124
Waiunu nimadi eai saguhaina uurana
1 Taba GUIAU ia nige eda tupo eai,
―Isaraela abo si ene―
2 taba GUIAU ia nige eda tupo eai
huiana eai wa tatao abo se toro se ialaida,
3 abotai taba ma maumaurida se domda,
huiana eai wa se ouyalayala aririeda;
4 huiana eai ne abaita taba i earuhaida,
goila lailai abo i earuhaida;
5 goila ena didi adidiri
abo i earutawaida.
6 GUIAU bena ta ribatausaei,
paana nige i moselaeda
doha moadi edi aba aipurisi!
7 Ta dago doha manu
sa’i tauginaurina ena sa’i arinai;
sa’i i tagoduo,
to ta dago’o!
8 Aba saguida ede GUIAU esana eai,
ia galewa eo tanoubu tauginauridi.