1 Iesu ena heaheatayao saudoudoi‐labui i lauhesomnonohaidi, nei dimo ne abo i laugabaei edi eanua eai bena i lauheata eo i lauguguia.

2 Na, Ioane numa masigiri eai Keriso ana paisoa wasana i ataiei, ena heaheatayao labui i hetamaridi, 3 Iesu arinai si ene, “Ia bena i laoma wa ia ede oa, e esau abo ai eooi?” 4 Iesu arinadi i heuio, i ene, “Au lau ginauri wa au ataiedi, eo au itadi, Ioane au heitauioi au ene, 5 Taumatagibugibu matadi se helaladi, taulaulaudae se tautausi, lepera tataodi se heaadi, tau beado’odo’o riba se ataiei, tau matemate se abihetorodi, eo taugogogesagesa wasa lolona se lauguguiaidi. 6 Taba tau esa, eo esa nige i nuabaaea arigu eai, nuana abo i woiwoina.”

7 Ma laudi, na Iesu moutuadi Ioane ribana enadi i ribahetubu i ene, “Aue lau barabara eai wa saha bena au ita? Didiari esau mana i iuhihe’eoeo? 8 Aue lau saha bena au ita? Tau esau ana lulu bigabigana i lui? hage isi lulu bigabigana se lui wasawasa edi numa eai se mia. 9 Aue lau saha bena au ita? Peroveta wa? Hedeona, ea heribamiu ta, ia peroveta saesaena. 10 Ia ede teina, doha se uri wa si ene, ‘Hage, egu tauwasa matam eai ea hetamarimugaiem em dobila i abinonohai.’ 11 Mamohoi, ea heribamiu ta, isi wa sisine se labasidi nige esau ie toro, Ioane Bapatiso mo ia i saetawatawai ede; na ia galewa basileiana eai i murimuritama Ioane Bapatiso abo i saetawatawai. 12 Ioane Bapatiso huiana eai, i laoma e huia ta, galewa basileiana se laugirihai, eo tatao adiadidiri edi adidiri eai se laugirihai. 13 Peroveta gamagamagari eo laugagaeo hinage se ribaperoveta i laoma e Ioane huiana eai. 14 Ena au ataiei, Elia ede ina, ia ede si ene abo i laoma wa. 15 Ia beana eai i ataiei, abo i ataieididini.

16 “Teina isi ta saha arinai ea heaheasoniei? Doha ede merumeru se bawagogo abauneune eai, adi sasaguyao se eogaidi, si ene. 17 ‘Huelele aie iuhiawa, nige aue saga: ai dou nuanuadubuemiu, nige aue dou.’ 18 Ioane i laoma aiai nige ie ai, waina nige ie nom, abo si ene, ‘Demoni esau ia boeana eai.’ 19 Tau Natuna i laoma aiai ie ai, eo waina ie nom, abo si ene, ‘Au ita, tauaiaisom, eo waina taunomnomsom, takisi tautano eo tatao baabaaeadi ehadi.’ Sonoga nanatunayao aridi eai sonoga wa se hemasaraha.”

20 Abotai abo eanua headi aridi eai ena laulau gigibori i hemasarahadi i ribasuuidi, paana ede nuadi nige se buidi. 21 I ene, “Kapore Korasina! Kapore Betesaida! paana ede laulau gigiboridi emi eanua eai se ginauridi wa, taba Turo eo Sidona eai se ginauridi isi nabada nuadi se buidi, eo baeki eo ahu se aiouiaedi. 22 Teina ea heribamiu ta, hedudurai asubenana i lagema Turo eo Sidona taba nige se hegirudaoiedi, omi mo abo se hegirumiu. 23 Kaperenauma e hinage, oa se heawasaem galewa eai, abo u dobi hade eai: paana ede taba laulau gigiboridi se ginauridi Sodoma eai, doha se ginauridi em eanua eai, ia abo ie mia e huia ta. 24 Teina ea heribamiu ta Hedudurai asubenana i lagema, Sodoma taba nige se hegirudaoiei, oa mo abo se hegirum.”

25 Nei huiana ne Iesu riba i heuio, i ene, “Tamagu, galewa eo tanoubu Guiauna e, ea lautoiem ta, paana teina ginauridi tatao sonoga, eo tatao sibasiba matadi eai u toreyamuidi: na kaimou aridi eai u hemasarahadi. 26 Taiede Tamagu e: nei doha oa matam eai u ene i lolo. 27 Tamagu ginauri gamagamagari i ledima eau arigu eai: nige tau esau Natuna i itayao, Tamana iabom: hinage nige tau esau Tamana i itayao, Natuna iabom, eo ia hinage esa, eo esa, aridi eai Natuna wa ia i henua i hemasaraha. 28 Omi gamagarimiu amnamiu se baaea, eo ami bahebahe se porohe, au laoma eau arigu eai, abo ea heaiyawasimiu. 29 Egu oibahe au tore gedugedumiu eai, eo arigu eai au napuhai: paana ede eau ea dobidobiegu eo eau taumanamanabiga: earuamiu edi abaaiyawasi abo au lobai. 30 Paana ede agu oibahe i masamasaraha, eo agu bahebahe i mamala.”