1 Sunuma iaede ginauri ta eoowataidi adi ao ta itadio, eo ginauri sora nige ta itadi eda abaitalobaidi ede. 2 Debana eai ede tamadayao mumuga eai wasadi se lolo. 3 Sunuma debana eai ta nuatui tanoubu ta se hetubu, Eaubada ena riba eai, arinai ginauri ta itadi nige ginauri masamasarahadi aridi eai se tubuma.

4 Sunuma debana eai Abela ena aitalasam Eaubada matana eai i lolo ariri, nige doha Kaina enana, arinai ede ia se ribaei i dudurai, eo ena aiainauia Eaubada i henua; arinai hinage ia ie mate, taiede sunumana debana eai ia sora ma‐ribaribana. 5 Sunuma debana eai Enoka se abiisini galewa eai, arinai ia mate nige i ita; ia nige se lobai paana Eaubada i abi’siniyao. Paana ia sora nige se abi’sini, wasana ede ina: Eaubada nuana i helolo. 6 Na ena taba sunuma nige’e, ita nige abina ta ata Eaubada nuana ta helolo. Esa bena i laoma Eaubada arinai, abo i sunusunumaei ia mamohoina, eo tauyooina ma‐nuaadidirina ia abo i ainauiai. 7 Sunuma debana eai Noa Eaubada matausina nuana i dudui, ake i abi‐nonohai, paana ginauri sora nige se tubu Eaubada i ribahesanapuei abo se tubu, arinai ena numa tataodi i hemauridi, arinai tanoubu i hegiru, eo i hemala laulaududurai sunuma debana eai tauabina esau.

8 Sunuma debana eai Aberahama nei huiana ne se eogahai wa, i awaabi, i torohai eanua esau hesabana, bena abo i abi ena eanua; i torohai nige i nuatui haedi i laulau. 9 Sunuma debana eai i hemala taumiahai ribahesunuma eanuana eai ta, doha eanua udoi eai i miamia enana tahunuana nige’e, apa lulu eai se ginauridi i miamiaidi, Isaako eo Iakobo hinage doha, ia maenayao wa ribahesunuma esegana tauabina. 10 Eanua esau mo i itaitalau arinai, paa adiadidirina potana eai se abihetoro, tauginaurina, tauhetubuna, iaede Eaubada. 11 Sunuma debana eai Sara hinage ena adidiri i lobai, i sinesinebada‐aririo, taiede natuna i labasi, paana tauribahesunumaena wa i sunumaei ena riba abo i hemamohoiei. 12 Arinai tau esega mo, eo ia gonoana doha i mateo, ia mo ia tauna eai moutuana se tubuma, gamagarina doha galewa iporadi, e doha geregere, gabogabo hasarina eai, taba nige ta hasiridi.

13 Ina gamagaridi ta ma‐sunusunumadi eai se mate, ribahesunuma wa aniodi sora nige se lobaidi, na eda lohaloha eai mo se itadi eo se kode, eo se ribahemasarahauioidi, isi tau‐laolaoma mo, tau‐adaadau mo tanoubu eai ta. 14 Paana riba doha ina tau‐ribaena se hemasaraha‐auri si ene edi eanua tahunuana se eooeooi ede. 15 Mamohoi ena isi eanua beabeana arinai se laoma wa se nuanuatu‐daoiei, taba hinage edi sorasora se lobai se uio arinai. 16 Ia mo isi eanua esau se henua, lolo‐dumadumana, iaede galewa eai. Arinai Eaubada nige i maee ia esana se ribaei edi Eaubada, paana edi eanua‐saesaena ia i abinonohaiyao.

