1 Geb degi, Jesús Olivos-yarse nadsunnad. 2 Banedgine, Jesús wakudaryala Bab-Dummadse-goled-negse gannar nonigu, dulemar-bukidar ese nonimalad. Jesús sigisgua, dulemar-odurdakded.

3 Deun Garda-Narmaked-Dulemar, degi, Fariseoʼmar, Jesúsʼse ome-wargwen-negsichigi-galagwensuligunai-galesad senonimalad. Dummagan dulemar-abargi ome-ogwisnonimargu, 4 Jesúsʼga sogdemalad:

—Odurdaked-saila, we-ome negsichigi galagwensuligunai gasmalad. 5 Emi anmarga Moisés igar mesisad, omegan-deyobdamalad akwagi-makar oburgoye. Degite, bedina, ¿igi be sogmosunna?

6 Fariseoʼmar Jesús-wilubdakegala yamo deyob ese egichismalad. Adi, Jesúsʼgi sorba gwisgumalagar. Jesúsʼdi, napase dulluu imakdegu, e-googi napa narmak-narmak imaksigisad. 7 Ar Fariseoʼmar Jesúsʼse gannar-gannar egisnanaimarsoggu, Jesús gwisgusad, geb abin-sogded:

—Ar bemar-wargwenad na be isguedsuli-itogele, a-inse akwa omegi metedo.

8 Jesús gannar napase dulluu imakdebargu, gannar napagi narmaksigisbalid. 9 Ar Fariseoʼmar degii-Jesús-soge-itosmargu, mag na ulubgi e-isgudiid itosmarsoggu, war-wargwen ainidmalad. Dule-sergan-inse ainidmalad, geb sapinganse-bakar, ainidmarmogad. Unnila Jesús ome-negabargi-gwichid-ebo bessunnad. 10 Jesús gannar gwisgusgu dakded, dulemar sate, unnila omebi-gwichi, geb omega sogded:

—Omegwa, ¿bia dulemar-begi-gwisgunanaid nadmala? ¿Wargwensaar bar begi gwisgussurmala?

11 Ome, abin-sogded:

—Dummad, dule-wargwensaar angi gwisgussulid.

Geb Jesús omega sogdemosun:

—An begi gwisguosurmogad. Be nae. Mer be bar isguo.]

12 Gannar Jesús dulemarga sunmakdebargu, sogded:

—Ani an we-napneg-naid-e-gwallu-meegwadid. Ar dule anba dagele, negsichidgi nanaosulid, gwallu-meegwad nikuoed.

13 Fariseoʼmar Jesúsʼga sogdemalad:

—Be-ibmar-sogedi, na be dukin-barsogsoggu, a-ular, be-ibmar-sogedi, geg anmar abingaed.

14 Jesús, Fariseoʼmar-abin sogded:

—An-ibmar-sogedi, an na dukin soge-inigwele, ar wedi napiragwadid. Ar an wisid, bia an daniki, degine, bia an nabaloe. Ar bemardi wissurmalad, bia an daniki, degine, bia an nabaloe. 15 Ar bemardi unnila we-napneg-igar-maidba sogmalad, we, dule-isganaye, we, dule-nuedye. Andi an sogsulid we, dule-isganaye, we, dule-nuedye. 16 Ar dule-wargwenga an igar-nabogele, an-igar-nabogedi napiragwadba an imaked. Ar ande, wargwengi an igar-nabosulid, an-Bab-an-barmialid, a-anbo an imaked. 17 Bemar-igar-maidgi sogmaid, dule-warbo barsoged-nikale, wemar-ibmar-sogedi napiragwadye, abingalegoye. 18 Ani an na dukin angi an ibmar-barsoged. Bab-an-barmialid, angi ibmar sogmogad. Degisoggu, an-ibmar-sogedi, napiragwaddo.

19 Geb degi, Jesúsʼga sogdemarsun:

—¿Bia be-babde maisunna?

Jesús, dulemar-abin sogded:

—Ar be aku an-dakmalad, degine, be aku an-Bab-dakmarbalid. Ar be mag an-dakmalana, be an-Bab-mag-dakmarmogoenad.

