1 Ascatan Jesús afu rafumisifo ya anoashu pushurasi ano nasonifo. Nannoashu Jesús pushconi. 2 Ascano Israelifoan aton tunutitian Jesús aton ichananti pushu muran iquishon ato yosiaiton. Nicacani, —¡Aira! ¡Nicacapon! ¿Ahuuscain na nocofunun fasi tapicoin sharamun? Tsoan oinyomisima cuscara huapaiquifin ahuamamishti huatiroquin. ¿Tsoancon Jesús ascara yosiamun? 3 Nanfin ihui yonomisiquin. María facu. Chipocufo Santiago non José non Judas non Simón. Ahuun poifori nuno no fu imisifo. Nonfin Jesús onanquin. Aacai ahuama. ¿Ahuuscashomun ahuamamishti huatiroquin? —icashu yoinannifo. Nannori shinancashon aqui shinanchacanifo. Acai cuscarocon huacani. Afanan Jesús nicapainifoma.

4 Ascano Jesús ato yoini isca huaquin, —Nan maitio Diosin tsain yoimisi nicatirofo. Ahuunoa yoisharamisifo. Nan cainni anoafo non ahuun yorafoancai nanfoansicai nicapaicanimaran, —ishon ato yoini. 5 Ascano isinin icaifo fustirasi manmanshon ato cayahuamani. Futsafori cayahuamapaifiaquin icoinra huayamaifoan anima. Diosihuunshon tsoa futsan atiroma cuscan ato ashopaifiaquin anima. 6 —¡Aira! Ahuunscain ua oinfiamisishaquin ua icoinra huapaicanimaran, —ishon Jesús shinanni. Ascaiton pushurasiti Israelifo icano cahuancacaini ato Diosin tsain shara yosin.

7 Ascatan afu rafuafo doce cunani, —Uqui fucahuun, —ato huaino. Aqui fuafoan ahuunshon yoshin chacafo yorafohuun nuucun atomaquinoa potanon. Ascashon ato rafurasisi nichini yorafo caya huamanonfo.

8-9 Ato nichiataima ato yonoquin isca huani, —Maton tushu foyamafain maton forusari foyamafain puin foyamafain maton sapato nan man sahuua fusti fofain maton sahuuti nan man tsahuua fusti ya fotacahuun. Poquiti fusti ya fotacahuun. 10 Pushurasi muran nocotan nan pushu fusti muransi oshacahuun. 11 Pushu futsan icanoafoan yafi pushurasi muran icanoafori mato iquimapaiyamaino iquiyamacahuun. Mato nicacasmaifoan maton sapato potapota sacaquin. Asca huaquin man oinmatiro mato nicacasmaifo. Ascan Diosin tsainri nicacasmacaniran, —ishon Jesús ato yoini.

12 Ascano ato yoiquin anaitiano pushurasiti anoafo ato yoifoanfafainifo. —Maton chaca shatucahuun Diosin tsain nicasharacahuun, —ato huaifoan. 13 Yoshin chacafo yorafohuun nuucun atomaquinoa potanifo. Isinincaifori shuniyashon fumanfain Upa Dios cufishonifo Jesushuunshon caya huafoanfainifo.

14-16 Ascatan Jesús ahuamamishti atiro cuscan nantifi yora nicacani. Ahuunoa yoifoanfafaini. Atirififoan yoinifo, —Jesusfin Juanquin nan ato unu muran iquimamisiquin. Afanan man funia. Ascacufin tsoan atiroma cuscan Jesús Diosinhuunshon ahuamamishti huatiroran, —icashon atirifiton yoinifo. Atirifoanri yoiquin, —Jesusfin Eliasquin, —huanifo. Atirifiton yoini, —Jesús Diosin tsain yoimisiquin. Nocon caifo Diosin tsain nocon shunifoan yoini cuscan Jesusri nanscacoin huaquin yoiaran, —ishon yoinifo. Ascano niaifon Herodes afo nicashon yoini, —Naanfin Juanquin. Mun tushtufiati afanan funiaran, —ishon yoini.

17-18 Juan Herodes rutuataima yoini, —Niaifon Herodes, min ushto Felipe ahuin, Herodiasi, min fian. Ascan mincai shara huama. Nocon shuni Moisés noco Diosin tsain cunushoni cuscan isca huani, “Futsan ahuin min fitiromaran,” ishon Moisés cununiran, —ishon Juanpan Herodes yoini. Anori nicacasmaquin ahuun ranushumuafo yononi Juan achishon cunu muran iquimanon. 19 Herodespan ahuin Herodiasin nicani Juanpan ahuunoa yoiaiton nicai aqui fasi sinai. Rutumariscapaifiaquicai ahuun funu Herodes, —Ma. Mincai Juan rutumatiromaran, —ishon yoini. 20 Juan nocofunu shara Dios tanasharamisi niaifon Herodes tapishon cushusharani.

21 Funun cushusharafiaino ahuinin ahuuscashoma Juan rutupaini. Funun cainnitian Juan rututiro punin shararan. Isca huaquin. Cainnitian ahuun niaifofo patashari non ranushumua niaifofo non niaifofo Galilea mai anoafori ichanannifo fuusishoshcaquin. 22 Piainfono Herodes ahuin Herodiaspan facu shomaya arusu mononi. Herodes yafi a futan piaifoan oincani fasi unimanifo. Ascano niaifoan yoini, —¡Aicho! Min monoaiton oin un fasi unimai. Ahuarashta fipaiquin ua yoihuu un mia inanon. 23 Diosin tapia un mia icon yoiaiton min fipaiyai cuscan ua yoihuu un mia inanon, —ishon yoini.

