1 Egu tataoyao e, au nuatui, e nige’e (ea ribariba laugagaeona taunuatuina aridi eai ina), laugagaeo tatao edi mauri huiana eai mo i tanuagaidi? 2 Sine esau i tawasora laugagaeona eai, ia ma maumaurina eai monena arinai i patudidini, na ia ena ie mate, abo monena laugagaeona arinai sine wa se iairihai. 3 Arinai taba ia monena ma miana eai na tau esau i tawasorai, ia esana abo se ribaei sine ganaganawarina. Na taba monena i mateo laugagaeo arinai se iairihai; tau esau ie hai temeta nige ganawari.

4 Egu tataoyao e, Keriso tauna debana eai omi hinage laugagaeona eai aue mate; esau bena au tawasorai, ia ede ia mate eai wa se hetorouioi, ita bena anioda ta hetubu Eaubada enana. 5 Na ita buluma ena huia eai sora ma miamiada wa, tauda lelehidi baaeadi laugagaeo i hesohesomdi, eauda eai se paipaisoa bena anioda ta hetubu mate enana. 6 Na huia ta laugagaeona eai se abigabaeda, ena abiabididinida wa i mateo; ita taba nige ta heayaiei gaibui doha beabeana wa, na miamia harihariuna eai mo, Earua enana.

7 Ita abo ta ene edoha? Laugagaeona i baaea ede? Nige ariariri! Nige’e, baaea taba nige ea nuatui, na laugagaeo mo ia tauhemasarahana; gadolelehi taba nige ea nuatui, na laugagaeo mo i ene, “Tabu hari tau ena ginauri nuam se lauedi.” 8 Baaea ena dobila i lobai laugagaeona eai hari baaea, hari baaea, i hemasarahadi. Na, taba laugagaeo nige’e, baaea abo ie mate. 9 Nabada wa sora nige laugagaeona, na ea mauri: na laugagaeona i laoma, baaea abo i mauri, eau mo ea mamate. 10 Laugagaeona wa mauri bena i leama, mate mo i hetubuyama. 11 Paana ede baaea ena dobila i lobai laugagaeona eai, i boraigu, arinai i unuhemategu. 12 Arinai ta ’ne laugagaeona ede laugagaeo tabuna, eo duduraina, eo lolona.

13 Ginauri lolona ede meta, arigu eai abo i hemala mate wa? Nige ariariri! Na baaea mo ginauri lolona debana eai mate i hetubu, bena abo baaea se italobai komakomani, eo bena baaea, laugagaeo debana eai, baaea laina ana ao abo i masamasaraha. 14 Ita ta nuatuiyao laugagaeo ia earuana eai heaheasonina ede; eau mo bulumagu eai ta, baaea arinai se unegabaeguo. 15 Na egu abiabi nige ea ene eau egu abiabi: saha eo saha ea henua ea abidi, nige ea abidi, na meta mo nige ea henuadi, ia ede ea abidi. 16-17 Ena saha nige ea henua, meta mo ea abidi ede, arinai abo ea ene laugagaeo i lolo. Eau eaubom nige ea abidi, baaea mo nuaboeagu eai ie mia, ia tauabidi ede. 18 Ea nuatuiyao eau nuaboeagu eai (ia ede bulumagu boeana eai) nige ginauri lolona esau ie mia; eau egu nuatu ea ene bena ea lolo, na ia mo nige egu gigibori. 19 Laulau lolo ea henua ea abi, nige ea abi: baaea nige ea henuhenua, meta mo ea abiabini. 20 Na ena meta mo ea abidi nige ea henuadi ia mo ea abidi, taba nige ea ’ne eau ea abidi, na baaea boeagu eai ie mia, ia tauabidi ede.

21 Laugagaeo esau ea lobai ede ina: eau ea henua ea laulau lolo, baaea mo i wesewesegu. 22 Paana nuaboeagu eai Eaubada ena laugagaeo ea henua aririei, 23 eaugu eai mo laugagaeo udoi ea ita, nuagu laugagaeona maena se haihaiabi, eo baaea laugagaeona eaugu eai i toaigu, i tanuagaigu. 24 Ea ene kapore eau tau baabaaeagu ta! Teina mate ta taugu eai, eai abo i hemaurigu? 25 Eaubada ea lautoiei, eda Guiau Iesu Keriso debana eai! Arinai ea ene, nuagu eai eau eaubom Eaubada ena laugagaeo ea heaheayaiei, na bulumagu eai mo baaea laugagaeona ea heaheayaiei.