1 Ja Antioquíain iká joi akaibo xaranra jakana iki *profetabo, itan jato Diossen joi onanmaiboribi. Jabo ikana iki, Bernabé, Simón (ja Negro akin akanai), Cireneainoa Lucio, Manahem (ja Galileanko apo iní Herodes betanbi senen ania), jainoax Sauloribi.

2 Jatian ja jonibaon wetsa neten tsinkíanan non Ibo shinanhanan orankin ayunani itan Dios rabii ikanaitian, ja Diossen Shinanman jato yoia iki: “Ja Bernabé betan Saulo eki jenekanwe, jabora nokon tee axonti en kenaabo iki”, akin.

3 Jaskáketian oranhananbi, ayunana pekáo mamepasxon jatoki orankana iki. Jaskáaxon jato raankana iki.

4 Jatian Bernabé betan Saulo Diossen Shinanman raana, ja Seleuciain kabékona iki. Jainoax ja Chipre nasin wapóronin bokana iki.

5 Kaax ja Salaminain nokóxon, judíobo jain tsinkitai xobo meranxonbo Diossen joi yoikin peokana iki. Jatian Juanribi kaa iká, iki jato akini.

6 Ja nasi rebesbaini boax, Pafos janeya jemanko nókokana iki. Jainoa westíora judío yobé nókokana iki; jawen jane Barjesús, ja ikon *profetaboki yoinmeekin joi yoixon jato paranai.

7 Ja yobé iká iki, ja joni koshi Sergio Paulo betan iká. Ja iká iki shinanya joni; ja joni koshira Diossen joi ninkátinin keena iki. Jaskáxon ja Bernabé betan Saulo kenamaa iki.

8 Jatian jato kenamaa bekankebi, ja yobé Barjesús, jawen wetsa jane Elimas, Diossen joi yoikantin keenyamaa iki, jawen joi ninkáxon ja joni koshin ikonhanaketian.

9 Jaskataitian, ja Saulo, Pablo janeyaton, Diossen Shinanman iboa ixon, kikinhakin jainbikon oinxon,

10 yoia iki: —¡Mia riki janso, yoshinman bake, itan jatíbi jakon jawékibo akantinin keenyamai! ¿Jawekopiki ja non Ibon shinanna keská ikainbi, jaki yoitimakin jakonmabires shinankin min jeneyamai?

11 Mia jaskata kopíra, rama non Ibon jawetio basikamanres mia masá tenemai, nete oinyamaira mia benche banetai —akin. Jaskáatianbi yamekan mapókiranxon, moa jawe netebi oinyamaa iki. Jaskatax metsonxon iwekanon ikax, meshkáaketana iki, moa benche ikax.

12 Jaskáketian oinnax, itan non Ibo yoii iká joi ninkatax, ratéxon ja joni koshin Dios ikonhaa iki.

13 Jatian Pablo jabé boaiboyabi Pafossainoax pishíbaini boax ja Panfilia main iká Perge jeman nokókana iki. Ikaxbi Juan jato potabaini moa, Jerusalénhain karibaa iki.

14 Ja Pergeainoax, Antioquíain tekíribikana iki, ja jema iká iki Pisidia main iká. Jatian ja tantiti nete iketian, jain tsinkíti xobo meran jikiax, yakábekona iki.

15 Jatian ja esé kirika meran ja *profetabaon wishanibo yoyo akin senenhaa pekáo, ja tsinkíti xobo koirannai koshibaon jato yoikana iki: —Ja joi yoixon jato shinanmeemati ixon, jato yoireskanwe joi akaibó —akin.

16 Jaskáakana Pablon jikitaanan, netékanon ixon jato meken chankanxona moa netékanketian yoia iki: —*Israelitabo, itan Diossakin shinannai judíomabo, en mato yoiaipari ninkákanwe:

17 Noa Israel jonibaon Diossenra non reken papashokobo katota iki; jaskáara ja Egiptoain maei boax ikánontian, kikinbiresi kaikana iki. Iikinra, jawen atipana koshin ja maimea jato Diossen pikonike.

18 Pikoa boaxa ikana iki, jain joni jayamainko, chosko chonka baritiabira, jainoaxa jakonma axekan iki yoitimakanaibi Diossen jato jaweayamaa iki.

19 Jaskáaxon ja Canaánhain iká kanchis main jemabo jato keyoxona iki, jain non reken papashokobo jakanon ixon.

20 Ja main jakana iki, chosko pacha pichika chonka baritiabira. Jainxonra jan jato ikinti koshibo jato jikimaxona iki; ja Samuel *profeta jikii kaai kaman.

21 Iikinbi, apoya itin keenkin Dios yokákana iki. Jaskáakin yokákanketian, Benjamínman rarebo Quis janeya jonin bake Saúl jato jikimaxona iki. Janra chosko chonka baritia senen jato ikinna iki.

22 Jaskáa iikin, Diossen jakiribi Saúl pikoxon, jawen toan David jaton apo iti jikimaxona iki. Ja yoiira iká iki Dios neskati: ‘Enra oinke ja Isaíkan bake David westíora joni, ea keenai keskati jaa. Janra jatíbi en shinannai jawékibo ea axonti iki’, iki.

23 Ja Davidkan rareboboainoara, moabi jato jaskáaxonti yoini ixon, ja Israel jonibo jato kishpinmati Diossen jato raanxona iki, ja riki Jesús.

24 Jesús joámapari inontianra, Juanman jatíbi *Israel jonibo jato joi yoikatitai, jaton jakonma shinanbo akonkin jeneax bautizanmeekanti.