24 Nicatan shomayaton ahua yoini. —¿Un niaifo ahua yocaimun? —ahua huaiton, —“Juan tushtumahuu. Ahuun mapo ua inanshquin,” niaifon yoitahuun, —ishon yononi. 25 Ascano shomaya niaifoqui nasoni. —Juan tushtuhuu. Purato naratashon ahuun mapo ua inanshquin. Natian ua ashoriscahuun, —huani.

26 Nicai niaifon puusinima. Juan fasi shinain. Ahuun nomuran shinanquin isca huani, —¡Ohua! Un asca huapaima. Ascafia yorafoan un shomaya yoia cuscan nicacashon un asca huapaiyamafiaqui un aqui cairan, —ishon shinanni. 27 Ascaiton futsa yononi, —Juan tushtushon ahuun mapo ua fishotahuun, —niaifoan ranushumua yononi. Ascano cai cunu muran iquishon Juan tushtushoni. 28 Tushtushon purato naratashon funi. Fushon shomaya inanni. Ascano shomayaton ahua inanni. 29 Asca huano Juanhuunshon tanamisifoan nicacatan focashon ahuun caya mai huanifo.

30 Ascano Jesusqui afu rafuafo afanan naso furanifo. Acafo cuscan yafi ato yosia cuscari Jesús tapimashcaquin. 31 Ascaifono yorahuanrasi Jesusqui furi furinifo. Ascaquin ato pitimacoin huanifo. Afu rafumisifo yafi ato yoini, —Tsoa icama ano non fonon focahuun. Anoshon non tunuyonon, —ato huani. 32 Ascano shashohuanun tsoa icama ano fonifo. 33-34 Ascaiton yorafoan ato oinnifo. Ascatan Jesús yafi afu rafuafo nocoataima ian cusumunri yorahuanrasi atoqui fuainfoan oin Jesús atohuun ramapaini. Ascashon Jesús shinanquin isca huani, —Chashohuanfo cushumisioma nanscarifiai na yorafo cushumisiomaforan, —ishon shinanniquin. Ascashon ato ichapa yosini.

35 Ascano man fari caino afu rafuafoan yoinifo, —Nuno pushu yafi tushu yamai. Na yorafo nichihuun. Man fari caiquin. 36 Fonaincaniquin pushurasi ari yafi pushu patashari ato nichihuun anoshon tushu huanonfo, —ishon Jesús yoinifo.

37 —Mafin ato piimacahuun, —ato huaiton. —Noncai ahua ato pimatiroma. Nocofunun oshu ranan yonoahuunshon ahuun rafanan fishon nan yorafo pimashquin. ¿Nantimun non atohuunshon potaicai? —huaifoan. 38 —¿Ahuuti misi man ayamun? Oinyocahuun, —Jesús ato huaino. Oinshon yoinifo, —Misi mucu fustiti yafi shiman rafusi non ayaran, —huaifoan.

39-40 Nicatan Jesús ato yononi isca huaquin, —Ato yoicahuun futsano cincuenta tsaohuaifono futsa anori cien tsaononfo, —ato huani. Ascano yorafo faasi camaqui tsaoacunifo. Ato yonoa cuscan tsaoshoacunifo. 41 Ascaino nan shiman rafu yafi misi mucu fustiti tsomashon nai ari foisinifoantan Apa Dios cufini, —¡Aicho! Upan, mihuunshon un ato pimaicain. Min fasi sharacoincun, —huatan. Misi torupacutan shiman rafu ya osishon ahuunshon tapimisifo ato pashcanan huapani. 42 Ascaino picani mayacoinnifo. 43 A misi yafi shiman tushu huafo afu rafuafoan doce shihuati fospi huani. 44 Ascano cinco mil nocofunufoan piinifo.

45 Ascano ato pimaquin anaititan Jesús afu rafuafo yoini, —Shashon rufofo oquiri pushurasi Betsaida ano pocui focahuun. Un na yorafo nichiyonon, —ato huani. 46 Ato nichitan arus fusti machi mamaqui caashu Apa Dios fu tsainni.

47 Man fari caino afu rafuafo ian nushmancayan shashon nocoaifono arusu ian cusumunshon Apa cufiyoni. 48-50 Ato oian ian nushmancayashon fuun huaquin ato catima huani. Man faquishiaino Jesús ian fumancayan atoqui cani. Ato finonquin rashquini. Ascaitocai onannifoma. Onanshma ratucani. —Yoshin shafain, —fiisinifo. Ascaiton —Unquin. Ratuyamacahuun, —ato huani. 51 Ascatan shasho muran atoqui nanuinacahuani. Nanuano fuu nishmapacufoanni. Ascaiton afu rafuafoan, —¡Aira! ¿Ahuuscashocon Jesús isca huaimun? —huanifo. 52 Tapiyonifoma Jesús Diospan facu ahuamamishti huatirofiacun cinco mil nocofunufo piimaiton oinfiaitashacaquin Jesús onanyonifoma. Diospan facufiacun aton nomuran tapiyonifoma.

53 Ascatan ian pocufainifo Genesaret cusumunri nocoshon. Nanno shasho nushanifo. 54 Ascatan mapuinifoannaifoan nannoafoan samamashta Jesús onannifo. 55 Onantan ichonifo pushurasifo patashari chani focani. Isinin imisifo shuhua naratashon Jesusqui ihuunifo. 56 Nantiocushon isinin icaifo aqui ihuunifo. —Uhuun yora isinin icaiton min sahuuti cupanan mia munpaicani. Ato yoipun anonfo cayashcaquiran, —ishon yoinifo. Ahuun sahuuti muuncanashu cayapacunifo.