4
Be-bab-be-unaed be itoge
1 Machimala, bab-be-unaed nue be itomala,
ibmar-nue-wisiguega nue-ise-itogale be imakmala.
2 Igar-nuegangi an be-odurdakgwelo,
melle an-ibmar-odurdaked be itosuli guo.
3 An bipigwaunni, an-babba-an-gudigusgua,
an-nana anbina bela-belad-sogdigusgua,
4 an-bab an-odurdaksad, weyob anga sogsad:
“An-bega-ibmar-soged, ulubgi be nue-sedii imako.
An-bega-ibmar-soged be imako.
Deyob be imakele, we-napneggi suitii be gudiguoed.
5 Binsaed-nikagued be amie,
ibmar-nue-wisigued be amie.
Melle be an-gayaburba iego,
melle egi be banguo.
6 Binsaed-nikaguedgi melle be bangue,
ar a, be-bendakdii guoed.
Binsaed-nikaguedbina bur be soge,
ar a, be-edarbedii guoed.
7 Ibmar-baigan-idu, nue-binsaed-nikagued bur be amie.
Bela ibmar baiganba, ibmar-nue-wisigued bur be amie.
8 Binsaed-nikaguedbina bur be soge,
ar a, be-nug-odummogoed.
Binsaed-nikagued bur be sabgue,
ar a, be-nug-ogannogoed.
9 Binsaed-nikaguedi bega akwa-nuegan-ologurgingi-sigeyob gued.
Ologurgin-nonogi sigeyobi bega gued.”
Binsaed-nikaguedi burba-dulad-uked, nued-gudii be-imakbalid
10 Machi, we-napneggi suibaksaar be gudiguega,
an bega-ibmar-soged, nue be itoge.
11 Binsaed-nikagued-igarba an be-semaid,
igar-innikigwadba-nanaega an be-imaked.
12 Be binnaa nadapsogele, bega ibmar-nueganbi guoed.
Amba be gwae-gwae nadapsogele, bega ibmar-nueganbi gubaloed.
13 An be-odurdaked mer be iego, melle be indako,
nue be sedio, we burba-dulagudiguega be-imaked.
14 Dule-isganamarba melle be akae.
Amar-igarba melle be nanae.
15 A-dulemargi be bangue.
Melle a-dulemar-walikaa be gudigue.
16 Dule-isganamar ibmar-isgana-imaksurmalale, geg gabdamalad,
dule-oakalosurmalale, geg gabdamalad.
17 Ibmar-isgana-imaked mas-gunnedba bur-yeer itodamalad.
Sabsur-emar-imaked, vino-gobedba bur-yeer itodamalad.
18 Igi bolegoe neg-ainakwiardae, deyobi, dule-nuegan-e-nanaedi gued.
Dule-nuegan-e-daedi, neg ibegwaledse-nasgumai-nasgumai-daeyobi gued.
19 Dulemar-isgana-e-nanaeddi negsichid-naidyobi gued,
wissurmalad, ibigi na yoledimala.
An-be-unaed nue be itogo, ina-nuedga bega guoed
20 Machi, an bega binsaed-uked, nue be itoge,
ibmar-bega-an-soged, nuekwaa be itoge.
21 An be-odurdakedgi melle be bangue,
gwage-ulubgi nue-sedii be imake.
22 Ar dule binsaed-nikagunonikile, ega burba-duladga gued,
we-dulega ina-nuedga gubalid.
23 Bela ibmar-sunsogmalad-baiganba, be-binsaedi nue-itoakwaa be ebugo.
Ar we-binsalegedgine, gudiguleged danikid.
24 Gaya-isgana-sunmaked be indake,
melle bar be gakansadii nanae.
25 Ibmar-nueganginbi be atake,
yoo ibmar-danimaloedgi-atakdii be sae.
26 Be-nanadiid nue be dake.
Bela be-ibmar-imakedi innikigwadbi be imake.
27 Melle igar-nuedgi be aibane.
¡Igar-isganagi be bangue!