1 Sabate wa ie ohi, asubena bagubagunana eai mara i uiari, Maria Magadala, eo Maria esau wa se laoma bousa bena se ita. 2 Na moniinii tano i hetabutabubu ariri: paana Guiau ena aneru galewa eai i dobima, i laoma we’u wa bousa guduna eai i buihai, abo i bawabigabiga potana eai. 3 Ia ana ao doha namanamari, eo ana lulu ie posiposi doha sinou. 4 Tauitaitawataina ia se matausiei, eo se tabutabubuei, doha se hemala taumatemate. 5 Aneru arinadi i heuio i ribalau sisine aridi eai i ene, “Tabu au matausi: ea nuatuiyao omi Iesu, ia se hesatauro wa, au eooi. 6 Ia inai nige’e: ia i toroo, doha i ribaeyao. Au laoma, Guiau edi abatorena ede au ita. 7 Au lau heuheula, ena heaheatayao au heribadi ia mate eai i torouio’o: ia abo i bagunawa Galilaia eai; taiede ea heribamiu ede ina.” 8 Isi se lauheuheula bousa wa se laugabaei nuadi se matamatausi eo se kode ariri: se aitautau bena ena heaheatayao wasana se heribadi. 9 Ma laudi ena heaheatayao bena wasana se heribadi, na Iesu i laubagibagiedi, i ene, “Eauedo!” Se laoma se abilau aena eai, ia se aihelahui. 10 Iesu abo i ribalau aridi eai, i ene, “Tabu au matausi: au lau egu tataoyao au heribadi se lau Galilaia eai, nei eai abo se itagu.”

11 Ma laudi, na tauitaitawataina headi eanua eai se laoma, kohena lailaidi ginauri wa se tubu wa se heribadi. 12 Maedi babada abo se oigogo, se oioiriba, moni lailai se mosei iala tataodi aridi eai. 13 Si ene, “Omi abo au ene, ‘Maiona eai, ma enomai, ena heaheatayao se laoma se laemodigauiyao.’ 14 Ena wasa ta ie tubu gavana i ataiei, ai abo enamiu ai riba, arinai abo au lolo.” 15 Arinai abo moni wa se abidi, doha wau se heatadi wa se abiwataidi: wau riba wa Iudea tataodi se ribaribaei i laoma e huia ta.

16 Heaheata saudoudoi‐esega abo se lau Galilaia eai, oea tupina eai wa arinai Iesu i heribanonohaidio. 17 Ia abo se ita, se aihelahui: headi mo se heasaasaei. 18 Iesu i laoma i ribalau isi aridi eai, i ene, “Gigiboridi gamagamagari se ledima arigu eai, galewa eai eo tanoubu eai hinage. 19 Arinai abo au lau eanua gamagamagari au heatadi, au hebapatisoidi Tamana eo Natuna eo Earua Tabuna esana eai. 20 Hari ginauri hari ginauri gamagamagaridi ea lauhesommiu ta, abiabiwataina au heatadi, na huia gamagamagari eau maemiu, i lau e tanoubu ana sigasiga eai.” Amen.