1 Isi abo se dunasae hari sana awasi eai, Geresene edi oea eai. 2 Ia waga i pesagabaei, tau esau earua biibii se lui bousa eai i laoma Iesu i hailobai. 3 Tau wa ena aba miamia bousa eai; eo nige tau esau abina ie ata bena i auaui, maina poasi eai hinage nige se auaui. 4 Huia gamagari ia se pai, maina poasi eai se auaui, poasi abo i hetamotudi; nige tau esau abina i ata bena ia i hemanasa. 5 Huia gamagamagari, maiona to asubena, ia oea eai, eo bousa eai i miamia, i eabayaba, eo sapaila ie abi i aisasaroiuioi. 6 Na, Iesu ie ita ia eda lohaloha eai abo i aitautau i aihelahui. 7 Ie eaba lailai, i ene, “Iesu e, Eaubada saesaearirina Natuna e, abi saha abo ea abi arim eai? ea awanorilaowa Eaubada esana eai, tabu u heamamnagu.” 8 Iesu ie ribalau ia arinai, i ene, “Earua biibii e, tau me u pesagabaeama.” 9 Iesu i hesiolau ia arinai, i ene, “Esam eai?” Ia abo i heuio, i ene, “Eau esagu ede Legeona, paana ai gamagarimai hinage.” 10 Ia i awanoridaoi i ene tabu i aiduiedi ina eanua eai ta. 11 Oea lalalai hanahanaudi eai sarai eawoidi lailai se dumudumuri. 12 Demoni gamagaridi se awanorilau ia arinai, si ene, “U hetamarimai abo ai lulau tenei sarai eawoidi ne boeadi eai.” 13 Iesu ie eari, Earua biibiidi gamagaridi abo se pesa se lulau sarai eawoidi boeadi eai: isi abo se aitautau, se leta, se dobi padipadi eai, se beugogo gabogabo eai, abo se galamosi. Isi tausani labui.

14 Sarai wa tauheaheaidi abo se dago wasa wa se wasaduaiei eanua eai, eo gougou eai. Eanua tataodi abo se lau, laulau ne bena abo se ita. 15 Isi Iesu arinai se lage, tau wa demoni se lui wa se ita ie bawabigabiga, eo lulu ie lui, hinage ie sabaauei; isi abo se matausi. 16 Isi tauitana enadi se wasaduai, ia ena abiabina demoni tauluina wa arinai, eo sarai eawoidi wasana hinage. 17 Isi abo se awanorilau Iesu arinai, edi eanua ne bena i laugabaei. 18 Ia waga eai ie awasae, demoni tauluina wa i awanorilau bena ia maena. 19 Iesu nige ie eari, na ie ribalau ia arinai, i ene, “U lau em asa ehamyao aridi eai Eaubada ena gigibori i hemasaraha oa arim eai, eo i nuatoatoaim hinage, u heribadi.” 20 Ia abo i lau, Dekapoli eai Iesu ena gigibori i wasaduaiei, eo tatao gamagaridi se noo ariri.

21 Iesu ie geru waga eai ie uio hari sana awasi eai, tatao gamagaridi se tupagogoma ia arinai: ia gabogabo hasarina eai. 22 Sunago tanuagana esau i laoma ia arinai esana Iairo; ia Iesu ie ita, ia abo i gurisalaoba Iesu aena eai. 23 Ia ie riba gadogadoralau ia arinai, i ene, “Natugu siu gagirina hanahanau ata ie mate; u laoma nimam u saolaei ia potana eai abo i lolo, ia abo i mauri.” 24 Iesu maena se lau.

Eo tatao gamagaridi ia se hemuriwatai, ia se heduheduiahalai. 25 Sine esau ana asiebo osina i laulau miana borimai saudoudoi‐labui. 26 Doketa gamagaridi se laoma ia arinai, arinai ena moni se heohi, ana asiebo nige i lautom, i laulaubodauioi hinage i helai. 27 Ia Iesu wasana i ataieyao, ia tatao moutuadi muridi eai i laoma, ia ana lulu i abiita. 28 Ia ena nuatu i ene, “Taba ena lulu mo ea abiita abo ea lolo.” 29 Maesega ana asiebo osina i lautom; tauna eai amnana i ataiei ana iwala i tatapesa. 30 Iesu i nuatulobai gigiborina i laulaei, i sinibuiuio tatao moutuadi aridi eai, i ene, “Agu lulu ta eai i abiitayama?” 31 Ena heaheatayao abo se ribalau ia arinai, si ene, “Tatao moutuadi ue itadi se aiheduheduiahalaim, saha ede u hesioi, u ene, ‘Eai ede i abiitaguma?’ ” 32 Iesu abo i itahetaiiri sine wa ena laulau nei doha ie ita. 33 Na, sine ne ie ita ena abiabi ia arinai i nuatulobai i matausi, eo i tabutabubu, ia abo i laoma i gurisalaobadobi Iesu nuanuana eai, ena laulau i ribahemasaraha. 34 Iesu ie ribalau ia arinai, i ene, “Natugu sine e, oa em sunuma eai arinai ede u lolo; u lau ma nuabigam am iwala me it tatapesao.”

35 Ma ribaribana headi sunago tanuagana ena numa eai se laoma, si ene, “Natum siu wa i mateo; Tanuagada sahana u hemode?” 36 Iesu teina riba ta i ataiei, ie ribalau sunago guiauna arinai, i ene, “Tabu u matausi, u awamamohoiei mo.” 37 Ia tatao ie ribanuahidi ia tabu se hemuriwatai, Petero mo, eo Iamesi, eo Iamesi ena tau, Ioane. 38 Ia abo ie lage sunago guiauna ena numa eai, isi se hetalalilolilousi i itadi, eo se doudou ariri hinage. 39 Ia i awasae numa alona eai, i ribalau aridi eai, i ene, “Saha au hetalaliloliloei, eo au doudoui? Siu me nige ie mate, ie eno mo.” 40 Isi ia se marumaruhiei. Isi gamagaridi i aiduiedi se pesa murimuri eai; siuna ne tamana ma sinana ie woeaidi, ma ana sasaguyao hinage se lusae biri eai siuna ne ena aba ota eai. 41 Ia siu nimana eai ie abilau, i ribalau ia arinai, i ene, “Talita kumi,” heaheasonina ede, “Siu e, ea heribam ta, u toro.” 42 Siuna ne i torohai, eo i laulau; ena borimai saudoudoi‐labui. Isi se nooariariri. 43 Ia isi i guguiaidi tabu se wasawasaei, eo i lauhesomdi, i ene, “Siu me aiai begana au mosei i ai.”