96
Aihelahui Wanana
1 Omi wana harihariuna au wanai GUIAU arinai!
Tanoubu maudoina e, GUIAU arinai au wana!
2 Au wana GUIAU arinai, ia esana au ribatausaei;
ena abihemauri au hemasaraha, asubena to asubena.
3 Tanoubu tataodi gamagaridi matadi eai ena namanamari au ribahemasaraha,
ena heiheinoi gigiboridi tatao gamagaridi matadi eai!
4 Paana GUIAU i lai ariri, ia aihelahuina hinage i lai ariri;
eaubada udoi udoi i saetawatawaidi.
5 Paana basileia udoi udoi edi eaubada ede oitau;
na GUIAU ia galewa tauginaurina.
6 Heasisi eo wasawasana ia matana eai,
adidirina eo ao lolona ia ena abamia tabuna eai.
7 GUIAU enana au mosei, omi boga udoi udoi tataomiu e,
GUIAU arinai namanamarina eo adidirina au mosei!
8 Namanamarina GUIAU esana enana au mosei;
ainauia au leama au awasaema ena dubu alona eai.
9 GUIAU au tabaohui, lulu tabudi au luidi,
ia matana eai au tabutabubu, tanoubu tataomiu gamagarimiu e!
10 Eanua gamagaridi taumiaidi au heribadi au ene, “GUIAU ia wasawasa ede!
Mamohoi tanoubu se hetoro, taba nige i moimoiu;
tanoubu tataodi ia i heduduraidi ma duduraina.”
11 Galewa taba i kode, tanoubu taba i wowo,
gabogabo taba i dagugu, eo taumiaina,
12 oea taba i kode, eo taumiaina hinage;
abotai nuura oeagidi abo se wana ma kodedi,
13 GUIAU matana eai, paana ia ede i laoma,
paana ia ede i laoma tanoubu
i hedudurai ma laulau duduraina,
eo tatao wa ma ao mamohoina.