9
Polo ya Isilaeli wenenala yamu kolito siya-muluna keina imo ka
1 Ena namo Kilisto lulau mino edomo we yakafo ka suki ádoto, ka ona lomo, ya Ouna Felegaga luneu mino nedeto lito, ido nanimo yaki oune-lune-kane yauti eti loto logimowe. Kolalo. 2-3 Mikaleka wenenane, Isilaeli wenena yamu kolito sene-mulune keina naba-naba ito ogofu kolimo idomo, ya aiyo, kanu ma nemo neko, nanimo ya Kilistodokati u kopa uto, ebane ya wenenanewa gimogi ne, loto kolito Goti loumu minowe.
4 Aya Isilaeli wenenane, ya Gotikafo nanimo nomilipane minenawae, loto olu lebolito, aimola lamenala ya mino gedeto, amoki kutifi gedami ka ido lo melami ka ya gimito, felegaga kuliyai numuna nabau ya mono lonola gimito, ido ka lalo lo mele gimami, ya etito-etito olu lalo o gedenae, loto lo mele gimami ne. 5 Ido aunibokolofanina ya ka mono kiyaba we wenaba kulinigi we ya minae. Ido aya wenena yautiko Kilisto ya mikaleka ukanaki oloto pito aiye. Aya we Kilisto ya wenena, neta-mata, muki ya kiyabani we wenaba Goti ya nemo yamu kuliya olu faka lo edemo dito minowa-minowa oto nemo ne. Ona.
6 Ido Goti kala logimami ya u fa wiye, loti ádalo. E’e, Isilaelikati oloto piyamo wenena yauti ma ya Isilaeli wenena kula minámamo ne. 7 Ido Abalahamu ufa fiyami wenena yauti ma ufa fiyami wenena kula yaki minámamo ne. E’e, aya yamu ka ma eti limo,
Aisaka ufa finami wenena yako kamo ufa finanimo wenena kula ya minenawamo ne,
loto ka mono lufuwau (Stt 21:12) ya nemo ne. 8 Aya ka monawa etito ne: Abalahamu nomilipala faifa mikaleka monalekati oloto piyamo ya Gotikafo nanimo nomilipane minenawae, loto olu leboilámaiye. E’e, Goti ka lo mele umaido yati oloto piyami nomilipala yautiko ufa finanimo wenena kula ya minenagilae, loto limo ne. 9 Yamu ka ma ya eti limo,
Kamenawa melodo ya itibito oneto, ologafo Salakafo nakafo ma kedenagoliye,
loto lo mele umami kawa ya ka mono lufuwau (Stt 18:10, 14) ya nemo ne.
10 Ido yako minámaiye. Ka ma yamuki kati kife lalo. Autefo-kolofate Aisaka lawoko yakafo olonafo Lebeka lobe kipa mulunau melami, 11-12 ya kipawa lele kedámami kamenalo ya monanina lalo ido nosámami ma melámaifa, Gotikafo lele yamu onibo Lebeka eti loumami,
Komu we yakafo ege melami we ya kouba-naba o edeto kafuwalo minenagoliye,
loto ka mono lufuwau (Stt 25:23) ya nemo ne. Eti loto loumami ka monawa etito ne: Gotikafo wenena iyaina o gedenae, loto, ya wenenawa monanina yamu kolito iyaina o gedámaiye. E’e, aimola kala lalo kito, luni fito iyaina o gedenamo ka ya auma wito minenagoliye, loto kawa loumami ne. 13 Aya yamu ya eti limo,
Yekopu ya sene-mulune umofa, ido Iso yamu eleka nofaiye,
loto ka mono lufuwau (Mal 1:2-3) ya nemo ne.
14 Yamu nediye loto lenune? Goti monala ya efe ádaiye, lenube? E’e, etito minámaiye. 15 Aya yamu ya Mosese eti loumami,
Wenena ma milumani kolito ani olu faka lenamo, ya moda nanimo kane lalo kito ya milumani kolito ani olu faka lenamo ne. Ido wenena mamu sene-muluneu kolinamo, ya moda nanimo kane lalo kito ya senemuluneu kolinamo ne,
loto ka mono lufuwau (Kis 33:19) ya nemo ne. 16 Etito ya wenena luni-kani kolinawamofe, ido auma wito lono olunawamo yamu iyaina o gedámaiye. E’e, Goti aimola yakafoko milumani kolito ani olu faka lenami yamu iyaina o gedami ne.
17 Aya yamu ya Felo ya eti loto loumami,
Kamo ya kiyabani we wekudi minenane, loto olu faka lo kedomo, ya namo aumane kamodoka olu oloto piyoneto, ya kuline mikau-mikau ba loto lo oloto melemo unawae, loto olu faka lo kedowe,
loto ka mono lufuwau (Kis 9:16) ya nemo ne. 18 Etito ya aimola kala lalo kito ya wenena ma milumani kolito ani olu faka liye. Ido aimola kala lalo kito ya wenena ma luni-kani gedageto minenawae, loto olu gedo gedaiye.
