10
1 Oseas sogdebalid:
“Israel-dulemar uva-saila-yeer-sanmakedyob guenad,
ichesuli sanmakdaenad.
Ar bur bukidar-sanmakdedaed-inigwele,
aka bur bab-dummadyob-imaklemaladga bukidar ailamar sobdedamalad.
Ar e-yar nue-nasguddaed-inigwele,
aka bur bule e-bab-dummaganga ailamar yeerdakle imakdedamalad.
2 Ar we-dulemar darbo-binsadamalad,
agala, Bab-Dummad, e-isgumalad-ular sabsur odurdakoed.
Bab-Jehová e-bab-dummagan-ailamar bela obelogoed,
e-akwa-sobar-gwismalad bela ei obelobaloed.
3 ”Ar sunna weyob sogmalad:
‘Ar anmar Bab-Dummad-dobsuli-gudii gusye,
a-ulale, anmar reysuli gudimarye.
Ar anmar rey-nikana,
¿ibugi wis anmar-bendakoena?’
4 Ar unnila binsa sunmakdamalad,
gakansaar ise-sogar ibmar-sogdamalad,
binsa dulemarbo igar-omesdamalad.
Agala, abin-abin-imakmalad,
gagan-isgana-ainiardaedyobi noardaed.
5 Samaria-dulemar, Bet-Avén-yargi moli-bebe-nikad-sapingwagwad-orbiid-e-nug-odummodiidga bukib-binsanonimaloed.
E-dulemar, a-ulale, na wiles itononimaloed,
e-dule-irwa-ese-gormaladmoga bukib ega binsadmarmogoed,
ar ade, e-ibe dikasuli yar-baidse sedmaloed.
6 Moli-bebe-nikad-sapingwagwad-orbiidi, Asiria-yarse rey-maniga-guega seledoed.
Efraín-dulemar bingegumaloed.
Israel-dulemardina, na e-bab-dummadga-ibmar-imakdimaladgi dummad-bingegunai guoed.
7 Samaria-dulemala, e-reybogwa obelolemaloed.
Diwar-noedba suarmar-selemaidaedyobi selemai gumaloed.
8 Bab-dummadyob-imaklemalad-e-negmar, yarmar-birigi-bukwamaladi bela bibislegoed.
Israel-dulemar egi isgudidamaladid.
E-aila-matusurmaladgi gagan-ikobimalad egi ammurnai gudoed.
Degisoggu, yarmarga sogdemaloed:
‘¡Be anmargi batedage!’
Yar-mulluganga sogdemaloed:
‘¡Be anmar-omursunna!’ ”
9 Bab-Jehová Israel-dulemarga sogded:
“¡Bemar, Israel-dulemar! Gabaaʼgi-neggusad-akale, be isgudanigumalad.
De-akale, bemar gwen isgued iesurmalad.
A-ulale, bemar be-isguedba Gabaa-yargi bila-onolegoedgi be obelolemaloed.
10 An-itolegedba an bemar sabsur-odurdakoed.
Bemargi-yolemalagala, neggwebur-baigan-atomalaga an imakoed.
Agi bemar sogbo-ibmar-isgana-imaksadba,
an sabsur-bemar-odurdakoed.
11 Efraín-dulemar moli-bebe-nikad-bipigwad-nuekwa-odurdaklegaledyobinad,
ibmar-gwag-weed yeer-itodaenad.
An ega yapa e-dukargi suar nasikgusanad.
Emisgindi an, Efraín-dulemar-e-dukargi suar nasiksunnoed.
Judá-dulemar napa-imuedga gudsunnoed,
Jacob-wagan napa-imulesad-durwinai gudsunnoed.”
12 Oseas Israel-dulemarga sogded:
“¡Bab-Jehová-amiega be guakwamalo!
Ar bemar nainu-binidyob gumalad.
Gwagegi igar-napiragwad be nasikmar,
adi, egi sabgued-igar be amimaloed.
Geb agine, Bab-Jehová, bemar-bendakegala,
bemarbina danikoed.
Ar igi dii-wiedi, napa-dinnaregedgi batenonidae,
deyobi, Bab-Jehová bemar-bendaknonikoed.
13 Ar bemar, ibmar-isgana imaksamalad,
agala, bemar boni-dummaganba galitonanaid,
gakan-imaksadbali be ibitonanaid.
Ar ade, bemar, be-moli-ur-bila-onomaladmargi bensulid nikusmalad,
ar sorda-bila-onomaladgi be bensulid nikusmarbalid.
14 Emide, be-neggweburgine bila onoledoed,
bela be-neg-gandikmalad bibichidoed.
Igi Rey-Salmán bila-ononaidgi Bet-Arbel-neggwebur-obelosgusayob negguoed.
Deunni, nangan na e-mimmiganbo sabsur-odurdaklegar burgwis nanaed.
Deyob neg guoed.
15 Weyobi Betel-dulemar bemar-imakoed,
ar bemar doggus-isgued wilub-obichaa nikad.
Neg-oibononikile, Israel-e-rey yog-berguar guoed.”