1 Arinai ginauri wa ta ataiedio, i lolo ta ataieididinidi, ata ta buigabaedi abo ta sapurihai. 2 Paana ena riba ta, aneru se bahei wa, mamohoina ede, eo laugagaeo utusina gamagari, eo awayagara, abo se hemaisadi nonoina duduraina eai, 3 ita haedi abo eda aba‐dago, ena mauri lailai aririna ta ta nuagabaei? Guiau awana eai se hemasaraha‐bagunai, abotai ia ena riba tauataiena se hemasarahama ita arida eai; 4 Eaubada hinage hemasarahana eai i saguidi, heiheinoi eo noo se tubu, gigibori udoi udoi, eo Earua Tabuna ena ainauia eai, i soieyama wa iabom ena nuatu eai.

5-6 Tanoubu esau matada eai wa, ta ribaribaei wa, nige aneru i mosedi se tanuagai. Na haedi se ribaeyao si ene, “Tau ia saha, to u nuanuaiei? E tau natuna, to u bobodiei? 7 Tau u hetubu, ena abatoro u mosei, i sigidobi begana aneru ubudi eai, hedebasae eo heasisi arinai u hekorona, eo u hetoro nimam paisoadi i tanuagaidi. 8 Eo ginauri gamagaridi u toredi aena ubuna eai, ia bena se awaabiei.” (Ps. 8.4-6.) Ginauri gamagaridi tau nimana eai i toredi, ia mo nige ginauri esau Eaubada awaabina murimurina eai i toro. Abo ina ta sora nige ginauri maudoina ta ita i tanuagaiheohi. 9 Na Iesu ta iita, huia kuukuuna ena abatoro ede aneru ubudi eai, mate amamnana debana eai ia se hekorona, se hedebasaei eo wasana i lolo, Eaubada ena ainauia eai ia mate i aiitayao, tatao gamagaridi enadi.

10 Doha i dudurai, ia wa debana eai ginauri gamagaridi se tubu, eo ginauri gamagaridi enana se hetubudi, nanatunayao se gamagari ariri bena i woeaidima iabom namanamarina boeana eai, arinai edi mauri tauedabagunaena wa i helolo‐dumadumai, amamna debana eai. 11 Tauhetahetabu eo isi wa se hetahetabuedi, gamagaridi paadi esega. Arinai ede nige i maee esadi i ataidi ia ana bogaoyao mamohoi, i ene, 12 “Abo esam ea ribahemasaraha egu tataoyao aridi eai, oigogo boeana eai abo ea wana eo ea hedebasaem.” (Ps. 22.22.) 13 Eo i ribauio i ene, “Ia abo ea sunusunumaei.” Eo hinage, “Hage au ita, eau ma‐nanatuguyao ta, isi wa Eaubada i ledima arigu eai.” (Is. 8.17-18.)

14 Doha merumeru tamadiyao bulumadi eo osinadi se abi tupona, ia hinage doha, ena tupo maeda ie abi, bena mate dobilana eai ia wa mate gigiborina ie abi nimana eai wa, abo i unui, iaede diabolo. 15 Eo isi gamagaridi wa, edi mauri asubenadi maudoina eai mate matausina i auauidi, bena i iairigabaedi. 16 Mamohoi, ia nige aneru i abidi i hepaisoaidi, Aberahama pesipesinayao mo. 17 Arinai i aipate ginauri gamagaridi aridi eai maena tataoyao abo adi ao esega, bena i hemala edi kohena saesaena, enadi tautoro, taunuatoatoa ia, eo nuana i tore‐esegai, Eaubada ena dobila eai bena i woeaidi, eo tatao edi baaea maisana ia i hedudurai. 18 Paana ia amamnana i abiyao, noho i hearoyao, arinai ede abina i ata tatao edi noho eai i saguidi.