1 Nalö miaŋgöreŋök tosatŋan kaŋgota Jisös kösohot kewö jiget mörök, “Galili ambazip tosatŋan Jerusalem jikenöŋ jöwöwöl ohogetka premiö Pailötnöŋ jiiga suahö galömurupŋan miaŋgöreŋ öŋgöba eŋgum kömugetka sepŋini eta lama bulmakau sepŋinambuk loloŋqaloŋ ahök.”

2 Mewö jigetka meleŋda kewö jii mötket, “Iŋini miaŋgöra kewö mötmöribepuk: Galili ambazip mieŋön Galili ambazip tosatŋi pakpak eŋgoŋgita siŋgisöndok aka malgeraŋgöra sihimbölö mi mötket. 3 Mewö qahöpmö, nöŋön kewö jibi mötket: Iŋini uruŋini qahö meleŋme ewö, iŋini körekŋan mönö mewöyök ayuhum teköme. 4 Me miri qetŋi Siloam miaŋgöreŋ miri köröpŋi kunŋan eta köla ambazip 18 turum eŋgii kömugeri, iŋini yeŋgöra kewö mötmöribepuk: Yeŋön Jerusalem könagesö tosatŋi pakpak eŋgoŋgita siŋgisöndok aka keuŋinambuk malget. 5 Qahöpmö, nöŋön kewö jibi mötket: Iŋini uruŋini qahö meleŋme ewö, iŋini körekŋan mönö mewöyök ayuhum teköme.” Mewö.

6 Jisösnöŋ dopkeu kun kewö jiyök, “Azi kunŋan muli ip kömöri nupŋe kota kini miaŋgö ölŋi jarumamgö anökmö, kun qahö miwikŋaiyök. 7 Qahö miwikŋaiba nup galömŋaŋgöra jiyök, ‘Mötnöŋ, nöŋön muli ip kiaŋgö ölŋi yambu (yara) karöbutkö dop kaba jaruyalmö, kun qahö miwikŋaial. Miaŋgöra mi mönö wuanöŋgöra toroqeba gölmegö kelökŋi önewat öröi sihitŋanök akapuk. Miaŋgöra mi mönö köla gilnöŋ anma.’ 8 Toŋan mewö jiyökmö, galömnöŋ meleŋda jii mörök, ‘O azi kembuni, mi ölöp mosötnöŋga yambu (yara) ki kunbuk kinma. Nöŋön nalö sutŋe kiaŋgöreŋ kinoŋnöŋ gölme esiba kundupköba isoŋbasoŋ ala liliköbi kelökŋambuk akŋa. 9 Nöŋön mewö akiga yambu (yara) andöŋe miaŋgö ölŋi ölöp ahubawak. Mi qahö ahuma ewö, mi ölöp kölman.’ ” Mewö.

10 Jisösnöŋ Sabat kendonöŋ köuluk miri kunöŋ öŋgöba Buŋa keu kusum eŋgiyök. 11 Miaŋgöreŋ ambi kun tarök. Ömenöŋ yambu (yara) 18 miaŋgö dop mem löwörim waŋgiiga könisemŋi milipköiga qötöteimamgö osiba tata malök. 12 Jisösnöŋ ambi mi eka oholi kaiga kewö jii mörök, “Ambi, eksekpeksek kawölgan mönö gömosöri ölöwakzan.” 13 Mewö jiba böröŋi nöröpŋe ali miaŋgöreŋök qötöteiba Anutu möpöseim waŋgiyök.

14  * Eks 20.9-10; Dut 5.13-14Möpöseim waŋgiyökmö, Jisösnöŋ Sabat kendonöŋ ambi mi mem ölöwahöhi, köuluk mirigö galömŋan mi eka miaŋgöra möri bölii keu könahiba ambazip kambu yeŋgöra jiyök, “Nup memegö nalö 6 ahözawi, miaŋgöreŋ mönö kaba mem ölöwak eŋgimapköra jime. Mi Sabat kendonöŋ qahö.”

15 Mewö jiyökmö, Kembunöŋ meleŋda kewö jiyök, “O urumeleŋgö silesile ambazip! Iŋini pakpak bulmakau aziŋini me doŋkiŋini mi Sabat kendonöŋ mireyök pösata eŋguaŋgitketka onöŋ anda nemakze me qahö? Eŋgöreŋök kunöŋ mi qahö aŋgön köl eŋgimakza. 16 Mötket! Ambi kiaŋön Abrahamgö gwölönaröha aiga Satanöŋ jöhöm waŋgii yambu (yara) köröpŋi 18:gö dop maliga nöŋön kösöŋi mi Sabat kendonöŋ pösatpi dop köl eŋgiza me qahö?” 17 Mewö jiiga tuarenjoŋurupŋi pakpak yeŋön gamuŋini mötket aka ambazip kambu pakpak yeŋön aŋgöletot wewelipŋambuk meyöhi, mi pakpak eka möta söŋgaiget. Mewö.

18 Jisösnöŋ dopkeu kun kewö jiyök, “Anutugö bemtohoŋaŋgö könaŋi mi denöwö? Mi wanatpuk dop albileŋak? 19 Mi nejoŋ kötŋaŋgö dop kewö akza: Azi kunŋan mi memba nupŋe anda esiiga wahöta qariba ip ahök. Ip aiga könakemba neiŋi neiŋi mieŋön aipŋini ip miaŋgö böröŋe alget.” Mewö.

