1 Asubena hehaionana eai, Kana Galilaia eai, tawasora mataasina se mataasi: Iesu sinana hinage nei eai: 2 Iesu maena heaheatayao hinage se eogaidi, nei tawasora eai ne. 3 Na waina ie ohi, Iesu sinana ia i heriba i ene, “Nige adi waina.” 4 Iesu ia i heriba, i ene, “Sine e, saha abo u abi arigu eai? Egu huia sora nige i lagema.” 5 Sinana tau heaheari i heribadi, i ene, “Ena saha eo saha i heribamiu, au ginauridi.” 6 We’u ledudi haligigi‐esega se hebawadi, Iudea tataodi edi aba heaa laulauna, lailaidi headi nonoi labui, headi nonoi haiona. 7 Iesu i heribadi, i ene, “Ledu goila eai au inihemonaudi.” Se inihemonauboriboriridi. 8 Ia i heribadi, i ene, “Abo au eai, au laei mataasi tanuagana arinai.” Isi abo se laei. 9 Mataasi tanuagana goila i hemala waina wa i nom‐ita, edi aba eaina nige ie ita, (taupaisoa goila tau eaina mo se ita) mataasi tanuagana tautawasora abo i eogai. 10 I heriba, i ene, “Tatao gamagaridi waina lolona se hegoiauri nonohai: tatao se nomnomdaoi abo waina esau se hegoi, amnana udoi: oa waina lolona u mahihiei, e aboina u hemasaraha ta.” 11 Heiheinoi gigiboridi Iesu i hetubumugaiedi Kana Galilaia eai, arinai ia lolona i hemasaraha: ena heaheatayao ia se awamamohoiei.

12 Wau wa murina eai abo ie dobi Kaperenauma eai ia eo, sinana eo, ena tataoyao eo, ena heaheatayao: nei eai se mia asubena eseesegadi.

13 Iudea adi pasova i hanahanaumao, Iesu abo ie sae Ierusalema eai. 14 Dubu tabuna alona eai bulumakau eo, mamoe eo, bunebune tauunedi i lobaidi: eo moni tauheduhedududi hinage se bawa. 15 Ia maina gagiridi i abidi pidipidiri i audi abo numa tabuna alona eai i aiduiedi murimuri eai, eo mamoe, eo bulumakau hinage, eo moni‐tauheduhedududi edi moni i hegoigabaedi, eo edi hatahata i ahalabuidi. 16 Bunebune tau uneunedi i heribadi i ene, “Teina ginauri au uioidi: Tamagu ena numa tabu bena au abi i hemala emi aba uneune.” 17 Ena heaheatayao uriuri wa nuadi ie sae, doha si ene, “Em numa nuagigiborina nuagu ie gabu.” 18 Iudea tataodi abo se ribalau ia arinai, si ene, “Heiheinoina saha u heitamai, ina laulau ta u laulauei?” 19 Iesu i heuioidi, i ene, “Numa tabuna ta au lopagorigori, asubena haiona abo ea hetorouioi.” 20 Abo Iudea tataodi si ene, “Ina dubu tabuna ta borimai tatao‐labui‐si‐mate‐haligigiesega se ginaginauri: bena asubena haiona mo oa abo u hetoro wa?” 21 Doha tauna ia ede numa tabunana i ribaei. 22 Huia murina eai, mate eai i torouio, riba wa i heribadi wa ena heaheatayao se henuaisini, eo uriuri tabuna se awamamohoiei, eo riba wa Iesu i ribaei.

23 Pasova mataasina huiana eai, Iesu ie lau Ierusalema, nei eai tatao gamagaridi ia esana se awamamohoiei, paana heiheinoi gamagaridi se itadi; 24 na Iesu nuana nige i lauedi, paana ede tatao gamagaridi i nuatulobaidio; 25 nige esau bena tatao nuadi Iesu i heita, paana tau nuana ia abina i atao.