2
1 Arinai nuayalayala, eo abi borabora, eo ao‐labui, eo aiaromagigiri, eo ribariba baaea, maudoina au torehesuaradi. 2 Doha kaimou se labasi harihariudi, susu mamohoina taba au henua mo, iaede ribana, debana eai abo emi mauri eai au tubu; 3 ena taba Guiau ena aiainauia au aiitayao.
4 Au laoma ia arinai, doha we’u maumaurina arinai, mamohoi tatao ia se otaotaei, na Eaubada ia i abihineriyao, lolo‐dumadumana. 5 Omi hinage se abimiu doha we’u maumauridi, se tarini’sinimiu numana omi, earuana eai, eo kohena tabuna tataomiu, bena earuana eai aitalasam au helelelaei, iaede Eaubada i henua ariri wa, Iesu Keriso debana eai. 6 Doha uriuri tabuna eai si ene:
“Au ita, Sion eai kona‐we’una ea hetoro, hilehileina, maisa lailai‐aririna,
Esau ena i awamamohoiei, taba nige i maee.” (Is. 28.16.)
7 Omi tauataataiena arimiu eai ia i lolo ariri, doha ginauri maisa lailaina, na tau‐awayagara aridi eai,
“We’una wau tau‐abinuma se otaotaei wa
iaede i hemala we’utau, kona uruuruna eai se hetoro.” (Ps:. 118.22.)
8 eo
“We’u aba‐alabesibesina eo
tatao edi aba‐beu, we’utau eai ta;” (Is. 8.14-15.)
arinai tatao se alabesibesi, paana se awayagara, edi dobila ina, enadi se nuatuiyao.
9 Na omi ede tatao, se hinerimiuo, kohena se awawasawasaei, basileia tabuna, tatao Eaubada enanayao mamohoi, bena ena abi noonoodi au hemahemasarahadi, ia masigiri eai tau‐eogahaimiu wa ena mara nabunabutuana arinai au lulage. 10 Beabeana eai wa omi nige bodamiu, na huia ta omi Eaubada ena boda tataomiu; nabada wa ena nuatoatoa nige au hearo, huia ta nuatoatoana abo au hearo.
11 Egu nuanuai e, ea awanorimiu ta, doha omi taulaolaoma mo, tanoubu eai ta tau‐adaadau mo, bulumamiu gadosisidi aridi eai au nuahiuioimiu, isi ede earuada tau‐iaialaidi. 12 Emi miamia Murimuri‐tataodi boeadi eai bena se masaraha, ata se riba‐baaeaimiu doha omi taulaulau‐baaea, taiede sora huia baaea se hearo abo Eaubada se hedebasaei, paana emi laulau lolodi se itadio.
13 Tatao edi laugagaeo gamagaridi au awaabiedi, Guiau debana eai, ena king arinai, ia wasawasana i sae ariri ede, 14 e gavana i tauribaedi wa, bena tau‐laulau‐baaea se hemaisadi eo tau‐abilolo se hedebasaedi. 15 Paana Eaubada ena nuatu ina, bena omi laulau lolo eai tau‐eauyaure edi supusupu eai abo au abihemonoudi. 16 Omi doha tatao se iairihaimiuo, ia mo emi iairihai tabu i hemala laulau baaea aba‐woeoina; na doha Eaubada ena heaheari eai au laulau. 17 Tatao gamagaridi au heasisiedi. Eda bogao tataodi au gadosisiedi. Eaubada au matausiei. King au heasisiei.
18 Tau‐heaheari e, ami tanutanuagayao bena au awaabiedi, ma‐matausimiu, nige tau‐abilolo eo taumanabiga isibom na isi tau‐oiura wa au heasisiedi hinage. 19 Paana teina arinai aitoina ede, ena tau esau ena nuatu Eaubada arinai debana eai amamna i hearo eo se heporohe gaibui. 20 Paana ena emi ponori debadi eai se lubilubimiu na au taubiga mo, haedi hedebasaena? Na ena taba ami paisoa lolo eai se heamamnagaibuimiu, na au taubiga mo, temeta arinai Eaubada nuana i lolo. 21 Ina dobila eai ta se eogahaimiu ede, Keriso ia hinage amamna enada i hearo, iilana i laugabaei eda tautau, bena omi ae‐munana eai au hemuriwatai. 22 Ia nige baaea i ginauri, awana eai nige borabora esau se lobai. 23 Huia ne se riba‐baaeai, riba baaea nige i heuio; amamna i hearo nige i riba‐hematausi; na iabom i toreuioi ia wa tauhedudurai duduraina nimana eai. 24 Ia eda baaea i baheidi, iabom tauna eai, oeagi ewana eai wa, bena ita baaea ena tupo eai ta mate, eo laulau‐dudurai ena tupo eai ta mia. Ia gaina eai se helolomiu. 25 Omi nabada aue gege doha mamoe, na au uiomao ina earuamiu edi Mamoe‐tauitawata arinai, eo Tauwoeaidi arinai.