17 Sunuma debana eai Aberahama nei huiana ne ia se lauita wa, Isaako i moselaei, ribahesunuma tauabina wa abotai natu‐eseesegana i mosegabaei ena aitalasam, 18 ia wa se ribaei si ene, “Isaako arinai abo am isimurita se eogaidima.” 19 Ena nuatu i ene Eaubada abina ie ata mate eai natuna taba i hemauriuioi; arinai mamohoi, doha mate eai i abiuioi tautauna. 20 Sunuma debana eai Isaako ena riba‐hewoiwoina i mosei Iakobo eo Isoa, ginauri sora nige se tubu arinai i hemasarahadi. 21 Sunuma debana eai Iakobo, huia ne ena mate i hanahanaumao, riba‐hewoiwoina i mosei Iosepa nanatunayao labui aridi eai, ena tue eai i duihasari, i aihelahui. 22 Sunuma debana eai Iosepa hinage ena huia i hanahanau wa, Isaraela nanatunayao edi torohai i ribanonohai, eo i lauhesomdi Aigupito se laugabaei bena ia siadana abo se bahelaei.

23 Sunuma debana eai Mose, nei huia ne se labasi wa, nawalai haiona tamana eo sinana ia se toreyamui, paana se ita merumeru lolona; wasawasa ena laugagaeo nige se matausiei. 24 Sunuma debana eai Mose, huia ne i taulailaio, nige i henua esana se atai Parao natuna‐sine natuna, 25 i henua mo besi ia se abi‐baaeaei, Eaubada ana bodao tataodi maediyao, nige i henua huia kuukuuna baaea i lauheamna. 26 Ena nuatu i ene Keriso hetaumaeamaeana meta mo gogo saesaena, Aigupito ena ginauri lolodi nige se lolo doha, paana i itaitalau mo ainauiana matana eai. 27 Sunuma debana eai Aigupito i nuagabaei, wasawasa ena ouyalayala nige i matausiei; i samasamadudu mo, doha ia wa taba nige ta ita, iaede matana eai i itaitai. 28 Sunuma debana eai pasova mataasina i hetubu, heiheinoina wa osina i lausibuei (numa gududi eai) natu‐ealahou tauunuidi wa taba nige i abilau enadi aridi eai.

29 Sunuma debana eai gabogabona esana Buiabuia, arinai tatao se leta‐dobi, doha tano pitapitari eai se awasi; na Aigupito se aipate se hemuriwataidi wa, gamagaridi se galamosi. 30 Sunuma debana eai Ieriko gana‐tonana se urugorigori, huiana ne asubena haligigi‐labui eai se tauhetaiiri. 31 Sunuma debana eai Rahaba, laulau baaea sinena wa, nige i mate helena taumia awaawayagaradi wa maediyao, paana eanua tau‐itasipoina wa i abidi ena numa eai, i labiniedi.

32 Abo riba esana egu riba ea tubei? Huia nige gonoana wasadi ea ribaedi, Gideona eo Baraka, eo Samasoni eo Iapeta, eo Davida eo Samuela, eo peroveta gamagaridi— 33 isi sunuma debana eai basileia se heguridi, dobila duduraidi se hetubudi, ribahesunuma hemamohoiena se hearodi, liona awadi se gududi, 34 oeagi alaalasi ena gigibori se heboso, elepa matamatana se dagogabaei, beruberu boeana eai edi adidiri se lobai, iala eai se nuakipikipi ariri, waiunu edi tauiala bodadi se hetatagorigoridi. 35 Sisine enadi taumate se abiuioidi se mauriuio. Headi amamna lailai eai se hebaaeadi, iairihaina nige se eooi, mauri esau, lolo‐aririna, isi bena se abi. 36 Headi lauita se hearodi, alaliuliua eo pidipidiri, hedeona se paidi hinage, eo se tutuguduidi. 37 Se lauwe’uidi, taudi se seselapaidi, noho se hearodi, elepa eai se unuhematedi; se tautausi gaibu, mamoe opidi eo bokania opidi se luiluidi, paana se gogogesagesa, se hebaaeadi, se heamamnadi— 38 ahani tanoubu nige i lolo, isi mo se lolo — barabara eai se tautausi, oea tupidi eai, aba‐bawayamui eai, tano gudadi eai hinage.

39 Ina gamagaridi ta sunuma debana eai wasadi se lolo, ia mo ribahesunuma aniona mamohoi isi nige se ita; 40 Eaubada dobila lolo‐aririna esau enadi i abinonohaiyao, arinai isi helolo‐dumadumana taba nige se hearo, ena ita maediyao nige’e.