1 Suep garata yahöt mi Abraham mosöta anda mare aiga Sodom aŋgorohot. Aŋgorohotka Lot azi miaŋön taon miaŋgö kiripo naŋgune tarök. Tata etkeka wahöta jömjölöŋiri jiba eŋguaŋgitmamgöra anda gölmenöŋ simin köla bamgöba geyök. 2 Geba kewö jiyök: “O kembuyahötni, iŋiri ölöp welenqeqeŋiri nöŋgö mire kaba könaŋiri saŋgoŋda mohotŋe suŋgem ahöbin. Ahöba wahöta ölöp söŋanök köna toroqeba anmahot. “Mewö jiyökmö, yetkön kewö jiyohot: “Qahö, niri ölöp qenjarök sombem kunöŋ anda ahöbit.”

3 Mewö jiyohotmö, Lotnöŋ kapaŋ köhöikŋi köla jiba etkuaŋgita nanŋi miriŋe anda öŋgöget. Öŋgöba welenqeqeurupŋi jim kutum eŋgiiga bered yistŋi qahö ohoget. Mewöyök numbu nene nahömŋambuk möhamgöba ohoba etkigetka neyohot.

4 Mi nemba gaun ahöbitkö ahotka miaŋgöreŋök Sodom ambazipnöŋ kaba miri mi liliköget. Sodom taongö bahöŋi pakpak miaŋgöreŋök ambazip namŋi aka sepgwölö mi totnöŋ totnöŋ lömbötŋambuk öröba kaŋgotket. 5 Kaŋgota Lotköra kewö qetket: “Azi yahöt mare göhöreŋ kazahori, mi denike? Azi nini yetpuk sero akingöra mötzin. Miaŋgöra mönö i etkuaŋgita neŋgöreŋ etme.”* Kemb 19.22-24

6 Mewö qetketka Lotnöŋ naŋgu metala yeŋgöreŋ geba andöŋe naŋgu kölök. 7 Naŋgu köla kewö jiyök: “Alaurupni, mewö qahö. Silik bölöŋi mi kude akŋe. 8 Mötket. Nöŋgö böratni yahöt seram mala nalö kunöŋ azibuk qahö ahöyohot. I ölöp eŋgöra etkuaŋgita etpiga wanat yuaia akingö mötzei, mi ölöp sihimŋini meköme. Mewömö, nöŋgö miri boŋan azi yahöt etkualöŋda sel jöhöm etkizawi, ia mönö yuai bölöŋi kun qahöpmahöp ak etkime.”

9 Mewö jiyökmö, yeŋön kewö meleŋda teriŋda qetket: “Mönö kesalnöŋ. Göŋön ki kaba kiana mala nangahöra niŋia jiba mötnöŋ öŋgöiga ninia pöndaŋ jim kutum neŋgimamgö mötzan? Yetkön qahö kamahot ewö, mönö nangak neŋgöreŋ kanöŋga mönö kahasililiŋ keta bölökŋi nangi ak gihibin. “Mewö jiba Lot utalgetka kököndöt aniga öŋgöba miri naŋguŋi qesiŋbingö aka kinget.

10 Mewö aka kingetmö, azi yahöt mietkön böröŋiri böraŋda Lot öröm gilohotka miri uruŋe öŋgöiga naŋgu kölohot. 11 Naŋgu köla kinda azi ketaŋi moröŋi miri naŋguŋe yaigep kingeri, mi jiyohotka keu jitŋiran eŋgualöŋniga jeŋini gömöliiga jipjap kota naŋgu miwikŋaibingö mezaŋqezaŋ aka jaruba osiget. Mewö.* 2 Kiŋ 6.18

12 Azi yahöt yetkön Lotköra kewö jiyohot: “Gi nahönurupki, qiŋgiböraturupki aka tinilosomurupki tosatŋi pakpak taon kiaŋgöreŋ maljei, i mönö eŋguaŋgitnöŋga taon ki mosöta anme. 13 Nini taon ki ayuhuba köndeŋmöndeŋbin. Könagesö kieŋgö kahasililiŋgöra gwötpukŋan Kembugö jeŋe önöŋi qahö qeta sahöta malget. Miaŋgöra yaŋön melaim netkiiga gölme ki ayuhuba köndeŋmöndeŋbitköra ki kazit.”

