4
1 Ni inywe awari na awagule, mu-ee awagule wiinyu ewintu ewisugaane kandi muwe awalootu nawo, aeniki mwona muri no omukangasi iinyu owagurre owa mukorra ori ku igulu. Efee 6:9
Okuamba amaani mu okusawa no okulanzia Kristo
2 Mute emioyo giinyu mu okusawa kandi muwe amankaga ni muiranizia Katonda otioo. Luuk 18:1 3 Awiifu, mutusawire twona kugere Katonda aigule engira kugere amangʼana agaiwisre aga tulanzia ku *Kristo, agagera ni ndi mu owusiwe nyingeeno, gatuukre iwaga. Awaru 15:30 4 Munsawire kugere ngalanzie mu engira ewurikana kiomo kusugaane. Kolo 1:26–27
5 Ni muri na awantu awatari Awakristo, muwalage olugendo olulootu na amaganga kandi muwone mbwe mukorre ni iwaga riona geeza okuwalaga engira eya Kristo. Efee 5:16; 1Thes 4:12 6 Enyinga ziona ni mugamba-gambra awantu, okugamba-gamba kwinyu kusugaane kuwe okulootu, kandi okuomerezia awantu, lwona musugaane mumanye kiomo mukairania embuuzio ezia mueerwe ziona, geeza. Efee 4:29; 1Pet 3:15
Amangʼana na amakeezio agatuukre
7 Mpao ntumre Tichikaasi ne ebaruwa kandi aaza lwona okuwalaga amangʼana goona kiomo ngia eluwega eno. Iye ni wamwifu ku Kristo omuigolovu kandi owa ngonziizie, owa tukola nae emirimo egia Omwami. 8 Mutuma ku inywe kugere awalage kiomo tugia entulo eno, kandi okuwa-ambia amaani. Efee 6:21–22 9 Mutuma alala no omwina iinyu Onesimaasi ori wamwifu ku Kristo omuigolovu kandi owa ngonziizie. Waaza okuwalaga ewintu wiona ewiikola eluwega eno. Filem 10
10 Aristakuusi, owa turi nae mu owusiwe, alala ni Mariiko, omuzia owa senge owa Baranabaasi, wawatumiire amakeezio. Ni kiomo mumiire okulagwa mbwe Mariiko aaza eyo, na awaazreko mumuingizie geeza. Awat 19:29; 12:12 11 Yesu, oetwa ne eriina rindi mbwe Yusto, oona awatumiire amakeezio. Awantu awasatu awo niwo *Awayaudi wengʼene awari no okuganya ku Kristo awakola ni inze alala mu emirimo egia *Owuami owua Katonda, kandi wamiire okunkalagusia ino.
12 Epafraasi omwina iinyu kandi *omukurumu owa Yesu Kristo, oona awatumiire amakeezio. Awasawira Katonda na amaani ino enyinga ziona kandi omwoyo gwae guwarirra mbwe mukome muwe awakalangufu kandi awaisimbiire mu okuagala okwa Katonda. Kolo 1:7 13 Kuwuene, mbalaga mbwe amiire okuwa na awasawira wukalu ino, inywe na Awakristo awa Laodeesia na awa Yierapooli. Kolo 2:1 14 Omulaktaari Luuka owa ngonziizie ino, ni Deema, woona wawakeeziizie. 2Timo 4:10–11; Filem 24
15 Mwona mutukeeziizieko Awakristo awiina wiifu awari Laodeesia ni wamwifu owekiala Niifa alala na Awakristo awaagaana okusawa omwae. Awaru 16:5
16 Ni mumiire okusomerwa ebaruwa eno, mugitumre Awakristo awari Laodeesia woona wagisome, kandi inywe mwona muwone mbwe musomere ebaruwa eya nyajojera awa Laodeesia. Efee 3:4; 1Thes 5:27 17 Mulage Arkiipo mbwe agie emberi okukola emirimo egia Katonda yamu-aa, nawuno awone mbwe agigowiizie. Filem 2
18 Owutuukre, mbajojera amakeezio gano no okukono kwange omwene ni mboola otino: Mutaaza mwalawira mbwe ndi mu owusiwe. Owusiza owua Katonda wuwe ni inywe! 1Kori 16:21; Efee 3:1
4:1 Efee 6:9
4:2 Luuk 18:1
4:3 Awaru 15:30
4:4 Kolo 1:26–27
4:5 Efee 5:16; 1Thes 4:12
4:6 Efee 4:29; 1Pet 3:15
4:8 Efee 6:21–22
4:9 Filem 10
4:10 Awat 19:29; 12:12
4:12 Kolo 1:7
4:13 Kolo 2:1
4:14 2Timo 4:10–11; Filem 24
4:15 Awaru 16:5
4:16 Efee 3:4; 1Thes 5:27
4:17 Filem 2
4:18 1Kori 16:21; Efee 3:1