20 Weyob Jesús Bab-Dummadse-goled-neggi, mani-weleged-naba-sii, dulemar-odurdaksigu sunmaksagusad. Dule-wargwensaale gwen Jesús-gassurmalad, ar ade, amba yoo e-galeged-ibagan omoged.

21 Jesús gannar Judío-dummaganga sogdebalid:

—An naesokar. Be an-amimalo-inigwele, be an-amimalosulid. Bemardi be-isguedba be burgwidmaloed. An-naedse, geg bemar warmaked.

22 Geb degi, Judío-dummagan sogdemar:

“Ar ibiga soge: ‘An-naedse, geg bemar namarye.’ ¿Ar ede na dukin oburgwedgi binsae?”

23 Jesús amarga sogded:

—Bemardi weginmaladid, andi nibnegginedid. Bemardi we-napnegginmaladid, andi we-napnegginedsulid. 24 A-ulale, an bega sogsagusmalad, be an-bengumalale, degi, an doa-dule-gue be bengumarbalile, be-isguedba na be burgwemaloye.

25 Judío-dummagan Jesúsʼga sogdemarsun:

—¿Ar be doasunna?

Geb Jesús, abin-sogded:

—Ar iduar bato an bega sogsamalad, an doa-gue. 26 Bemar-noar-nanadiidbali ibmar-bukidar an bemargi-soged nikad. Ar dule-an-barmialiddi napiragwadbi ibmar soged. Andi, an a-itosadba, we-napneggi-bukmaladga an ibmar sogdimogad.

27 Judío-dummagan, Jesús e-Babgi-ega-sunmaked, aku-itosmalad. 28 A-ulale, Jesús sogdebar:

—Ar bemar, ani Dule-Machi, nakrusgi-biokegala niba onakwismalale, geb bemar wisgunonimaloed, an doa-gue. Degine, an-itolegedba an ibmar imakdisulid. Ar an-Bab-an-odurdaksadba an sunmakdiid. 29 Ar an-Bab-an-barmialid anba gudiid, wargwen an-metedisulid. Ar ade, an bela-ibmar-imakedi, an-Bab-nabir-itoge an imaked.

30 Jesús-weyob-sunmakedba, bukidar egi bensuli gunonimalad.

31 Jesús, Judíoʼmar-egi-bengussurmaladga sogded:

—Ar bemar an-gayaburba-sunmakedgi nue eba nanaele, bemar an-sapingan-sunnadga gumaloed. 32 Degine, bemar igar-napiragwad wisgunonimaloed, degine, igar-napiragwad isguedgi bemar-ollorsanonikoed.

33 Judíoʼmar, Jesús-abin sogdemalad:

—Anmar, Abraham-e-wagan gumalad. Anmar dule-maiga gwen gudisurmalad. Degisoggu, ¿ibiga be anmarga soge: ‘Bemar ollorgunonikoye?’

34 Jesús, abin-sogded:

—Napira an bemarga soged, dule-isguedgi-gudimaladi, isgued-maiga gudidimalad. 35 Dule-maiga-arbaedi geg neg-yagi gudigu gued. Ar neg-ibed-e-mimmirdi negyagi gudigu guodo. 36 Degisoggu, Bab-Dummad-Machi isguedgi bemar-onononikir, geb be nue-napira ollorgunonimaloed. 37 An wisi bemar Abraham-wagan gumalad, degi-inigwele, an-ibmar-sogsad be benmalad-ulale, an-oburgwebimalad. 38 An-ibmar-sogedi, an-Bab-walik-an-ibmar-daksadba an sunmaked. Ar bemardi ibmar-imakedi, be-bab-ibmar-itosadba be imakmarmogad.

39 Judío-dummagan Jesús-abinsadmargu, sogdemalad:

—Abraham, anmar-dadad.

Jesús, abin-sogded:

—Bemar Abraham-wagan-sunnadina, Abraham-ibmar-imaksadyob be ibmar imakdimarmoganad. 40 Bab-Dummadgi an-ibmar-napiragwad-itosad an bemarga-sogsad. Degite, be an-oburgwebimalad. Dad-Abrahamʼdi gwen deyob gussulid. 41 Bemardi, be-bab-Satanás-ibmar-imaked be imakdimalad.

