10
Bab-Dummad-napiragwad, degi, bab-dummagan-binsarmalad
(Jeremías 51:15-19)
1 Israel-dulemar, Bab-Jehová-sunmaked be itomar, 2 weyob soged:
“Dulemar-yar-baid-baidsik-bukmalad-e-daedba melle be damalo.
Nibneg-akar ibmar-yogasaar-oyolegar-be-dakele, melle be gwayemalo.
Dule-bamalad-dobee-itodamaladyob, melle be dobgumalo.
3 Ar dulemar-e-bab-dummaganse-goled-igar-maidi binsaled gued.
We-dulemala, sapurba-nadele, suar-immidamalad,
geb dule-ibmar-sobed, esbipigi suar-sobdaed.
4 Geb egi mani matak-matak nasikdamalad,
ormar matak-matak nasikdamarbalid.
Melle-aimukuegala, esgorogi biokdamalad.
5 ”We-bab-dummagan, ibmar-digar-naidgi, ibmar-sikwimar-ogwayed-gwichidaeyob gued, geg sunmaked.
We-ibmarmar dule yamo sear imakergebed, geg walagwen nanamalad.
Melle be we-ibmarmar dobgumalo,
ar gwen be-oakalogosulid,
bemarga gwen ibmar-nued imakosurbalid.”
6 Ani Jeremías sogded:
“Bab-Jehováʼye, dule beyobid sulid,
bedi dule-dummadid, be-nuga gandiki gued.
7 Dule-yar-baid-baidgi-bukwamalad-e-Rey-be-gued, ¿doa be-dobguosuli?
¡Bela be-dobgumalargebed!
Ar be dulemar-binsaed-ibegan-abargi, reymar-negsemamaid-abargi, dule-beyobid sulid.
8 Bela dulemala, gegeganad, binsaedsurmaladid,
suar-sobarmalad-ibmarga-gusurmaladse ibmar-durdaksamaladid.
9 Tarsis-yala-akale, mani-matargana sedanidamalad,
Ufazʼye-neg-nugad-akale, olo sedanidamarbalid.
We-ibmarmargine, bab-dummadyob-imaklemalad sobdamalad.
Geb ega mor-arad, mor-ginnid makdamalad.
Dulemar-orgi-arbamaladi, manigi-arbamaladi, degi, ibmar-sobedgi-arbamaladi, bela we-ibmarmar imakmalad.
10 Degi-inigwele, Bab-Jehováʼdi, Bab-Dummad-napiragwadid,
Bab-Dummad-dulasaila-maidid,
e-Reyga-maigu degisadeguadid.
Bab-Dummad uludele, napaneg ogiglimaked,
dulemala, e-urwed-abin gege gwisgumalad.”
11 Bab-Jehová sogdebalid: “Jeremías, weyob be Israel-dulemarga sogo: ‘Bab-dummagan-gwen-nibneg-imaksasulidi, degi, gwen napneg-nasiksasulidi, nibneg-urbali bela we-napneggi berguoed.’ ”
Bab-Jehováʼga namakleged
12 Bab-Dummad, e-ganguedba napneg nasiksad,
e-binsaed-nikadbali, napneg ilemaksad,
e-ibmar-wisidbali, nibneg nasiksad.
13 Bab-Dummad sunmakdele, nibneggi diimar uurmakardaed,
magatibali, mogirmar ainakwiardaed,
mala-ibyed-abalagi, dii owidaed,
burwa-galumargi, burwa onidaed.
14 Bela dulemar binsaedsulidamaladid,
aku-neg-itomaladid.
Bela-dule-orgi-arbamaladi, e-ibmar-sobedgi bingedar itomalad,
e-ibmar-sobarmaladi, dule-yardakmaladid, burba satemalad.
15 We-ibmarmala binsaledid, binsa dodolegedid.
E-sabsur-odurdakleged-iba-nonikile, bela berguoed.
16 Jacob-e-Bab-Dummaddi deyobsulid,
ar e, bela ibmar-imaksadid.
E-nuga, Bab-Jehová-Bela-Gangued-Nikadye nugad,
Israel-dulemardi, egadiga gued.
Judá-dulemar bergunonikoed
17 Bab-Dummad weyob soged:
“Be-ebiris bukwamalad,
be-ibmarmar-napagi-omileded be sue-sue imakmar.
18 Ar ani Bab-Jehová weyob soged:
Emisgindi, an we-neggweburginmalad we-yargi dikasuli an barmidoed.
Suli-suli-itogega an imakoed,
dule-bamaladse-galegega an imakoed.”
19 Ani Jeremías sogded:
“¡An duledar-wiles! ¡An nue-ibitos!
An boni-nikadi geg-nudaklegedid.
Ar an-bonisoggu, an na gala-itosunnodo.
20 An-dordoneg ayaris siid,
bela dordoneg-e-dubmala itiris bukwad.
An-mimmigan-an-obachamaladi, bela amar girgusmalad.
Anga-neg-sobed dule sated,
anga-mor-dummagan-onakwed dule sated.
21 Dule-negdakmamaidi, binsaedsulidga gusmalad,
gwen Bab-Dummad-amiedgi binsassurmalad.
A-ulale, igar-nued ega gussulid,
e-dulemala, yogasaar-aisakis gudimalad.
22 ”¡Be itomar! ¡Gayaburba-gwensak noni!
Dad-nakwed-argan-sapiledsik, sorda-bila-onomalad danikid.
Judá-neggwebur achu-sapur-uaya-gannagana-e-negga guoed,
bela Judá-neggwebur akwabi ganna-ganna sigoed.”
Jeremías-Bab-Dummadse-gochad
23 Ani Jeremías weyob Bab-Dummadse goted:
“Bab-Jehováʼye, an wisid, dule-e-san-burba dulegadsulid.
Deginbali, e-guoedi na wissurbalid.
24 Bab-Jehová, igar-maidba be an-odurdake,
melle urwedgi be an-odurdako.
Ar urwedgi be an-odurdakele, be an-wiogoed.
25 Bur be dulemar-aku-be-dakmaladgi be-urwed be oyoge.
Dule-be-nug-odummosurmaladgi be-urwed be barmidage.
Ar Jacob-wagan-wiosmalad, bela naitinagase obelosmalad,
degine, bela e-negmar obelosmarbalid.”