1 Nalö miaŋgöreŋ Babilongö (Sinargö) kiŋi qetŋi Amrafel, Elasargö kiŋi qetŋi Ariok, Elamgö kiŋi qetŋi Kedorlaomer aka Goimgö kiŋi qetŋi Tidal malget. 2 Yeŋön kiŋ kewö miembuk könahiba bim auget: Sodom taongö kiŋi qetŋi Bera, Gomora taongö kiŋi qetŋi Birsa, Adma taongö kiŋi qetŋi Sinab, Seboim taongö kiŋi qetŋi Semeber aka Bela (qetŋi alaŋi Zoar) taon miaŋgö kiŋi. 3 Kiŋ pakpak kieŋön örue (ruerue) qetŋi Sidim miaŋgöreŋ tokoba kukösumŋini mindiriba jöhöjöhö aket. Sidim öruenöŋ nalö kewöŋe Sihi Köwet Köhömuŋi mi ahöza. 4 Yeŋön yambu 12:gö dop Kedorlaomergö jimkutukutu bapŋe mala kota yambu 13 miaŋgöreŋ yaŋgö keu bapŋe anbingö qetala karim aka yarö gilget.

5 Mewö aketka yambu 14 miaŋgöreŋ Kedorlaomer aka kiŋ tosatŋi yambuk jöhöjöhö aka malgeri, mieŋön kaba könagesö kewöŋi yembuk bim qeba luhut alget: Refa könagesö mi Asterot Karnaim mire eŋguba luhut alget. Zuzi könagesö mi Ham mire aka Eme könagesö mi Kiriataim miri miaŋgöreŋ eŋguba luhut alget. 6 Hor könagesö mi Seir gölme kunduŋambuk miaŋgöreŋ eŋguba eŋguataŋgöba anda anda El Paran miri miaŋgöreŋ aŋgota luhut al eŋgiget. El Paran mi gölme qararaŋkölkölŋaŋgö göraŋe ahöza. 7 Luhut al eŋgiba miaŋgöreŋök liliŋgöba En Mispat (qetŋi alaŋi Kades) miaŋgöreŋ kaba Amalek könagesö luhut al eŋgiba gölmeŋini pakpak aŋgön kölget. Amor könagesö Hazezon Tamar gölmenöŋ malgeri, mi mewöŋanök eŋguba luhut al eŋgiget.

8 Mewö asuhuiga Sodomgö kiŋi, Gomoragö kiŋi, Admagö kiŋi, Zeboimgö kiŋi aka Bela (qetŋi alaŋi Zoar) miaŋgö kiŋi yeŋön wahöta asasaitiba Sidim öruenöŋ aŋgota kiŋ kewö miembuk bim qebingö jaböŋi ala aröŋda kinget: 9 Elamgö kiŋi Kedorlaomer, Goimgö kiŋi Tidal, Babilongö (Sinargö) kiŋi Amrafel aka Elasargö kiŋi Ariok. Kiŋ 4 mieŋön kiŋ 5 yembuk aröŋget.

10 Mewö aröŋgetmö, Sidim gölme örue miaŋgöreŋ löm dodoho sapösapöŋambuk miaŋön kokolak qeba tarök. Mewö tariga Sodom aka Gomora taon mietkö kiŋiran yarö aziurupŋiri yembuk unjurata angaitketka azi tosatŋan löm miaŋgöreŋ tötohoba geba eŋguyök. Mewö eŋguiga alaurupŋini tosatŋi pakpak yeŋön ölöŋ köla unjurata gölme kunduŋambuk miaŋgöreŋ öŋgöget. 11 Öŋgögetka kiŋ 4 mieŋön Sodom aka Gomora anda sukinapŋini aka numbu neneŋini pakpak mi kiom köla memba tököba anget. 12 Abramgö behötŋi Lot yaŋön Sodom malöhaŋgöra aka i mewöŋanök sukinapŋambuk waŋgita anget.