19 Aya yamu ya linate yauti makafo eti lonumunami, Aiyo, aimola kala lalo kito mona mele lomami, ya kemakafo ogofuto monala olu eleyapa wito ailo melenami ne? E’e, ogoufámonimo yamu amokafo nedito olu kalo mele ledaiye? loto loga o nedenanimo nefe? 20 E’e, kamo eti loto loga o nedenanimo we ya faifa mikaleka we ma minoto, egaidana oto olu itibito Goti ka loumunane? Aya yamu ya eti limo,
We makafo kaba oluto neta ma olufe lenami, ya netawa yakafo kamo etito olufe lo nedanimo ya neditole? loto wewa ya loumunami nefe?
loto ka mono lufuwau (Ais 29:16, 45:9) ya nemo ne. 21 Kaba masa olufe lenawamo wenena yate kaba oluti, filigaleka yauti masa ma lalo neta wenena omuni fulunamidana imo neta olufe lenune, loti koliti, ido filigaleka yauti masa ma fa neta yako olufe lenune, loti inanimo luni-kani kolinawado ya masawa olufe lenawamo ya nosámenami nefe? E’e, inanimo netanina ma nenako, inanimo luni-kani kolinawado ya moda olufe lenawamo ne.
22 Ido Gotikafo ayaidana oto aumala lilibito lifima ka naba-naba olu oloto pinae, loto kolito, ya wenena ma lifima ka naba giminami wenena ya masa nosámami yamaidana oti u kopa unawamo ne, loto olufe lo gedetami nefa, kamena fana-fana olu you loto koito gedami, 23 ido wenena ma milumani kolito ani olu faka lo gedenami wenena ya masa lalo yamaidana oti lamenaneu minenawamo ne, loto komu adeina akaima olufe lo gedetami, ya aimola lamena aboga nemo mona olu oloto pi gimoneto wenena muki kolife lenawae, loto eti o gedami ne. 24 Ido lalimo ya milumate kolito lamenaneu minenawae, loto olufe lo ledami wenena lute fiyami, ya Yuda wenena yautiko lute fiyámaiye. E’e, ailo feka wenena yauti yaki lute fiyaiye.
25 Yamu ya Hosea lufuwa wiyaigu ya eti limo,
Wenena ailo, namo wenenane minámamo wenena, ya nanimo wenenane minae, loto lo gedenagolowe. Ido sene-mulune gimámomo wenena, ya sene-mulune gimomo wenenale, loto lo gedenagolowe. (Hos 2:23) 26 Ido linate ya namo wenenane minámae, loto logimomo ebalo, ayalo ya kofawa minomo idami we Goti nomilipala ya minae, loti lo gedenagilae, (Hos 1:10)
loto ka mona lufuwau ya nemo ne.
27-28 Ido Isilaeli wenena yamu ya Aisaiya yaki eti loto lo oloto melami,
Isilaelikati ufa fiyamo wenena ya kuwo noku ake nemo yaidana oti oloto piti minenagilafa, ido Wekolakafo kala ya mikaleka ama ya alako auma wito olufe lenagolinako, aya wenena mumudi yauti faifa kefola efe yako olu omuni kenagoliye,
loto ka mono lufuwau (Ais 10:22-23) ya nemo ne.
29 Ido aya yamu Aisaiyakafo komu eti limo,
Wekola auma aboga yakafo Isilaeli wenena kefo efemako fa minonigu yauti ufa melenawamo ne, loto koito o ledámami neko, ya numuna meya Sodomu ido Gomola yaidana oto lofo fulu fuli lagi ne,
loto ka mono lufuwau (Ais 1:9) ya nemo ne.
30 Yamu nediye loto lenune? Kolalo. Ailo feka wenena ya monanina olufe lenawamo lono ya auma witi olámafa, ido koli kikito umamo yamu ya Gotikafo monatina efe limo wenena minae, loto lo gedami mona ya olamo ne. 31 Ido Isilaeli wenena ya lo melami kalo monito ya monate efe limo wenena minenune, loti lonowa auma witi olafa, ido aya kalo ya efe loti moinámamo ne. 32 Ya neditole? Koli kikito umuto ya moninune, loti kolámoti, inanimo lono ya oluto moninune, loti o minanako, efe loti moinámoti, uteba gininami kifanalo ya uteba witi lumu fou lamo ne. 33 Aya yamu ya eti limo,
Kolalo. Saiyoni numudo ya uteba ginito olu kopa o gedenami kifana ya fiyowe. Amo koli kikito umamo wenena ya moda ukanido kolámenagilae,
loto ka mono lufuwau (Ais 8:14, 28:16) ya nemo ne.