48
Iakobo Eparaima eo Manase i Ribahelolodi
1 Eawalana ie lau, esau Iosepa i heriba i ene, “Tamam i asiebo.” Arinai nanatunayao labui Manase eo Eparaima i woeaidi maenayao. 2 Abo esau Iakobo i heriba, “Natum tau Iosepa i laolaoma.” Arinai Isaraela i headidiriuioi, eo ie bawa aba‐eno potana eai. 3 Iakobo hinage i ribalau Iosepa arinai enaba, “Eaubada Gigibori‐aririna i taumasaraha arigu eai Lusa eai, Kanana tanona eai, eo i ribahelologu, 4 hinage i ribalaoma arigu eai i ene, ‘Mamohoi abo uauam ea helai eo ea hegamagari, eo arim eai tatao moutuana lailai: ina eanua ta abo ea mosei am isimurita enadi i lau e nige nosina.’ 5 Abo nanatumyao tatao labui Eparaima eo Manase, Aigupito eai se labasidi enam sora nige ea laoma Aigupito eai, isi abo enaguyao. Gonogonoana doha Reubena eo Simiona isi hinage enaguyao. 6 Murina eai nanatumyao headi u abidi, isi abo enamyao abo edi tataoyao esadi u torelaei aridi eai, eo maraitom asubena edi gogo hinage. 7 Na eau mo, huiana wa Padana eai ea laoma, Rahela i odalele gegesigu eai Kanana dimona eai, Eparata hanahanauna eai, abo nei eai ea tore, Eparata, ia ede Betelehema, dobilana eai.”
8 Abo Isaraela Iosepa nanatunayao i itadi i ene, “Isi ede aidimodi?” 9 Iosepa i ribalau tamana arinai enaba, “Isi ede nanatuguyao tatao, aridi eai Eaubada i ainauiaigu ina eanua eai ta.” To i ene, “U woeaidima abo ea ribahelolodi.” 10 Na Isaraela matana se gaugau paana i tautaubadao, to nige i ita komakomani. Arinai Iosepa i woeaidi ia gegesina eai, abo i alagoiedi eo i haitalagadoidi. 11 Abo Isaraela i ribalau Iosepa arinai i ene, “Nige abina ea ata abo am ao ea itauioi, na Eaubada nanatumyao hinage i heitagu.” 12 Arinai Iosepa i abihaidi nuanuana eai, eo i duludobi, ana ao ie dobi tano eai. 13 Eo Iosepa i abilabuiedi, Eparaima nima tutuna eai ie abi i torelaei Isaraela tupo seuseurina eai, abo Manase ie abi nima seuseurina eai ie tore Isaraela tupo tutuna eai, i woeaidi gegesina eai. 14 Abo Isaraela nima tutuna i helele i torelaei Eparaima uruna eai, ia tau murita wa, eo nima seuseurina ie tore Manase uruna eai, i nuatu dudulai arinai doha meta nimana i toredi, paana Manase ia taubaguna. 15 Iosepa hinage i ribahelolo, i ene,
“Eaubada, ia matana eai tamaguyao Aberahama eo Isaako se laulau,
eo Eaubada ia i heaigu egu mauri huiana eai i laoma e ina asubena ta,
16 Aneru wa ia baaea maudoina eai i abihemaurigu, ina merumeru ta i helolodi;
esagu eo tamaguyao Aberahama eo Isaako esadi abo enadi;
eo abo se hemala moutuana lailai tanoubu eai ta.”
17 Huiana eai wa Iosepa ie ita tamana nimatutuna i toresae Eparaima uruna eai, nuana i hebaaea to i abihai abo i torelaei Manase uruna eai. 18 Abo Iosepa i ribalau tamana arinai, i ene, “Tamagu, taba nige doha meta paana ina ealahou tau ede; nimatutum u torelaei ia uruna eai.” 19 Na tamana i otaota i ene, “Abina ea atao, natugu, abina ea atao, ia hinage abo i hemala boga lailai, eo ia hinage abo ie sae; na mamohoi ana taumurita abo i sae ariri, eo pesipesinayao abo se hemala basileia gamagamagaridi.” 20 Nei asubenana ne i ribahelolodi i ene,
“Omi esamiu eai abo Isaraela tataodi se ribahelolodi si ene,
‘Eaubada i hetoromiu doha Eparaima eo Manase’ ”;
arinai Eparaima i hebaguna, eo Manase i hemurita. 21 Abo Isaraela Iosepa arinai enaba, “Egu mate i hanahanauma, na Eaubada abo maem, eo abo i woeauioim tamamyao edi tano eai. 22 Hinage em tataoyao nige enadi, na oa mo arim eai oea esau ea ainauiaim, Amore tataodi aridi eai ea girihai egu alahia eo egu pidu aridi eai.”