48
Moab-dulemargi-iduakwaa-sunmaklesad
1 Bab-Jehová-Bela-Gangued-Nikadi weyob Moab-dulemarnik soged:
“¡Nebo-neggwebur, be duledar-wiles!
Ar bela be berguoed.
¡Quiriataim-neggwebur galegoed, obingegsalegoed!
E-neggwebur-galu-matusulid-akwabiid, bela omukulegoed,
bela obelolegoed.
2 Moab-neggwebur-yeerdakleged, bela yogguded.
Hesbón-neggweburgi egi weyob igar aminanaid: ‘¡Dagmar, anmar we-neggwebur obelonamala!’
Madmena-neggwebur, be amba gumogoed,
be obelolemogoed,
ar es-suid begi gwisgusuli guosulid.
3 ”Horonaim-neggwebur-akale, binnasuli dule-gole itoleged, weyob soged:
¡Neg bela! ¡Neg bibichide!
4 Moab-neggwebur bibichisad,
bato e-burwigan-binnasuli-boed itoleged.
5 Luhitʼye-neg-nugad-nakwemaidbali, dulemar ogormakar-ogormakar nakwemamaid.
Moab-neggwebur-obelolenaid-ulale,
Horonaim-neggwebur-aidemaidbali,
dulemar nunmakedba-binnasuli-goled itoleged.
6 ¡Be wakinmala! ¡San-onogega be abarmakdemala!
¡Moli-uayasuid-sapurbalidyob be abarmakdemala!
7 Moab, be-ibmar-imakedgi be bensursoggu,
degi, be-ibmar-nuegan-nikadgi be bensursoggu, be galemogoed.
Be-bab-dummad-Quemos, e-dule-irwa-gormaladbo, degi, ega-arbamaladbo, gales seledmogoed.
8 Bela neggweburmargine, dule-obeloged gwichigunonikoed.
Neggwebur-gwagwensaale, gwen san onogosulid.
Bab-Jehová-sogsadyob guoed:
Neba-naidi bela swanga naguoed,
neg-duturgan-naid bela berguoed.
9 Moab-neggweburga be guakwaa napa mese,
ar bato bergus siid.
Bato e-neggweburmar bela ollo-ollo naid,
ar dulemar neggweburmargi bar gudisulid.
10 ”Dule an-sogedba ibmar-imaksulile, a-dule iwigusun.
Dule an-sogedba dulemar-oburgwebisulile, a-dule iwigusun.
11 ”Moab-dulemar ambikuded-akale, bonisuli bukwad.
E-dulemala wargwensaale, neggwebur-baidse gales seledisulid.
Vino-nuedyob Moab-dulemar gued.
Igi vino gusgu siigudae, deyob, Moab-dulemar gumogad.
A-ulale, bela ega nueganbi ibmar nadegusad,
e-damalad gwen gwagmaisulid.”
12 Bab-Jehová soged:
“Ibagan dani. Moab-dulemar-isdarmalad, Moab-dulemargi an barmidagoed,
adi, Moab-dulemar yar-baidse sedmalagar.
Moab-yala ollomaklegoed,
e-neggwebur bela bibisgoed.
13 Geb agine, Moab-dulemar e-bab-dummad-Quemosʼye-nugadgi bingedar itomaloed.
Igi Israel-dulemar bab-Betelʼye-nugadgi bingegusmala, deyob Moab-dulemar gumaloed.
Deun, Israel-dulemar bab-dummad-Betelʼgi bengussurmalad,
e-bendakoye bismalanad.
14 ”Mer be sogmalo: ‘Anmar dule-bila-onomalad-buleganye,
anmar bila-onoged-gandikmaladye.’
15 Ani an Rey-guedi, Bab-Jehová-Bela-Gangued-Nikadye an nugad.
Weyob an soged:
Moab-dulemar bela oitolegoed,
e-neggweburmar bela sulegoed.
E-sapingana, oburgwileged-negse seledoed.
16 Moab-neggwebur-bergued omosad.
E-bonigan bato egi walikgusad.
17 Bemar, Moab-yar-dikarba-bukmaladi, Moab-dulemarga be bomar.
Moab-dulemar-nug-dummarba-nikad-wismalad, Moab-dulemarga be bomar.
Weyob be sogmar: ‘Be dake, ibibayobi Moab-neggwebur bergusa.
Ar Moab-neggwebur yeer-ganguedinad, degite bergusad.’
18 ”Bemar, Dibón-neggweburgi-bukmaladi, be-mamaidgi be ainidamar,
napa-dinnaregedgi be bukudamar.
Ar Moab-e-isdarmaladi, bemargi yolenaid,
be-neg-gandikmalad bemar-ibe bibisgenaid.
19 Bemar, Aroer-neggweburgi-bukmaladi,
igarba be gwisgudamar, be dakdamar.
Machergan-wakinmamaidse, omegan-wakinmamaidse, be weyob egisdamar:
‘¿Wede igi neg gunai?’
20 Moab-dulemar oitolesmalad,
dule-baiganse galakusmalad.
¡Ega be bomala!
¡Ega be nunmak itomala!
Arnón-diwarba be sogmalo,
Moab-dulemar nue-oitolesye.
21 ”Nebagi neggweburmar-bukmaladi, ega odurdakleged-iba omosad.
We-neggweburmar odurdaklegoed:
Holón-neggwebur, Jahaza-neggwebur,
degi, Mefaat-neggwebur,
22 Dibón-neggwebur, Nebo-neggwebur,
Bet-Diblataim-neggwebur,
23 Quiriataim-neggwebur, Bet-Gamul-neggwebur,
degine, Bet-Meón-neggwebur,
24 Queriot-neggwebur, Bosra-neggwebur,
degi, bela Moab-neggweburmarga odurdakleged-iba omosad.
