2
Magoi tataodi se lagema bena Iesu se ita.
1 Iesu se labasi wa Betelehema eai, Iudea eai, Heroda wasawasa ena huia eai, tatao sonoga headi tupo aruabu eai se laoma, Ierusalema eai se lage si ene: 2 “Iudea edi wasawasa se labasiyao ia ede haedi? Tupo aruabu eai ena ipola ai itayao, ai laoma ia bena ai aihelahui.” 3 Heroda wasawasa riba wa i ataiei aruana ie loi, eo Ierusalema gamagamagari maenayao; 4 ia kohena lailaidi eo tatao edi tau‐uriuri gamagamagari i heoigogoidi i hetalaidi, Keriso haedi eai abo se labasi. 5 Ia se heriba si ene, “Betelehema eai, Iudea eai, paana peroveta esau ie uri ina doha:
6 ‘Na oa Betelehema e, Iuda oeana eai ta, nige u gagiri ariri wasawasa Iuda aridi eai, paana ede oa guaguam eai Tanuaga abo i laoma, egu tataoyao Isaraela abo i tanuagaidi.’ ” (Mi. 5.2)
7 Heroda sonoga tataodi wa abo i eogamahimahihiedima, ipola edi huia itana wa i oimurikomakomanidi; 8 abo i hetamaridi se lau Betelehema, i ene, “Au lau kaimou wa au eooi komakomani, ena au lobai au uioma au heribagu, abo hinage ea lau ia ea aihelahui.”
9 Wasawasa arinana se ataiei nonohai, abo se lau ipola wa tupo aruabu eai se ita wa, i eda‐bagunaedi, i lau e kaimou wa ena abamia potana eai i alasi. 10 Isi ipola wa se ita abo se kode, se kode ariariri; 11 na se lage numa alona eai, kaimou wa se ita, ma sinana Maria, arinai se tabaohu‐dobi ia se aihelahui. Edi ginauri se abihemasarahadi ia se ainauiai, gold, eo muramurapanepane, eo muro. 12 Enosuai eai Eaubada i ribahesanapuedi tabu se uio Heroda arinai, to se uio edi eanua hari dobila eai.
13 Isi se lauo, na aneru enosuai eai i taumasaraha Iosepa arinai i ene, “U torohai, kaimou me ma sinana u laedi, u dagoedi Aigupito eai, nei eai au mai i lau e abo ea heribam; paana Heroda kaimou me i eooi bena i unui.” 14 Ia abo i torohai, kaimou ma sinana maiona eai i woeaidi, i laedi Aigupito eai, 15 nei eai se mia i lau e Heroda ie mate. Arinai Guiau ena riba i ribaei wa peroveta awana eai, abo se hemamohoiei, si ene, “Aigupito eai natugu‐tau ea eogaiyama ede.”
(Hos. 11.1).
16 Heroda abo i nuatu‐lobai, tatao sonoga omi‐hede se borai, abo i ouyalayala ariri, tatao headi i hetamaridi se lau Betelehema eo se tauhetaiiri, merumeru‐tatao gagiridi se unuidi, isi edi borimai labui, eo gamagaridi hinage edi borimai sora nige se helabui, lahinai i oimuri komakomani wa tatao sonoga aridi eai. 17 Abotai riba wa peroveta Ieremia i ribaei wa, se hemamohoiei, doha i ene:
18 “Rama, eanuana eai dou gurumoana ie sae, se ataiei,
Rahela nanatunayao doudi ie dou,
ia taba nige nuana i biga
paana se tauyamui‐aririo.” (Iere 31.15)
Aigupito eai se uio Nasareta
Lk. 2.39, 40
19 Na huiana Heroda i mateo, Guiau ena aneru Iosepa enosuai eai i taumasaraha, Aigupito eai, i ene, 20 “U torohai, gama gagirina me ma sinana u woeauioidi u laedi Isaraela oeana eai, isi gama gagirina se eooi bena se unui wa se mateo.” 21 Ia abo i torohai, gama gagirina wa ma sinana i woeaidi Isaraela oeana eai se laoma. 22 Ia wasa i ataiei Arekelao, Heroda natuna, tamana i helaudamai, ia ede wasawasa Iudea eai, bena i uio nei eai na i matausi; abo Eaubada enosuai eai i ribahesanapuei, arinai i lausuara Galilaia tehana eai. 23 Ia abo i lage eanua esana Nasareta, arinai se mia, arinai ede peroveta edi riba esau se hemamohoiei, doha si ene, “Ia abo se ribaei Nasanasareta.”