HIBRU
Pepa ilâ panzi Hibru (Juda) kalo-tawana tamâta
Tamâta toŋge iŋgere ŋgua ŋine ilâ panzi Juda tamâta ŋinde kalonzi tawana Yesu Kirisi, andeta kinda tasama tamâta ŋinde ŋa tia. Isama tu kinzi Juda tamâta pinde nenzi kalo-tawana nde kaika tia, kala itu ipu tini kaika panzi. Itu itula panzi tu zo ŋana sipono muli pa timbunzi nenzi tukuŋa wa vetâŋa wa nde marumbu lâ, aku itu kinzi ma sisama tu Yesu Kirisi nde irerege kuku Maro Kindeni tamwata, kala imo Mose wa kinzi aŋelo wa kinzi patarawâŋa tamâta kulunzi. Yesu ne kaika nde ŋalae ŋinde, kala kinda ma kalonda tawana i simbo nâ. Ambo kinda takai nâna ŋana nenda kalo-tawana kâ, ande ara ŋana ma tamandi kaika nâ.
1
Maro Kindeni Natu itula ŋgua pa kinda
1 Muŋgani lâ, ikura zo rârâ, ande Maro Kindeni io ŋgua lâ kinzi ŋgua-tulâŋa tamâta kawanzi, kala situla i kawa ŋgua ŋinde pwataki tava mâsi kie-kie panzi kinda timbunda wukale. 2 Andeta lâ zo ŋine, tâno ne zo laiti ŋana marumbu kâ, ande Maro Kindeni itula i kawa ŋgua pwataki pa kinda lâ i tamwata Natu kawa. Maro Kindeni ipatea tu Natu ŋinde ma muli ikai maro pa kelekele ndoni. Aku nia ndoyo Maro Kindeni wurâta ilua Natu ŋana ipulianzi kelekele ndoni sipâŋga lâ. 3 I Natu ŋinde itula Maro Kindeni kilala pwataki lâ, aku ŋinde ipane nia ndoni, itogo sinâla mine. Aku Maro Kindeni tamwata kilala nde ikeno lâ Natu ŋinde tini. I kawa ŋgua nde kaika ndo, aku ŋgua ŋinde uru iveta kelekele rârâni simo sondo ku simo nâ. I tamwata iveta nzâla panzi tamâta ŋana Maro Kindeni ma izavaru nenzi kiesaka piti ku ivetanzi sipâŋga ilonzi mbâra-mbâra. Iveta vetâŋa ŋinde marumbu lâ, ŋineŋga isaŋona pa Maro Kindeni Walo Tamwata tini pa wia kâ lâ samba ilo.
Maro Kindeni Natu ŋa ipâŋga ŋalae, ipole kinzi aŋelo ŋanzi
4 Mine kala Maro Kindeni ŋoa ilua Natu lâ, aku ŋoa ŋinde nde ara pâta kanaŋo, ipole aŋelo rârâni ŋanzi. Aku mine nâ, i io Natu ipâŋga mbâna-mbâna panzi aŋelo rârâni, kala simo i kalo. 5 Mine nde nanayoni Maro Kindeni ipai Natu mine tu,
“ ‘Noko nde naŋa natuŋgu. Kala ŋine naŋa amo noko tama”.
Aku i kala iporo ŋgua toŋge kilo mine tu,
“Naŋa ma amo i tama, aku i ma imo naŋa natuŋgu”.
Andeta Maro Kindeni iporo ŋgua kaŋa mine papa aŋelo toŋge, ande tia ndo. 6 Aku mine nâ, lâ zo ŋana Maro Kindeni io i Natu nzâla-kulu ipâŋga tamâta lâ tâno kulu, ande ipainzi ne aŋelo mine tu,
“Miki rârâni ma kapare tukumi kapanea i nâ”.
7 Maro Kindeni iporo ŋgua kaŋa toŋge ŋananzi aŋelo mine tu,
“ ‘Maro Kindeni isupwanzi ne aŋelo sitogo lawea mine silâ sikai kuleŋa papa i. Ivetanzi ne wurâta tamâta sipâŋga sitogo mbamba ne loloa mine.”
8 Taitu iporo ŋgua kaŋa toŋge pa i Natu mine tu,
“ ‘Maro Ŋalae, noko ma pwai koipu ŋalae, ma kumo mine ku kumo nâ. Noko uru pwai poe sondo ndo panzi ne tamâta. 9 Noko tini mwasa pa vetâŋa sondo nâ, aŋga vetâŋa sakamao nde noko ilo papa tia ndo. Mine kala noko tamwata ne Maro Kindeni ipateano tu pwai koipu, aku i ŋoa ŋalae ilano. Koipu toŋge ŋa ipole noko ŋa, ande tia ndo. Kinzi sivala samimi kuwae ara ndo lâ noko tini, kala kundeka pâta lâ.”
10 Aku Maro Kindeni kala iporo ŋgua toŋge kilo pa i Natu mine tu,
“ ‘Maro Ŋalae, nia ndoyo noko tamwata kupulia tâno ŋine kala ikeno kaika lâ, aku noko tamwata mbau kupulia samba tava kelekele rârâni simo âta ŋinde tona. 11 Samba tava tâno ŋinde ma muli naonzi tia lâ, itogo lalava siŋga ipâŋga râge-râge kala sitambira mine. Aŋga noko nde ma kumo mine ku kumo nâ. 12 Noko ma kuo samba tava tâno pa nia ŋgaŋe, itogo tamâta iviviki ne moe siŋga mine. Noko ma pwai samba ku tâno rua piti, itogo tamâta isawa ne pasawaŋa
‘siŋga piti lâ tini mine. Taitu noko tamwata uru kupalele, ande tia, aku noko ne mbwera ma marumbu, ande tia.”
13 Muŋgani, Maro Kindeni ipai i Natu mine tu,
“Noko kusaŋona ŋai pa mbauŋgu wia kâ lee, ikura lâ zo ŋinde naŋa ma aonzi noko ne kazâŋa tamâta simo noko kalo.”
Andeta i iporo ŋgua kaŋa mine papa aŋelo toŋge tia. 14 Aŋga kinzi aŋelo nde simo mana, a? Kinzi aŋelo nde koroani nâ, aku uru sikai kuleŋa pa Maro Kindeni. I uru isupwanzi silâ ŋana sivilanzi kalo-tawana tamâta kâ, kinzi ŋinde ipatea lâ tu ma iyautenzi piti lâ kondoma ilo.