1 Nalö tosatŋi teköiga Naominöŋ iranŋi Rutkö muewö zöyök: “O böratni, ni ölip aiwi kun batököwa miwikŋaiwiga galim köl gihiiga yaŋguk sösöŋgai qakŋe köhömgi nangöhök tatman. 2 Gi nup meme anbi yenguk mösölatiwa malnöŋi, yengö galimŋini Boaznöŋ mönö nanini tinitosolomnina halza. Mötnöŋ, yaŋgön erap suŋgem baliqeqe sombemnöŋ gewa bali hölŋi hala kamböŋi mendeŋ etkimamgöra sapak keriŋaŋguknöŋ humba qöröreŋgöwa kewötma.

3 Miaŋgöra gi mönö dölmuhu ou ariwa selegi kelök umköhöwakŋaŋguknöŋ miriwa opo sirigi löŋgöta baliqeqe sombemnöŋ geman. Emu gemanöŋ, mutuk tikep malnöŋga numbu neneŋi hala ougisipŋi nem dariga miaŋgö andöŋe ölip yaŋgö jeŋe hikŋainöŋga geikma. 4 Gawöngö möta heta denike höl köla ahömawi, mönö miŋgi ekta miaŋgöreŋ anman. Kölközizip gihimapköra qesimani, miaŋgö kaisöpsöpŋi mönö muewö halman: Gi yaŋgö qöhöröŋe anda könaŋe göröken esu kitipŋi menöŋ wahöriga gewa ahöman. Mewö ahönöŋga miwikŋaim gihiwa denöwö halmani, mihi gezöiga mötman.”

5 Iranŋan mewö zöiga Rutnöŋ muewö meleŋnök: “Keu patpat zözani, nöŋgön mihi ölip hal datmam.”

6 Mewö meleŋda baliqeqe sombemnöŋ gewa iranŋan zöm qitim waŋgiyöhaŋgö söwök muewö hal teköyök: 7 Boaznöŋ suŋgem numbu neneŋi hala ougisipŋi nem dari kip seleŋi mem kolihiiga wahöta bali kirip kungö göraŋe gewa gawön ahöyök. Miaŋgöreŋ ahöiga Rutnöŋ ölöŋ zaŋ qemba anda könaŋe göröken esu kitipŋi mei wahöriga miaŋgöreŋ gewa ahöyök. 8 Ahöiga suŋgem hömbiwiŋe iwai kungöra outupŋe tiiga imbiŋi möta eleŋda anbi kun könaŋe ahöyöhi, mihi miwikŋaiwa ekta hauruyök.

9 Hauruwa qesim waŋgiyök: “Gi dahön?” Qesim waŋgiiga muewö meleŋnök: “O ketaŋamni, ni Rut, göhö welenqeqe anbia. Göhön nangi isikaŋgö sohopŋi meme aiwia halzan. Miaŋgöra Juda engö ambamemeŋini wuataŋgöwa ni ölip galim köl niŋgiwa esugan turum niŋgiman.”

10 Mewö meleŋniga muewö zöyök: “O böratni, Kembunöŋ mönö kötuetköm gihima. Gi ölip aiwi wanapŋi me pomŋi sukinapŋinaŋguk yengö andöŋine anbanaknöŋ, mewö qahö halzan. Gi walahok isikurupni ölip naŋgöm eŋgiwa malnöŋa erap mihi oŋgita silik ölip sorokŋi halzan. 11 O böratni, gi mönö torok de hala bönjöŋ malman. Gi anbi ölip sorokŋi halzani, miŋgi taongö anbazip körekŋan ölip mötze. Miaŋgöra gi ikö me waikö qesim niŋgimani, nöŋgön mihi ölip hal teköm gihimam. 12  * Rut 2.20Ni göhö tinitosolomgi hala galim köl gihimamaŋgö söp halzal. Keu miŋgi hölŋapnöŋ, aiwi kunöŋ nöŋgö isiknaŋgö sohopŋi meme aiwi bohonŋi halza. Nöŋgön yaŋgö qerembeŋi miyök malzal. 13 Mewököra ölip suŋgem muhu muewö ahöman. Sohop meme aiwi bohonŋan uran bohongi memamgö zömbawak ewö, mihi ölipnöŋ, bohongi memamgö qahö mötma ewö, nöŋgön ölip bohongi memam. Keu mihi jöhöwa Kembukö qetŋe jöjöpaŋ keunöŋ zöm köhöizal. Miaŋgöra ölip bönjöŋ ahönöŋga söŋan halma.”

14 Boaznöŋ mewö zömba anbi kunöŋ baliqeqe sombemnöŋ yaŋgöreŋ heröhi, kunŋan mihi mötpakuköra mörök. Miaŋgöra Rutnöŋ Boazkö könaŋe heta ahöyöknöŋ, waŋgeraŋ suluiga nalö miaŋgöreŋok kunŋan i qahö ek qitiiga ölöŋ anmapköra wahörök. 15 Wahöriga Boaznöŋ muewö zöyök: “Mönö malukugi selegeyök meköwa merereŋgöwa memba kinöŋ.” Mewö zöiga meköwa memba kiniga bali kötŋi 25 kilogramgö söp kewöta mokoi geyök. Geiga memba köbibihiwa Rutkö hawötŋe haliga haŋguwa liliŋgöwa taonöŋ anök.

16 Rutnöŋ mewö taonöŋ anda iranŋaŋgöreŋ aŋgoriga muewö qesiyök: “O böratni, denöwö mala kazan?” Mewö qesiiga Boaznöŋ yaŋgö iwai patpat halöhi, miaŋgö sundutŋi zöi mörök.

17 Möriga muewö toroqemba zöyök: “ ‘Gi irangaŋgöreŋ biribörak de anman,’ zömba bali muŋgu niŋgiza.”

18 Mewö zöiga Naominöŋ muewö zöyök: “O böratni, aiwi miaŋön erap in luhut qahö memapnöŋ, keugi galim köla maliga mihi mindiŋgöget teköiga miaŋgö andöŋe ölip tata luhut mema. Miaŋgöra gi mönö ösöŋ mamböta tata keugi denöwö zögetka hikŋaimawi, mihi mötman.” Mewö.