14 Mewö jiyohotka möta Lotnöŋ anda qiŋgi buŋa yahöt böratyahötŋi etkömembitkö jiiga malohori, yetköra kewö jiyök: “Iŋiri mönö ösumok wahörohotka miri ki mosöta anbin. Kembunöŋ taon ki ayuhuba köndeŋmöndeŋmamgö akza. “Mewö jiiga yetkön keu mi mörohotka göngönahit tandök ahök.

15 Miri waŋgaraŋ suruiga Suep garata yahöt yetkön Lot öröm kuŋgum waŋgiba kewö jiyohot: “Anutunöŋ Sodom yeŋgö siŋgisöndokŋinaŋgö likepŋi meleŋda taonŋini köndeŋmöndeŋma. Göŋön yembuk mohotŋe ayuhubanbuköra mönö zilaŋ wahöta anömgi aka böratyahötki göbuk tatzahori, mi eŋguaŋgita taon ki mosötket.”

16  * 2 Pitö 2.7Mewö jiyohotka Lotnöŋ toroqeba eksekpeksek aiga azi yahöt yetkön Lotkö böröŋi melanjiba memba anömŋi aka böratyahötŋi yeŋgö böröŋini mewöŋanök melanjiba memba eŋguaŋgita taon sileŋe anget. Kembunöŋ mewö ak kömum eŋgiyök. 17 Taon sileŋe angetka azi yahöt yetköreŋök kunöŋ keu kewö jiyök: “Malmalŋini aŋgön kölmegöra mönö ösumok misiŋgöba angaitme. Andöŋine kude liliŋgöba uba anda gölme köröŋe endu aŋgota miaŋgöreŋ mewöyök dörök kude alme. Ayuhubepuköra mönö kunduŋe eu öŋgöba misiŋgöba angaitme.”

18 Mewö jiyökmö, Lotnöŋ kewö jii mörohot: “O Kembuni, göŋön mewö akingöra kude jiman. 19 Göŋön malmalnaŋgö bohonŋi jöhöba ak-kömukömu ketaŋi kondelnöŋga göhö jege ölŋa kalem möriam miwikŋaiba welenqeqegi akzalmö, mötnöŋ, nöŋön kunduŋe eu misiŋgöba angaitmamgö osimam. Köndeŋmöndeŋ kiaŋön nöŋgö qakne öŋgöiga kömumbileŋbuköra keŋgötni mötzal. 20 Mötnöŋ, taon moröni kun endu ahöi ekzani, miaŋön köröpŋi qahöpmö, ölöp anbinaŋgö dop akza. Miaŋgöra ölöp jinöŋga miaŋgöreŋ misiŋgöba angaita ölöwaka malbin. Miri morörökŋi mi eknöŋga dowe ahöiga miaŋgöreŋ ölöp anda malmalninaŋgö bohonŋi jöhöbin.”

21 Mewö jii mörohotka kunöŋ kewö meleŋnök: “Mi ölöp! Keu jizani, miaŋgöra mewöyök ölöp imbi köl gihimam. Taon moröŋaŋgöra jizani, mi qahö ayuhumam. 22 Mi qahö ayuhumam-mö, iŋini mönö ösumok miaŋgöreŋ misiŋgöba angaitme. Miaŋgöreŋ qahö aŋgotketka nalö sutŋi kewöŋe nöŋön yuai kun akŋamgö osimam. Iŋini mutuk miaŋgöreŋ aŋgotketka miaŋgö andöŋe ölöp jim kutubiga köndeŋmöndeŋ asuhuma. “Lotnöŋ taongöra ‘morodökŋi’ jiyöhaŋgöra aka taon miaŋgö qetŋi mi Zoar (morodökŋi) qetketka ahöza.