13 Mewö angetka azi kunŋan ölöŋ köla misiŋgöba kaba miaŋgö buzup keuŋi mi Hibru (kian) azi Abramgöra jii mörök. Nalö miaŋgöreŋ Abramnöŋ Amor azi qetŋi Mamre yaŋgöreŋ in ip ketaŋi ketaŋi mieŋgö kösutŋine malök. Mamrenöŋ munyahötŋi qetŋiri Eskol aka Aner yetpuk mohotŋe Abrambuk jöhöjöhö aka malget. 14 Abramnöŋ behötŋi Lot waŋgita angeri, miaŋgö keuŋi möta aziurupŋi 318 nanŋi mire asuhuba mötmöt möta bimqeqe köl guliba malgeri, mi eŋgohol tokoba kerök kambu eŋguataŋgöba Not göröken anda mala Dan mire aŋgotket.

15 Abramnöŋ aziurupŋi mendeŋ eŋgiiga yeŋön suŋgem miaŋgöreŋ közöla kerök kambu qeraköm eŋgimemba luhut al eŋgiget. Luhut al eŋgiba eŋguataŋgöba anda mala Damaskusgö Not likepŋe miri qetŋi Hoba miaŋgöreŋ aŋgotket. 16 Miaŋgöreŋ aŋgota sukinap pakpak kiom qeba memba angeri, mi miwikŋaiget. Behötŋi Lot aka yaŋgö öröyuaiŋi mi memba waŋgita liliŋgöba kayök. Sodom aka Gomora yeŋgö ambimoröurupŋini aka ambazip tosatŋi mi tok lökŋanök eŋguaŋgita kaget.

17 Abramnöŋ mewö Kedorlaomer aka kiŋ tosatŋi yambuk jöhöjöhö aka malgeri, mi eŋguba luhut al eŋgiba liliŋgöba kaiga Sodomgö kiŋi yaŋön Sawe örue (qetŋi alaŋi Kiŋgö örue) miaŋgöreŋ miwikŋaiba ekŋamgöra anök. 18  * Hib 7.1-10Nalö miaŋgöreŋ Melkizedek Salemgö kiŋi miaŋön bered aka wain o memba kayök. Yaŋön Anutu öŋgöŋgöŋaŋgö jike nup galömŋi ahök. 19 Mewö aka Abram kötuetköm waŋgiba keu kewö jiyök: “Anutu öŋgöŋgöŋan suep gölme miwikŋaim etkiyöhi, yaŋön mönö Abram gi kötuetköm gihii malman. 20 Anutu öŋgöŋgöŋan kerökurupki göhö böröge al eŋgiyöhi, mönö i möpöseizin. “Mewö jiiga Abramnöŋ öröyuaiŋi pakpak mendeŋniga kambu ten asuhuiga mieŋgöreŋök mohot mohot (10%) memba naluha waŋgiyök.

21 Mi waŋgiiga Sodomgö kiŋan Abramgöra kewö jiyök: “Ambazipurupni mia niŋgimanmö, sukinap mia mönö nangi buŋaya akŋa.”

22 Mewö jiyökmö, Abramnöŋ Sodomgö kiŋaŋgöra kewö jiyök: “Keuni köhöimapköra nöŋön böröni Kembu Anutu öŋgöŋgöŋi Suep gölme miwikŋaim etkiyöhi, yaŋgöreŋ göröken memba wahöta jöjöpaŋ keu kewö jizal: 23 Nöŋön göhöreŋ yuai kun mi qahö kötökŋi memam. Möt kösögahö kitipŋi me köna esugahö kösöŋi mi mewöŋanök qahö memam. Mewö akiga göŋön könaŋgep kewö jibanbuk: ‘Nöŋön Abram yuai waŋgibiga yaŋön azi pomŋi qetbuŋaŋambuk aka malja.’ Göŋön mönö mewö jimamgö osiba malman. 24 Nöŋön yuai kun qahö toroqeba memam-mö, aziurupnan wani yuaia negeri, mi lök neŋgigetka dop köl teköza. Mewöyök azi alaurupni Aner, Eskol aka Mamre nömbuk kageri, yeŋön mönö töwa jijiŋinaŋgö dop meme. “Mewö.