1 Na Eaubada Noa i nuatui, eo suisui gamagaridi eo bulumakau gamagaridi ia maena ake eai wa. Abo Eaubada mana i hetoa tanoubu eai, abo goila i hetubu ie dobi; 2 edi aba‐ota gabotum lailaidi eai wa, eo galewa tomlapaidi wa, se gududi, nabu galewa eai se abi‐nuahi. 3 Eo huia gamagari magu tanoubu eai i hetubu i laulau. Asubena handere esega eo tatao‐labui‐se‐mate‐saudoudoi adisiga eai goila se dobi’o. 4 Eo nawalai hehaligigi‐labuina eai, nawalai asubenana hesaudoudoi‐haligigi‐labuina eai, ake wa ie otadobi Ararata oea tupidi eai. 5 Goila wa i dobidobi i lau e nawalai hesaudoudoina eai, nawalai asubenana bagubagunana eai, oea tupidi abotai se taumasaraha.

6 Asubena tatao‐labui‐se‐mate muridi eai Noa ake i ginauri wa tomlapaina ie soe. 7 Ao’ao i heloi; ie loi sae, ie loi dobi i lau e goila tanoubu eai se guma’o. 8 Abotai bunebune esau i heloi, bena i ita, goila tanoubu eai se guma’o e sora. 9 Na bunebune wa aena nige ena aba‐toa i lobai, arinai ie uioma ake eai, paana goila wa sorana tanoubu maudoina potana eai. Arinai nimana i helele, bunebune wa i abiuioi ia arinai, ake alona eai. 10 I bagibagiuio asubena haligigi‐labui se lau’o, abotai bunebune ake eai wa i hetamariuioi. 11 Maimailahi eai bunebune wa i uioma arinai, to ne, awana eai olive luguluguna harihariuna ie losi arinai Noa ie ita, omihede goila se guma’o tanoubu eai. 12 Abo i bagibagiuio asubena haligigi‐labui headi se lau’o bunebune wa i heloiuioi, na nige i uioma ia arinai.

13 Borimai handere hehaligigi‐esegana eai, nawalai bagubagunana asubenana bagubagunana eai, goila se guma’o tanoubu eai; Noa ake atohina abo i abihai, i italau tanoubu ana ao ie ita, i pitari’o. 14 Nawalai helabuina eai, nawalai asubenana tau esega‐i‐mate‐haligigi‐labuina eai, tanoubu abo i pitari mamohoi. 15 Abo Eaubada i ribalau Noa arinai, i ene, 16 “Ake me u pesagabaei, oa ma monem, ma nanatumyao, ma nanatumyao monediyao maemyao. 17 Ginauri maumauridi arim eai wa, buluma maudoina u woea‐hepesadi, manu, suisui, ginauri daladalausidi tano eai taudaladalausi wa, bena tanoubu eai ta se hegamagariuioidi, eo au ua, au gamagari tanoubu eai ta.” 18 Arinai abo Noa ie pesa, ma nanatunayao, ma monena eo nanatunayao ma monediyao. 19 Eo suisui gamagamagari, eo ginauri se daladalausi, eo manu udoi udoi, eo ginauri saha tanoubu eai ta se moimoiu, ma bodadi ake se pesagabaei.

20 Noa abo aitalasam hatahatana i hetoro GUIAU arinai, eo suisui aa’aadi udoi udoi wa, eo manu aa’aadi, esega esega i abidi ena aitalasam hatana eai i gabudi. 21 Abo pane lolona GUIAU i ataiei, to GUIAU ia nuana eai i ene, “Taba nige huia esau tano ea ribahemateuioi tau debana eai, paana tau nuana kamanina i baaea mo, ma hewarina eai i laoma; taba nige huia esau ginauri maumauridi gamagaridi ea hebaaeauioidi, doha ea ginauriyao wa. 22 Tanoubu ma otana eai, umauma huiana eo masuri huiana, huia gogoma eo huia gigibori, huia siwaro eo borimai, taba nige se lautom.”