23 Wehönöŋ lök koriga Lotnöŋ Zoar taonöŋ kaŋgorök. 24  * Mat 10.15; 11.23-24; Luk 10.12; 17.29; 2 Pitö 2.6; Jud 7Kaŋgoriga Kembunöŋ jiiga suepnöhök Kembugö mireyök salfa köt könöpŋambuknöŋ mi kie ewö Sodom aka Gomora yeŋgö qakŋine eta turum eŋgiyök. 25 Turum eŋgiba miaŋön taon yahöt mi aka gölme köröŋi pakpak kösutŋire ahözawi, ambazip körek miaŋgöreŋ malgeri aka ip kösö yuai görökŋi (töŋgönŋi) gölme miaŋgöreŋ ahögeri, mi ayuhum eŋgim teköyök. 26 Lotkö anömŋan apŋi wuataŋgöba anda kunbuk eleŋda andöŋe uba miaŋgöreŋök letota sihi köt aka tandö ewö kinök.* Luk 17.32

27 Abrahamnöŋ söŋanök wahöta mutuk Kembugö jemesoholŋe kinda keu eraum-mörohori, miaŋgöreŋ anök. 28 Miaŋgöreŋ anda kinda Sodom, Gomora aka gölme köröŋi ketaŋi pakpak miaŋgöreŋ göröken ui aniga gölme miaŋgöreŋ köwak injaŋi ketaŋan tokoba koriga ehök. Mi könöp ketaŋi ohogetka köwak ketaŋi wahörakzawi, miaŋgö dop ahök. 29 Anutunöŋ gölme köröŋi miaŋgö taonŋi taonŋi ayuhuba köndeŋmöndeŋda nalö miaŋgöreŋ Abraham mötmörim waŋgiyök. Behötŋi Lotnöŋ taon mieŋgöreŋ maliga mieŋön meleŋni gebingö aketka Anutunöŋ nalö miaŋgöreŋök jim kutuiga Lot köndeŋmöndeŋ miaŋgö uruŋeyök waŋgita kaget. Mewö.

30 Lotnöŋ Zoar taonöŋ malmamgö keŋgötŋi mörök. Miaŋgöra böratyahötŋi etkuaŋgita Zoar mosöta gölme kunduŋambuk miaŋgöreŋ anda tatket. Böratyahötŋi yahöt yetpuk baŋet uruŋe ahöm wahöt aka malget. 31 Miaŋgöreŋ mala böratŋi ketaŋan nalö kunöŋ munŋaŋgöra kewö jiyök: “Naniri iwiniran lök azi namŋi akza. Ambazipnöŋ gölme dop miaŋgöreŋ amimba nahönbörat miwikŋaim eŋgimakzemö, gölme kiaŋgöreŋ azi kun netkömemapköra qahö malja. 32 Miaŋgöra ölöp kaba iwiniri wain o waŋgizi nemba uruŋi eŋololoŋ aiga yambuk ahöba gölöm ala gwölönarök miwikŋaiziga könagesöninan toroqeba malme.”

33 Mewö jiba suŋgem miaŋgöreŋök iwiŋiri wain o waŋgiyohotka neyök. Nemba uruŋi eŋololoŋ aiga datŋan anda yambuk ahöyök. Wani nalönöŋ qöhöröŋe kayök aka wani nalönöŋ wahöröhi, mi iwiŋan qahö mörök.

34 Ahöba wahöta böratŋi ketaŋan munŋaŋgöra kewö jiyök: “Nöŋön uran suŋgem iwinambuk ahöyal. Ölöp merak suŋgem mewöyök wain o kunbuk waŋgizi nemba uruŋi eŋololoŋ aiga göŋön mönö anda yambuk ahömahot. Mewö ahöba iwiniraŋgöreŋök gölöm ala gwölönarök miwikŋaiziga könagesöninan toroqeba malme.”

35 Mewö jiba suŋgem miaŋgöreŋ mewöyök iwiŋiri wain o waŋgiyohotka neyök. Nemba uruŋi eŋololoŋ aiga munŋan anda yambuk ahöyök. Wani nalönöŋ qöhöröŋe kayök aka wani nalönöŋ wahöröhi, mi iwiŋan qahö mörök.

36 Mewö ahotka miaŋgöra mohotŋamŋire iwiŋiraŋgöreŋök gölöm alohot. 37 Böratŋi ketaŋan morö azia memba qetŋi Moab (iwinaŋgöreŋök) qerök. Moab yaŋgö gwölönarökurupŋan ahumsehip aka kotketka nalö kewöŋe mewöyök qetŋini Moab könagesö qerakzin. 38 Böratŋi moröŋan mewöŋanök morö azia memba qetŋi Ben Ami (könagesönaŋgö nahönŋi) qerök. Azi miaŋgö gwölönarökurupŋan ahumsehip aka kotketka nalö kewöŋe mewöyök qetŋini Amon könagesö qerakzin. Mewö.