20 Jisösnöŋ dumŋe kunbuk dopkeu kun kewö jiyök, “Anutugö bemtohoŋi mi wanat yuaibuk dop albileŋak? 21 Mi yist me flaua mem qariqarigö dop kewö akza: Ambi kunŋan ‘Beret ohomam,’ jiba yist memba flaua könde karöbut miaŋgöreŋ mindiriba meleŋqeleŋ aka anda anda tari körekŋanök qariyök.” Mewö.

22 Jisösnöŋ anda taonŋi taonŋi aka miriŋi miriŋi miaŋgöreŋ Buŋa kusum eŋgiba anda mala Jerusalem sitinöŋ göröken anök. 23 Ani kunŋan kewö qesim waŋgiyök, “Kembu, uruŋini meleŋget Anutunöŋ amöt qem eŋgii letotmei, mi ambazip awamdökŋa me denöwö?” Qesim waŋgii kewö jii mötket,

24 “Iŋini mönö naŋgu giwikŋe aŋgotpingö jaram tiba aum-mörime. Nöŋön kewö jibi mötket: Ambazip gwötpukŋan Anutugö bemtohoŋ uruŋe aŋgotpingö esapkömemö, mi osime. 25 Könaŋgep miri toŋan wahöta naŋgu köligun iŋini nalö miaŋgöreŋ könahiba yaigep kinda naŋgunöŋ qeba kewö jime, ‘Kembu, mönö naŋgu öröm neŋginöŋ.’ Mewö jigetka meleŋda kewö jii mötme, ‘Ni qahö möt eŋgizal. Iŋini denikegöra, mi qahö mötzal.’ 26 Mewö jiiga iŋini miaŋgöreŋök könahiba kewö jime, ‘Neŋön mönö göbuk köisirik tata nene nein. Göŋön mönö liliköba neŋgö sombemnöŋ Buŋa kusum neŋginöŋ.’ 27  * Sum 6.8Mewö jimemö, yaŋön keu kewö jima, ‘Iŋini denikeaŋgöra, ni qahö möt eŋgizal. Miaŋgöra kewö jibi mötket: Bölöŋi meme pakpak, iŋini mönö nömosöta kesalget.’

28  * Mat 22.13; 25.30* Mat 8.11-12“Kesalgetka miaŋgöreŋ Abraham, Aisak, Jeikob aka kezapqetok ambazip pakpak yeŋön Anutugö bemtohoŋ uruŋe kingetka eŋgekŋemö, nanŋini aköm eŋgigetka yaigep kinme. Könaŋini mewö miwikŋaiba sahöt gigilahöba irimŋini yöhözömgögetka qetŋi qeri malme. 29 Ambazipŋi ambazipŋi mi wehön kotkotŋeyök aka gegeŋeyök aka likeplikep Not Saut miaŋgöreŋök kaba Anutugö bemtohoŋnöŋ aŋgota dum tatatŋini memba nene nem söŋgaip aka malme. 30  * Mat 19.30; 20.16; Mak 10.31Mewö malmemö, mötket! Qöndökŋi yeŋgöreŋök tosatŋan mutukŋi akŋe aka mutukŋi yeŋgöreŋök tosatŋan qöndökŋi akŋe.” Mewö.

31 Nalö miaŋgöreŋök Farisi (Köna keugö kapaŋkölköl) tosatŋan Jisösgöreŋ kaba kewö jiget, “Kiŋ Herodnöŋ guhui kömumangö mötza. Miaŋgöra mönö miri ki mosöta anman.”

32 Jigetka kewö meleŋ eŋgiyök, “Iŋini mönö arökŋaŋgö kiam soŋ mi kewö jiget mötma, ‘Mötnöŋ! Nöŋön merak aka uran ömewöröme eŋguataŋgömam aka kawöl ambazip mem ölöwak eŋgiba malmam. Anmami, uruwale mönö miaŋgöreŋ aŋgota nupni mekömam.’ 33 “Kezapqetok ambazip sehisehiŋi mi Jerusalem sitinöŋ eŋgugetka kömuget. Miri tosatŋe qahö toroqeba eŋguget kömumakze, miaŋgö tandöktandök ahöza ekzal. Miaŋgöra nöŋön merak aka uran uruwale köna anda malmam. Jerusalem aŋgotpiga nuŋguget kömumam ewö, mönö yeŋgöreŋ aiakaŋina mi toroqeba akŋe.” Mewö.

34 Jisösnöŋ jiyök, “O Jerusalem Jerusalem, iŋini kezapqetok ambazip eŋguget kömugetka Anutunöŋ ambazip melaim eŋgii eŋgöreŋ kamakzei, mi kötnöŋ kumbuköm eŋgimakze. Poi namŋan moröurupŋi ginginŋi bapŋe ala köjöjohom eŋgimakzawi, nöŋön miaŋgö dop nalöŋi nalöŋi göhö könagösöurupki suhuba tokom eŋgimamgö möta malalmö, iŋini mi tököba mala kotket. 35  * Sum 118.26; Jer 22.5Mötket! ‘Anutunöŋ mönö jike miriŋini andö qeiga sahopŋanök ahöma.’ Mewö ahömapmö, nöŋön kewö jibi mötket, iŋini ni kunbuk qahö nekŋemö, könaŋgep nalö kun kam kuŋgui miaŋgöreŋ neka kewö jime, ‘Kembugö qetŋe kam neŋgizawi, Anutunöŋ mönö i kötuetköm waŋgima.’ Mewö.”