”Neggwebur itikiganaga, degine, dikasurmaladga odurdakleged-iba omosad.”
25 Bab-Jehová soged:
“Moab-neggwebur-gangued bergusad,
e-garganguedi surgunonikid.
26 ”Be Moab-dulemar-omumsamar
ar Bab-Jehováʼba uayasuli nanasmalad.
Moab-dulemar e-agedgi bindumakega be samar.
Moab-dulemargi dodolegega gusun.
27 Moab, ¿ar bede Israel-dulemargi dodoardasursi?
¿Egi mesagwar be sunmakardasursi?
Dule-atursamaladbo-daklesayob,
¿egi be sunmakardasursi?
28 ”Moab-dulemar, neggweburmargi be ainimar,
akwa-dummagan-imbaba be megnamar.
Nuu-gudiiyobi, be garmakdii imaknamar,
akwa-yaba e-uu-sii-damaladyob be gudii imaknamarsun.
29 Moab-dulemar-san-dummarba-imakedi anmar wisid,
doggus na san-dummarbaa imakmalad.
San-bule-bule samalad, san-dummarbaa imakmalad,
san-gandiki samalad, dule-buled san-imakmalad.”
30 Bab-Jehová soged:
“Moab-dulemar-san-dummarba-imaked an wisid,
ar e-bule-buledaedi gwen e-bendakosulid.
31 ”A-ulale, Moabʼga an bukib-binsaoed,
bela Moab-dulemarga an booed,
degi, a-ulale, Kir-Hares-neggweburga an osgomakoed.
32 Sibma-neggwebur-uva-nainu, an Jazer-neggweburga-boedba, an bega bur bule booed.
Be-anagan bela demarse warmaked, bela Jazerʼse warmaked.
Degi-inigwele, dule-obelogedi be-uva-nainugi, degi, be-uvaʼmargi gwichiguoed.
33 Moabʼgi nainu-gadi-sanmakmalad-nanaidgi, yeer-itolegedi, degi, weligwar-itolegedi bar itolesulid.
Uva-egured-galu an obelosad,
bar dule weligwaledba uva-egurnai guosulid,
binnasuli-dule-goledi bar weligwaledba golosulid.
34 ”Hesbón-dulemar-boedi, Eleale-neggweburse itoleged,
Jahaza-neggweburse e-boed warmaked.
E-goledi, Zoar-neggwebur-akar, Horonaim-neggweburse itoleged,
degi, Eglat-Selesiyáʼse warmaked.
Ar Nimrim-diwarbela dinna guoed.”
35 Bab-Jehová soged:
“Moab-dulemar bab-dummadgan-aila-matusulidgi ibmar-ogumakar-ukmalad an obelogoed.
Degine, e-bab-dummaganga ina-wawadikmalad-ukmalad an obelobaloed.
36 ”A-ulale, gar-gammu-goledba, an-ulubgi an Moab-dulemarga boed.
Gar-gammu-goledba, an-ulubgi an Kir-Hares-dulemarga boed.
Ar e-ibmar-nuegan-onmaksadi bela bergusad.
37 Bela Moab-dulemar bukib-itogedba sailagia-swiri ialedbimalad,
degi, bela sigamar ialedbimalad.
Bela arganmar daas-daas galadbimalad,
degi, bela bukib-binsaed-mor yoyoidbimalad.”
38 Bab-Jehová soged:
“Mete-isgana-mamarisayobi, an Moab-dulemar imaksad.
A-ulale, Moab-dulemar-negmar-birgine, degi, neg-galimbabali, unnila dulemar-boedbi itoleged.
39 ”Moab-dulemarga be bomala.
Moab ibiyobi bibichisa-sii be dake,
ibiyobi bingegudmala,
gannar sorsik aibiris imaksamalad.
Dulemar-e-yar-dikarba-mamaidga, dodogedga guded,
dule-ogwayedga guded.”
40 Bab-Jehová weyob soged:
“Be dakmar, Moab-isdarmaladi, suluba-gukuedyobi danimalad.
Moab-dulemarbina guakwaa danimalad.
41 Moab-neggweburmar bela sulegoed,
e-neg-gandikmalad bela egadga imakmaloed.
A-ibagine, Moab-sorda-bila-onomaladi, ome-ugakgunair boniganba-galitonaidaeyobi,
wile itomaloed.
42 Moab-dulemar bela berguoed,
ar Bab-Jehováʼgine san-dummarbaa imaksad.”
43 Bab-Jehová soged:
“Moab-dulemar-iduale, yaa-dummadi e-abindaksiid,
gwayed-dummadi e-abindaksiid,
yardakleged-galu e-abindaksiid.”
44 Bab-Jehová soged:
“Dule, dobedba wakinmaile, yaa-dummadgi argwandapoed,
dule, yaa-dummadgi-nosale, yardakleged-galugi galegoed.
Ar ani an, Moab-dulemargi sabsur-odurdakleged-iba barmidagoed.
45 ”Gwenna-gwenna nue-yegus Hesbónʼse modapmaloed.
Ar Rey-Sehón-neggwebur-Hesbónʼgi, bela soo gwichiguoed.
Soo bela Moab-yarsik-gwagmai,
Moab-dulemar-san-dummarba-samalad obelogoed.
46 Moab, be duledar-wiles,
bab-dummad-Quemos-e-neggwebur bela bibichisad.
Be-mimmigan, yar-baidse-selesmalad,
be-bunamala, gales selesmalad.”
47 Bab-Jehová soged:
“Ibagan-danikoedgine,
an Moab-dulemar gannar e-yarse-dagega an imakoed.”
Wese, Moab-dulemar-sabsur-odurdaklegoedgi sunmaklenaid.