4
Heaeai paisoana: mamohoina, eo ena paa.
1 Ai paisoa ta ena heaheari tataomai, Eaubada ena nuatoatoa tauhearona, ai taba nige nuamai se beruberu. 2 Laulau headi taumaeamaea debana eai ta toreyamuidi, meta ai ribagabaedio; nige borabora eai ai laulau eo Eaubada ena riba nige ai hepaisoa ponori, na mamohoina ai hemasaraha, ai moseuioimai tatao aridi eai, eo esa, esa ena nuatu abaheduduraina nuaboeana eai, Eaubada matana eai. 3 Ena ema evanelia se woeoi, isi taumatemate mo matadi eai se woeoi. 4 Paana tanoubu ta eaubadana isi nige se sunusunuma wa matadi i hegibudi, bena Keriso ena namanamari evaneliana marana tabu i sinaidi, iaede Eaubada tautauna. 5 Nige aibom wasamai ai lauguguiai, na Keriso Iesu ia ede Guiau, eo ai, emi heaheari tataomai, Iesu debana eai. 6 Paana Eaubada ena riba wa i ene, “Masigiri eai marana abo i sinama,” ia ede nuada eai i sinao, Eaubada italobaina marana namanamarina i leamao, Keriso ana ao eai.
7 Na ina eda gogo saesaena ta gulewa tano eai se ginauri, arinai ta abiabini, bena gigiborina lailai‐aririna Eaubada arinai i laolaoma, nige ita arida eai.
Heaeai paisoana: ena amamna.
8 Tupo gamagari eai se hesahesabaimai, ia mo nige i heoitawaimai; nuamai se ponopono, ia mo nige nuamai se beruberu; 9 se heamamnamai, ia mo nige i nuagabaemai; se oihegurimai, ia mo nige ai baaea; 10 huia gamagari taumai eai Iesu ena mate ai bahei bena taumai eai Iesu ena mauri i masaraha. 11 Ai ma‐miamai huia gamagari se mosemoselaemai mate arinai, Iesu debana eai, bena Iesu maurina hinage i masaraha bulumamai eai. 12 Arinai ai boeamai eai mate i paipaisoa, omi boeamiu eai mo mauri.
13 Sunuma earuana aie abi, gonogonoana doha uriuri eai se ribaei, “Ea awamamohoi, arinai ea ririba,” (Ps. 116.10) ai hinage, ai awamamohoi arinai aie riba, 14 ai nuatuiyao ia Guiau Iesu i hetorouioi wa, ai hinage abo i hetoroesegaimai, maemai Iesu, omi hinage maemai, abo i woeaesegaida ia nuanuana eai. 15 Paana ginauri gamagaridi omi debamiu eai se tubu, ainauia abo i tadada tatao gamagaridi aridi eai, abo lautoina hinage i tadada, Eaubada aba‐hedebasaena.
16 Arinai taba nige nuamai se beruberu. Murimurimai tauna i tatatagorigori, ia mo boeamai tauna i heharihariu, asubena to asubena. 17 Ema amamna mamaladi huia kuukuu mo ai hearodi ina, namanamari nonoina lailaina taba nige ta ribaei, i lau e nige nosina, enamai i abiabinonohai. 18 Nige ai itaitalau ginauri masamasarahadi mo aridi eai, na matamai se lau ginauri tautauyamuidi aridi eai; paana ginauri ta itaitaidi isi ede ina huia ta enana, na ginauri nige ta itaitaidi isi ede huia i lau e nige nosina enana.