109
Bab-Dummad an-bendake
David, we-namaked narmaksad. Namakmalad-e-iduedga soglenaid.
1 Bab-Dummad, an be-nug ogannoged.
Melle be an-abin-imaksuli gue.
2 Dule-isganamar, dule-gakansamalad, angi gakansaar sunmakdimalad.
Gakansaedgi an-nug oichodimalad.
3 Sae-an-dakmaladbali, sunnasur angi sunmakdimalad.
Binsarsunna angi yolenanaid.
4 Andi, we-dulemar-nue-sabed,
degite, emardi angi yolenanaid.
Bab-Dummad, andi emarga bese gorsii daed.
5 Andi, ibmar-nued ega imaked,
emardi, ibmar-isgana anga imaked.
Andi, wemar-sabed,
emardi, sae-an-daked.
6 Bab-Dummad, we-dulemarga-igar-nabogega, dule-isgana ega be ogwiche,
dule-e-bendaknaid egi aibined be imake.
7 Ega igar-nabolealir, we-dulegi isgusye-sogleged be imake,
bese-goledse-bakar, ega isguedga-guega be imake.
8 Gwae be oburgwe.
Dule-baid ei arbaed-sued be imake.
9 E-mimmigan, bab-sate be imake.
E-ome, suisuli be imake.
10 E-mimmigan, neg-sate be imake.
Dule-baiganse mani-egisdii be imake.
E-neg-bibisgar-siidgi ononnoged be imake.
11 Dule-ega-idu-mani-ukdidaed,
bela ei ibmar-seled be imake.
Na e-ibmargi-arbasad,
ei dule-baigan-suega be imake.
12 Dule-baigan we-dule-wiledaksuli be imake.
Dule-baid bipisaale e-mimmigan-sergan-sated, melle wiledaked be imake.
13 E-wagan bela be ogiloge.
Dulemar we-dulemar-bela-ieged be imake.
14 Bab-Jehová, e-bab-ibmar-isgana-imakdigusad, mer be iego,
e-nan-isgudigusad, melle be iebalo.
15 Bab-Jehová, melle e-isgued be iego.
We-napneggi, dulemar we-dule-ieged be imake.
16 Ar we-dulede, dule-baigan-baisur-daksa gusad.
Dule-wilegana-baregindii gusad,
dule-ibmarbina-sogdimalad-baregindii gusad.
Dule-gwage-naibi-itodiid-baregindii gusad.
We-dulemar-oburgwedse baregindii gusad.
17 Ar aimar-ukabsaed yeer itodasoggu,
dulemar-baigan e-ukabsamosun.
Ar egi nued-binsaed abessursoggu, melle egi nued binsamarsun.
18 Dule, emar-ukabsaedi na e-mor-dummadyob ega gusun.
Emar-ukabsaedi, dii-goblegeyob egi ubosun.
Emar-ukabsaedi, ina-abagalaganse-ubogeyob ega gusun.
19 We-ukabsaedi, e-mor-dummadyobi gusun.
Sadergi-molidub-guur-naiyob egi nagubarsun.
20 Weyobi, Bab-Jehová an-isdarmalad imaksun,
weyobi, dulemar-sunnasur-angi-sunmakdimalad imaksun.
21 Bab-Jehová, bee be an-Dummadid,
Be-nug-dummarba-nikadba wile be an-dake,
dule-angi-sunmakdimaladgi be an-onoge,
ar be-sabgued dummarba gued.
22 An wilegedid, an ibmar-sate gudiid,
ulubgi ise-nue-naibi an itoged.
23 Binna-binna neg-gutulemaiyobi, an nolloo gumaid,
ses burwa-goledba-seled-daedyobi, an selemaid.
24 An mas-gunsulidba an gaaragusad.
An mas-gunsulidba an-yokor nue-nollogusad.
25 Dulemar an-dakalile,
angi dodoardamalad, anga alliardamalad.
26 An-Bab-Dummad-Jehováʼye, be an-bendake.
Sabgued-dummarba-nikadba be an-bendake.
27 Bab-Jehováʼye, magar-itogega be dulemar-imake,
ar bee be we-ibmar imaksad.
28 Be angi ise-nued binsae.
Ar emardi an-ukabsaele, akarsulid.
An-isdarmaladdi be obingegsae,
andi be-maiga-guedi, weligwar-itoge be an-imake.
29 ¡An-isdarmaladdi be dummad-obingegsae!
¡Bela-belad-bingeguega be imake!
30 Bab-Jehová-e-nug an-gayagi an odummogoed.
Dule-bukidar-abargi be-nug an ogannogoed.
31 Ar dule-isgana dule-wilegana-oburgweye-sokalile, bee be dulemar-wilegana bendakdaed.
A-ulale, be-nug an odummogoed.