukuye-sogele,
ase an aminaoed, degi, an gaoed.
Demar-mata-wilasorse angi dukuye-sogele,
amba naibe-demargined egi-warmakega an barmidoed.
4 Israel-dulemar, e-isdarmaladse-galesa selenadapidgine, an igar-ukoed,
es-suidgi amar-oburgwegar.
Israel-dulemargi nue an nakulegoed.
An egi-nakulegoedi, ibmar-nued ega imakegarsulid.
Ibmar-isganaga imakegalad.”
5 Bab-Jehová-Bur-Gandik-Maid, Bela-Gangued-Nikad-Maid napa ebugele, napa maludoed.
Napa mullumakmai megoed,
Egipto-diwar-Nilo-maiyob megoed,
degi, bela dule-bukwamalad ise-boar gumaloed.
6 Bab-Dummad nibaneggi na e-neg nasiksad,
degi, napaneggi e-neg-sailagan nasiksabalid.
Dii napaneggi-owiegala, demar-mata-obupurmakega imaked.
E-nuga, Bab-Jehováʼye nugad.
7 Israel-wagan, Bab-Jehová soged:
“¿Ar bemarde anga Etiopía-dulemaryob-gusursi?
¿Ar ande Egiptoʼgi Israel-dulemar-onissursi?
¿Caftor-yargi Filistea-dulemar an onisbarsursi?
Degi, ¿Kir-yargi Arameo-dulemar an onisbarsursi?
8 ”Ani an Bab-Jehová-Bur-Gandik-Maidi,
we-yar-isgus-naidgi nakulemaid.
Jacob-wagan napneg-naidgi an obelogoed,
degi-inigwele, an bela obelogosulid.”
Bab-Dummad-Jehová soged.
9 “Igi ukub bugbugi egwalealile, napagi akwa-gwagwensaar argwansuli,
deyobi, Israel-dulemar neggwebur-baigan-abargi, an egwaoed.”
10 Bab-Jehová sogdebalid:
“Bela an-dulamar-isgudimalad, es-suidgi burgwemaloed.
Bela sogdimaladi: Bonigan anmarse gwen nonikosurye.
Anmar-oakalogosurye.
Dule-deyob-sogdimaladi, bela burgwemaloed.”
5. ISRAEL-DULEMAR-GANNAR-AMBIKUOED-IBAGAN
(9:11-15)
11 Bab-Jehová sogdebalid:
“A-ibagi, David-meged-neg-ayarisadi, an soboed.
Neg-yaa-ollogan-ambikusadi, an edioed,
degi, e-neg-bibichismalad iduar-sobaledyob,
gannar an sobbaloed.
12 Adi, Israel-dulemar, degi, bela dulemar an-nug-odummodimaladi,
Edom-neggwebur, degi, bela neggwebur-bamalad suegar.”
13 Bab-Jehová sogdebalid:
“Ibmar-san-bukidar-welegoed-ibagan danikid,
ibmar-gwag-digleged-ibagan-naidgi, amba oros-gwaggiid-dakleged, welenai guoed.
Uva-digleged-ibagan-naidgi, amba uva-egurlenai guoed.
Yar-dummaganba vino-binid aryomamai guoed,
bela yala-senigana-imbaganba suurmakmai guoed.
14 An-Israel-dulemar-galesmalad an gannar e-yarse sedagoed.
Neggweburmar-bergusad gannar na sobmarbaloed,
agi na ambikumaloed.
Uva-dubmar digmaloed, degi, e-vino gobdii gumaloed.
Ibmar-digedgi arbamaloed,
a-ibmar-sanmakoedi, gundii gumaloed.”
15 Be-Bab-Dummad-Jehová soged:
“Israel-dulemar e-yargi an urboed,
adi, mer yar-an-ega-uksadgi, bar onilegegar.”