15
Shuáran yajauch awajeana nuna Jesus jintintiamiania nu
(Márkus 7.1-23)
1 Nuyá Jerusaréṉ péprunmaya̱ Pariséusha yaunchu akupkamu jintinniuri̱sha Jesusan tariar aniasarmiayi 2 “¿Urukamtai ame unuiniamuram ii uuntri̱ yaunchu jintintrarmia nuna uminiatsu? Iis, ikijmiatskesha yurumáiniawai” tiarmiayi.
3 Tuíniakui Jesus aniasarmiayi “¿Urukamtai atumsha Yus akupkamu umirtsuk aya aents akupkamu umiirum? 4 Iis, Yus tíchamkia:
“Ame apa, nukusha shiir enentáimtustarum.” Tura “Shuarsha ni aparí̱ncha nukurí̱ncha katsekka nu shuar jakati” tíchamkia.
5-6 Antsu átumka tárume “Shuar ashí niiniu írunna nuna mash “Yúsnaiti” takui nuikia nuja̱i̱ ni aparí̱ncha nukurí̱ncha yáiṉchamniaiti, tárume. Nin yáiṉtinian nakitiak ayatik “Ashí winia áiniana nu Yusna asamtai yáiṉchamniaitjame” títiniaiti” tárume. Núnisrum tákuram Yus akupkamu iniaisarum aya aents akupkamu umiirume, tímiayi. 7 Antra chichamtiniaitrume. Yúsnan etserin Isayas yaunchu nekas atumin áartampramiayi ju̱na:
8 “Ju̱ aents ni wene̱ja̱i̱ shiir awajtuiniawai, tura ni enentái̱ jeachat pujuiniawai. 9 Tura tukeneasaṉ shiir awajtuiniawai. Aentsu chichame̱n jintintiainiayat “Yusa chichame̱nte” tuiniawai.” Tu áarmiayi” tímiayi Jesus.
10 Tinia shuaran untsuk tiarmiayi “Ju̱ antukrum péṉker nekaatarum. 11 Aents yúana nuka shuáran yajauch awajsashtatui. Antsu wenunmaya̱ jiinia nuka shuáran yajauch awajeawai” tímiayi.
12 Nuyá ni unuiniamuri̱ Jesusan tariar “Maa, Pariséu ame chichammin antukar ti itiurchat enentáimprarai” tiarmiayi.
13-14 Tuíniakui Jesus tímiayi “Ikiuktiarum. Kusuru áintsaṉ áiniawai. Tura kusuruncha jintintiainiawai. Mai kusuru ásar mai wáa̱nam akaiki iniaawartatui. Wats, ajanam nupá áintsaṉ ainiawai. Tura ashí winia Apar nayaimpiniam pujana nu araachmaka takamtsuk uwé ajapamu átatui” tímiayi Jesus.
15 Takui Pítiur Jesusan tímiayi “Nu métek-taku chicham paant awajsata.”
16 Tutai Jesus tímiayi “¿Atumsha nekaachurmek. 17 Enentáimprachurmek? Ashí wenunam waya̱a̱na nu wakenam wéatsuk. Tura nuyá iniaṉkastiniaiti. 18 Antsu wenunmaya̱ jiinia nu enentáinmaya̱ jiiniu asa áentsun yajauch awajeawai. 19 Enentáinmaya̱ ashí yajauch enentáimsatin jíiniainiawai. Maṉkartuatniusha, chikicha nuwé̱ kasamkatniusha, tsanirmatniusha, kasamkatniusha, wáitruatniusha, yajauch áujmatsatniusha 20 ashí nu áiniawai nekaska shuáran yajauch awajeana nu. Tura ikijmiatsuk yurumátniuka shuáran ni enentái̱n yajauch awajeatsui” tímiayi.
Nuwa̱ Israer-shuarcha Jesusan enentáimtusmiania nu
(Márkus 7.24-30)
21 Jesus nuyá jiinki Tiru péprunmasha Sitiuṉ péprunmasha wémiayi. 22 Tura nu nuṉkanmaya̱ nuwa̱ Jesusan tarí tímiayi “Uunta, uunt akupin Tawit ame we̱a̱trum asamtai winia waitnentrurta. Nawantur yajauch wakantruku asa ti wáitrutawai” tímiayi.
23 Tura Jesus ái̱kchamiayi. Tura ni unuiniamuri̱ tariar “Awemata, tiarmiayi. Tuke untsumki apapétmaji” tiarmiayi.
24 Nuyá Jesus tímiayi “Aya Israer-shuarnum meṉkakaru áinia nuna e̱a̱ktinian Yus akuptukuiti.”
25 Túrasha nuwa̱ tikishmatar tímiayi “Uunta, waitnentrurta.”
26 Tutai Jesus tímiayi “¿Uchí apatkuri̱ jurukir yawá susamniakait?” tímiayi.
27 Tutai nuwa̱ tímiayi “Nekas, Uunta, tame. Tura yawa̱sha ni aentsri̱ yurumainiakui nuṉká iniaarun yuíniatsuk.”
28 Takui Jesus tímiayi “Maku, nekas Winia enentáimtursaitme. Ame wakeram núnisaṉ atí” tímiayi. Tura nu chichamaik ni nawantri̱ péṉker ajasmiayi.
Jesus untsurí̱ jáinian tsuararmiania nu
29 Jesus nuyá jiinki Kariréa antumiaṉka káanmatkari̱n waketkimiayi. Tura naint waka nui̱ pujusmiayi. 30 Nui̱ untsurí̱ aents Nin tariar shutuapnasha kusuruncha chichachuncha tsupirkamuncha chíkich jáiniancha itiariarmiayi. Túrawar nawenam aeprusarmiayi. Túram tsuararmiayi. 31 Nuna íisar chichachusha chichainiakui, tsupirkamusha péṉker ajainiakui, shutuapsha péṉker wekainiakui, kusurusha wáinmainiakui, ti shiir enentáimprarmiayi. Yus ni áentsri̱n Israeran yáiṉmatai shiir yumiṉsarmiayi.
Jesus kuatru mir (4000) áishmaṉkan ayuramiania nu
(Márkus 8.1-10)
32 Nuyá Jesus ni unuiniamuri̱n untsukar tiarmiayi “Ju̱ aentsun waitnentainiajai. Warí, menaintiu tsawant Wiji̱a̱i̱ yurumtsuk yujainiatsuk. Ayurtsuk ni je̱e̱n akupkachminiaitjai. Jintiá pimpiki wáitsartatui.”
33 Ni unuiniamuri̱ tiarmiayi “Túrasha, Uunta, ¿shuar atsaasha tuyaṉ yurumak imiá sumaktajⁱ ju̱ aents ayurawartincha?”
34 Jesus aniasarmiayi “¿Urutma tanta takakrum?”
Tutai niisha “Siati (7) tanta nuyá ishichik namak takakji” tiarmiayi.
35 Nuyá aents nuṉká pujusarti tusa akupkamiayi. 36 Tura siati tantan achik namaknasha achik nuyá Yúsan yumiṉsamiayi. Tura puur aents ayuratarum tusa ni unuiniamuri̱n susamiayi. 37 Ashí yurumáwar jémararmiayi. Tura puunaru siati chaṉkin tiármiayi. 38 Tura nui̱ yurumáwaruka nuwa̱sha uchisha nekapmatsuk aya áishmaṉkak kuatru mir (4000) ármiayi. 39 Nuyá Jesus áentsun akupak kanunam eṉkemar Maktara nuṉkanam wémiayi.