25 Jainxonribi jawen tee senenhati ochóma iken, Juanman jato yoia iki: ‘Ea riki jan jato kishpinmati iki ixon, maton shinannabira ea jama iki. Ikaxbi jara epekao joái. Já iki ea xewina, jaskara ikenra ea já namanbires ixon, jawen zapato risbitanibobi en choroxonti jisáma iki’, akin.

26 Jaskara iken nokon wetsabó: Mato Abrahamman rarebobaon bakebo itan ja Dios akin shinannai judíoma jonibo. Nato jan kishpinti joira matona iki.

27 Jaskara ikenbira, jaton joni koshiboyaxonbi ja Jerusalénhain ikábaon Jesús onanyamakana iki; jainxon ja *profetabaon wishani meran yoiai joibo, ja tantiti netetiibi yoyo akinbi, onanyamareskana iki. Jaskáakin onanyamaxonra. Jesús retekana iki, ja Wíshakan yoiai keskábo senenmakin.

28 Jainxon jakopi reteti yamakenbira, jato retemanon ixon Pilato yoikana iki.

29 Jatian Jesús jaskáati kirika meran yoiai keskábo ayonxon, mawáketian korosenmea pakexon shanka kini meran miinkana iki.

30 Jaskáakankenbira Diossen jirimaa iki.

31 Jaskatax ja netebaon ichabiresi jawen jonibo Galileankoniax Jerusalénhain boaiboki Jesús pikota iki. Jaskarabo jatonbi oinna ixonra, jabaon akai, rama ja Jesús ikábokiriakin jato yoikin.

32 Jaskara ikenra, nonribi ja jakon joi mato yoii iitai; ja moatianbi non reken papashokobo jaskáati Diossen yoini jawékira,

33 rama ja noa jaton rarebobo iketian, noa senenhaxonke, ja Jesús mawákenbi jirimaxon. Ja Salmos capítulo rabéain yoiai keská: ‘Mia riki nokon Bake, rama riki ea min Papa’, iki iká.* Ja Cristo mawákenbi jirimaxonra, Diossen jato onanmaa iki, já riki jawen Bake ixon.

34 Diossenra moabi yoia iká iki, mawákenbi jirimaxon jawen yora payómatima. Jaskáati ixonra, jawen kirika meran neskáakin jato wishamaa iki: ‘Enra ja kikin jakonhira itan ikonkon ja David axonti yoinibo senenhaxonti jake’, akin.

35 Jaribi yoii ikai Wishá meran neskati: ‘Ja min jakon yonotinin yorara, min payómatima iki’, iki.

36 Ikon riki, Davidkanra jabé senen jakatiai jonibo jato akinna iki, ja Diossen ati yoiai keskáakin. Jaskáa pekáo iiti, jaribi mawáketianra jawen anibo minmeetainkoribi miinkana iki, jainra jawen yora payota iki.

37 Ikaxbi ja Diossenbi jiria jonin yorara, payóyamaa iki.

38 Jaskara iken, rama onankanwe nokon wetsabó, ja Jesús kopires, jaton ochabo Diossen shinanxontima joi non mato yoiai.

39 Ja ochabora, Moiséssen esekan soati atipanyamaa iketian, mato Diossen jakonhakin ointi atipanyamaa iki, ikaxbi jatíbi já ikonhaibora, Diossen ja ochabo moa jato shinanxonyamai.

40 Jaskara iketian koiranmeekanwe, ja *profetabaon jaskáti yoini keskára mato winonake. Jabaonra neskáakin wishanike:

42 Jatian Pablo betan Bernabé, ja tsinkíti xobo meranoax moa pikókainbekonaitian, ja weikana judíobaon yokákana iki, wetsa tantiti neten ja joiboribi jato yoiribinon ixon.

43 Ja tsinkíti xobo meranoax moa tsinkiti senenxon, icha judíobaon itan judío jikia Dios ikonhabaonribi, Pablo betan Bernabé chibankana iki. Jaskákanaitian Pablo betan Bernabékan jato esea iki, ja Diossen jato noixon kenaabo ikax, jaki koshii jenékantima.

44 Jatian moa wetsa semananin tantiti nete nokóketian, ja jemameabo jatikaxbi ja non Ibon joi ninkati tsinkíkana iki.

45 Ikaxbi icha jonibo tsinkita oinnax, ja judíobo notsiresi jakonmaibo yoyo ikana iki. Jatian Pablon jato joi yoiaitianribi, jaki shirokana iki.

46 Jaskákanainbi jatoki rakéyamakin, Pablo betan Bernabékan jato neskáakin yoia iki: —Mato judíoboparikayara ike, non Diossen joi yoiti maxkáiraa; ikaxbi keenyamakin ja jatíbitian jati nete maton bikashamaa kopí, rama ja judíomaboiba kaxon non jato joi yoii kaai.

47 Non jaskáati yoiira Ibo iká iki neskati:

48 Jaskáaketian ninkatax ja judíomabo rarokana iki. Jainoax neskákana iki: Non Ibon joira jakonhira iki ikibo, jaskáaxonra ja Diossen jatíbitian jati neteya imatibaon non Ibo ikonhaakana iki.

49 Jaskatax non Ibon joi, ja main jatíbiain pextina iki.

50 Ikaxbi judíobaonbiribi, ja Diossakin shinannai ainboyabi ja jemamea kikin jonibo betan yoyo ixon, Pablo betan Bernabé ramiaxon ja mainmea pikokana iki.‡ Ja ainbobora ikana iki, ja judíobaon akai keskáakinres Dios shinannaibo. Ikaxbi jabo ikana iki Cristo ikonhayamaibo.

51 Jaskáakana kaai, jabaon rotokana onanti inon ikax, mai poto tawasakainbekona iki. Jaskatax Iconionko kabékona iki.

52 Ikaxbi ja joi akaibo Diossen Shinanya ikax, ikonbiresi rarokana iki.