1 O wölböt alaurupni, kezapqetok ambazip takapulakaŋi gwötpuk mi gölme dop liliköba maljei, miaŋgöra keu pakpak mi zilaŋ kude memba möt narime. Anutugö Uŋaŋan me öme kunŋan sölölöhöiga asuhuzawi, mi mönö mutuk esapesapnöŋ ala kewötme. 2 Anutugö Uŋaŋaŋgö könaŋi mi mönö kewö kewöta möt miwikŋaime, “Jisös Kraistnöŋ eta silebuk aka malök,” denike yeŋön keu mi jim miwikŋaimakzei, yeŋön mönö körek Anutugö buŋaya akze. 3 Kunŋan Jisösgö könaŋi mewö qahö jim miwikŋaimakzawi, yaŋön Anutugö buŋaya qahö akza. Kraist tuarenjoŋaŋgö ömeŋan mönö yaŋgö uruŋi sölölöhöiga keu jimakza. Kunöŋ asuhuba Kraistkö salupŋe kinda tuarenjoŋ ak waŋgimawi,* Kraistkö tuarenjoŋi mi Antikraist. Grik keu anti, miaŋgö könaŋi yahöt. Yaŋön Kraistkö salupŋe kinja aka Kraist ölŋi tuarenjoŋ ak waŋgimakza. keu mewö jiget mötketka yaŋön lök nalö kewöŋe gölmenöŋ asuhuza.

4 O (koko) gömokurupni, iŋini Anutugö buŋaya aketka Uŋa Töröŋan uruŋine kinda gölmegö ömewörömeŋi mi eŋgoŋgita luhut al eŋgimakza. Miaŋgöra kezapqetok ambazip takapulakaŋi mi ölöp luhut al eŋgiba malje. 5 Yeŋön gölmegö buŋaya aketka gölmegö ömeŋan sölölöhöm eŋgimakze. Miaŋgöra gölmegö ahakmemeŋi wuataŋgöba keu jigetka urumeleŋgö kopa ambazip yeŋön keuŋinaŋgöra kezap ala mörakze.

6 Nini Anutugö buŋaya ahinga Uŋa Töröŋan sölölöhöm neŋgimakza. Anutu möt waŋgizeaŋön mönö neŋgö keuninaŋgöra kezap ala mörakze. Anutugö buŋaya qahö akzei, yeŋön neŋgö keuninaŋgöra kezap qahö ala mörakze. Keu ölŋaŋgö Uŋaŋi aka isimkakalekö ömeŋi yetkö könaŋiri mi mönö mewö kewöta möt kutumakzin. Mewö.

7 O wölböt alaurupni! Anutunöŋ jöpaköm aŋguaŋgugö jalöŋi akza. (Miaŋgöra urukalem mi o jeŋaŋgö tandök ewö ahöba korakza.) Miaŋgöra nini mönö jöpaköm aŋguba malbin. Mewö aka maljini, körek neŋön mönö Anutu möt waŋgiba yaŋgöreŋök ahuahu dölökŋi ahuba maljin.

8 Anutunöŋ urujöpakö Toŋi akza. Mewö akzawaŋgöra kunŋan ambazip qahö jöpaköm eŋgimakzawi, yaŋön mönö Anutu qahö möt waŋgiba tönpin malja. 9 Anutunöŋ urukalemŋi kewö kondeli sutnine asuhuyök: Yaŋön Nahönŋi mohok-kunŋan nam köl neŋgii mal köhöibingöra aka melaiiga gölmenöŋ erök. 10 Nini Anutu jöpaköm waŋgiinmö, miaŋön urukalemgö könaŋi qahö. Urujöpakö könaŋi mi kewö: Anutunöŋ jöpaköm neŋgiba siŋgisöndoknini köl könjöratmamgöra Nahönŋi melaiiga neŋgöreŋ erök.

11 O (koko) gömokurupni, Anutunöŋ mewö önöŋi qahö jöpaköm neŋgiyöhaŋgöra neŋön mönö mewöŋanök uruninan jöpaköm aŋgumakin. Urukalem qahö ak aŋguinga qahö dop kölja. 12  * Jon 1.18Kunŋan kun Anutu nalö kunöŋ qahö ehökmö, jöpaköm aŋguba maljin ewö, Anutunöŋ mönö urunine lapingöba kiniga urukalemŋan urunini kokolak qeiga aködamuninambuk maljin.

13 Nini Anutubuk qekötahöba malinga yaŋön urunine lapingöba kinjawi, mi Uŋaŋi Töröŋi neŋgiyöhaŋgöra aka möt kutuba uruyahöt qahö ahakzin. 14 Iwinöŋ Nahönŋi gölmeŋi gölmeŋi neŋgö Amötqeqe Tonini akŋapköra melaiiga erök. Neŋön mi eka möta naŋgöba jimakzin. 15 Kunŋan “Jisös Anutugö Nahönŋi akza,” jiba jim miwikŋaimakzawi, Anutunöŋ mönö yaŋgö uruŋe lapingöba kiniga yaŋön Anutubuk qekötahöba malja.

16 Anutunöŋ uruŋan jöpaköm neŋgimakzawi, nini miaŋgö könaŋi möta miaŋgöreŋ möt narimakzin. Anutunöŋ urujöpakö Toŋi akza. Mewö akzawaŋgöra kunŋan ambazip jöpaköm eŋgiba maljawi, yaŋön mönö Anutubuk qekötahöba kiniga Anutunöŋ yaŋgö uruŋe lapingöba malja. 17 Mewö malinga köŋgörököm neŋgiiga Anutugö urukalemŋan urunini kokolak qeiga aködamu-ninambuk maljin. Nini Kraistkö tandök ewö gölme kusukŋi kiaŋgöreŋ maljin. Mewö maljinaŋgöra aka Anutugö jimtekötekö nalö ketaŋe Kraistkö jeŋe aŋgota miaŋgöreŋ awösamkakak aka tamehök kinbin.

18 Anutunöŋ jöpaköm neŋgiiga kinda öne töhön keŋgötnini mötpinbuk. Siŋgisöndok ambazip yeŋön Anutunöŋ siŋgisöndok-ŋinaŋgö likepŋi meleŋ eŋgibapuköra keŋgötŋini mörakzemö, Anutugö urujöpakŋan urunini kokolak qeza ewö, miaŋön mönö keŋgöt mötmöt pakpak yakörim tekömakza. Miaŋgöra kunŋan keŋgötŋi mörakzawi, yaŋön jöpaköm neŋgimakzawaŋgö könaŋi mi törörök qahö möt teköza.

19 Yaŋön mutuk jöpaköm neŋgiyöhaŋgöra aka nini urukalem ahakzin. 20 Kunŋan “Anutu jöpaközal,” jizapmö, alaŋi kazik ak waŋgimakzawi, yaŋön mönö muneŋ jiji ambaziwa akza. Miaŋgö könaŋi kewö: Alaŋi eka töndup qahö jöpaköm waŋgiza ewö, yaŋön Anutu qahö eka i mönö denöwö jöpaköm waŋgibawakto? 21 Kunŋan Anutu jöpaköm waŋgimakzawi, yaŋön mönö alaurupŋi mewöyök jöpaköm eŋgiba malma. Anutunöŋ jöjöpaŋ keuŋi mewö al neŋgiyök. Mewö.