Geb degi, Judíoʼmar Jesúsʼga sogdemalad:

—Anmar negsichidgi gwalulesadsurmalad. Anmar bab-nika gwalulesmalad. Bab-Dummad anmar-babad.

42 Geb Jesús amarga sogded:

—Ar Bab-Dummad bemar-babana, be an-sabmalando. Ar an Bab-Dummadgi danikid. An-itolegedgi an danisulid, Bab-Dummad an-barmialid. 43 ¿Ibiga nue-akusunna an-ibmar-soged be itomala? Ar ade, bemar an-ibmar-soged yeer-itosurmalad, aga be aku itomalad. 44 Ar nia-saila bemar-babad, degine, be-bab-ibmar-abegedba be damalad. Ar gusgu, gebesailaunni nia-saila dule-gindakedid, degine, igar-napiragwadgi bangusad, ar igar-napiragwad nia-sailagi naisulid. Ar nia-saila gakansaar sunmakdele, gusgu na e-daedba sunmakdedaed. Ar ade, gusgu gakansaerbad, degine, dulemar-gakansaed-e-babad. 45 Ar andi ibmar-napiragwad bemarga soged, degite, be an-abingasurmalad.

46 ”¿Doa-dule, isgudiiye angi sogoe? Ar igar-napiragwad an sogele, degite, ¿ibiga be an-itosurmarsunna? 47 Ar dule Bab-Dummadgadile, Bab-Dummad-gayaburba-sunmaked itoged. Bemar, Bab-Dummadgadsulid, a-ulale, bemar Bab-Dummad-gayaburba itosulid.”

48 Judíoʼmar, Jesús-abinsadmalad, ega sogdemalad:

—Anmar nabir sogmalad, be Samaria-dulemar-isganayobmoye, degine, nia begi naiye.

49 Jesús, abin-sogded:

—Angi nia naisulid. An-Bab-nug bur an odummodiid. Bemardi an-nug ichodimalad. 50 An-nug-odummoged an amidisulid. Ar dule-wargwen an-nug-odummoged maid, a sogoed, an dule-nueddibe, an dule-isganadibe. 51 Napira an bemarga soged, dule an-gayaburba-sogedba-daele, we-dule burgosulid.

52 Geb degi, Judíoʼmar Jesúsʼga sogdemalad:

—Emigindi, anmar nue-wisdo, begi nia naid. Abraham, degi, Bab-Dummad-gayaburba-barsogmaladdi burgwismalad. Emide, bedi soged: ‘Ar dule-wargwen an-gayaburba-sogedba-daele, burgwed itogosurye.’ 53 Ar bede anmar-dad-Abrahamʼba ¿bur dummadsi? Dad-Abrahamʼdi burgwisad. Bab-Dummad-gayaburba-barsogmalad burgwismarmogad. ¿Ar be doaye sogsunna? Amarba, ¿be-bur dummadye be sogsunde?

54 Jesús, Judíoʼmar-abin sogded:

—An na dukin san-odummogele, an-san-odummodiidi, we binsaleddo. Bab-Dummad bemar-Bab-Dummadye be sogmaladi, a-Bab-Dummadi an-Babad, a, an-nug odummoged. 55 Bemardi a-Bab-Dummad akudakmalad, andi a-Bab-Dummad mag daked. An bemarga sogdibe, a-Bab-Dummad aku an dakye, bemar-sunnaa an gakansasaled. Andi a-Bab-Dummad mag an daked, degine, e-gayaburbaba an nanadibalid. 56 Anmar-dad-Abraham weligwar an-danikoed-dakoedba itosad. An-nonikid-daksagu, nue-weligwar itononikid.

57 Geb degi, Judíoʼmar ega sogdemalad:

—Amba be birga-dulabo-gakambe (50) niksulid, degite, ¿Abraham be daksade? Be daksasulid.

58 Jesús, abin-sogded:

—Napira an bemarga soged, amba yoo Abraham-gwalulege, bato an gudiid.

59 Degidgine, Judíoʼmar akwagi-Jesús-makega akwa gadebinmalad. Jesúsʼdi emar-idu dukusad, degi, Bab-Dummadse-goled-neggi nodsunnad. Degi, emar-abargi-node nadsunnad.