1 आं लोक्‍बपुकी, इन कली ङोंइती येसु ख्रीस्‍त आ पर्बम शेंशो ग्‍येरपाइक्‍तीक लोव़ मिम्‍पाइक्‍नुङ। गेपुकीमी एको लोव़ नेंशा थमा सुइक्‍तीनी। मिनु मुल यो थमा सुइक्‍ना सुइक्‍न बाक्‍तीनी। 2 एको लोव़ दोपा शेंदन्‍नी, मोपा थमा सुइक्‍ना सुइक्‍न बोल्‍यो दुम्‍‍तीनी हना, परमप्रभु यावे नु बाक्‍चा ताइनीनी। 3 मारदे हना आं ख्रीस्‍त रे त‍शो ठेयब लोव़ इन कली शेंताक्‍न्‍नी। दोदेंशो लोव़ बाक्‍ब देंशा हना, परमप्रभु यावे आ लोव़मी ब्रेक्‍शो खोदेंशो पा ख्रीस्‍त इं पाप आ पर्बम साइक्‍चा पुंइसाक्‍व। यसैया ५३:१२ 4 मेको थिम्‍चा पुंइसाक्‍व। मिनु परमप्रभु यावे आ लोव़म ब्रेक्‍शो खोदेंशो पा आ नित्‍थ नाक्‍ती सेंचा पुंइसाक्‍व। होसे ६:२; लूका २४::२७,४४,४६ 5 मिनु सेंसीशा, ङोंइती केफास कली तपांइसाक्‍व। मिनु नोले १२ जना शेंसीब आन कली तपांइसाक्‍व। लूका २४:३४; यूहन्‍ना २०:२६ 6 नोले कालेमी ५ सहे क्‍येङा शुश थमा सुइक्‍ब आन कली तपांइसाक्‍व। का निक्‍शी मुल बेक्‍शा लाम्‍तेक्‍म। शुश चहिं मुल यो बाक्‍नीम। 7 नोले याकूब कली तपांइसाक्‍व। मिनु आ सोइश्‍शो शेंसीब नेल्‍ल आन कली यो तपांइसाक्‍व। लूका २४:५० 8 मिनु नेल्‍ल क्‍येङा नोले गो महिना मजाक्‍दीत्‍थु जरमेशो आल खोदेंशो आं कली तपांइसाक्‍व। १कोरिन्‍थी ९:१; प्रेरित ९:३-६ 9 मारदे हना गो सोइश्‍शो आन दातेमी नेल्‍ल क्‍येङा आइक्‍च बाक्‍नुङ। आं कली सोइश्‍शो देंचा मशिरचा ङा बाक्‍नुङ। मारदे हना गो परमप्रभु यावे कली थमा सुइक्‍ब आन कली खेदा पाता। एफिसी ३:८; प्रेरित ८:३ 10 तन्‍न परमप्रभु यावेमी शिशी पा आ सोइश्‍शो नु आ लोव़ शेंब सेल्‍ती। आ शिशी पशो यो मो मबाक्‍ब। मिनु गो नेल्‍ल आन क्‍येङा शुश गेय पाता। मेको नेल्‍ल आं पशो ममाइ, तन्‍न परमप्रभु यावे आ पपाइश्‍शो बाक्‍ब। २कोरिन्‍थी ११:५,२३ 11 मोपतीके गोम शेंताक्‍न्‍नी हना यो, मेकोपुकीम शेंताक्‍म हना यो, गेपुकीमी थमा सुइक्‍तीनी।

12 मिनु ख्रीस्‍त बेक्‍शो रे सेंसाक्‍व, दे शेंशो बाक्‍त। तन्‍न इन दाते ङा का निक्‍शीमी “बेक्‍शो मुर बेक्‍शो रे मसेंसीनीम” देंशा दोपा देंने चाप्‍नीमी? 13 बेक्‍शो रे सेंचा मपुंइसीनीम हना, ख्रीस्‍त यो बेक्‍शो रे मसेंसीशो बाक्‍ब। 14 ख्रीस्‍त बेक्‍शो रे मसेंसीशो बाक्‍त हना, आंइ शेंशो फश लोव़ खोदेंशो दुम्‍त। इन थमा सुइश्‍शो यो मोशीन दुम्‍त। 15 गो आंइ परमप्रभु यावे आ पर्बम शेंशो यो जोल दुम्‍बाक्‍त। मारदे हना गोमी परमप्रभु यावेमी ख्रीस्‍त कली बेक्‍शो रे सेंताक्‍व दे शेंशो बाक्‍तक। तन्‍न मेकोम मपव। “बेक्‍शो रे मसेंसीनीम” देंशो लोव़ थमा बाक्‍त हना, आंइ शेंशो जोल दुम्‍ब। प्रेरित १:२२ 16 मारदे हना मुर बेक्‍शो रे मसेंसीनीम हना, ख्रीस्‍त यो बेक्‍शो रे मसेंस। 17 मिनु ख्रीस्‍त बेक्‍शो रे मसेंसाक्‍व हना, इन थमा सुइश्‍शो मोशीन दुम्‍त। इन पाप यो मक्‍याम्‍सीथु लीशो बाक्‍ब। 18 ख्रीस्‍त कली थमा सुइश्‍‍शा बेक्‍शोपुकी यो जाम्‍शा लाम्‍तेक्‍म। 19 एको रागीम ब्रोंइचा कली ला ख्रीस्‍त कली थमा सुइश्‍शो बाक्‍तक हना, गो मुर नेल्‍ल आन क्‍येङा शिशी पाइक्‍चा पुंइसीब नकी।

20 तन्‍न ख्रीस्‍त बेक्‍शो रे सेंसीशो बाक्‍ब। बेक्‍शो आन दातेमी नेल्‍ल क्‍येङा ङोंइती सेंसीब ख्रीस्‍त बाक्‍त। १कोरिन्‍थी ६:१४; कलस्‍सी १:१८ 21 दोपा मुर कामी नेल्‍ल मुर आन कली बेक्‍शा लाइब सेला, मोपा मुर कामीन मुर नेल्‍ल आन कली बेक्‍शो रे सेंचा पुंइसीब सेल्‍तु। उत्‍पत्ती ३:१७-१९; रोमी ५:१८ 22 दोपा आदम रे नेल्‍ल बेक्‍ब दुम्‍मा, मोपा ख्रीस्‍त रे पा नेल्‍ल ब्रोंइब दुम्‍तेक्‍म। 23 मिनु नेल्‍ल का का पा सेंसीनीम। ङोंइती ख्रीस्‍त सेंसाक्‍व। मिनु नोले आ जाक्‍ची ना मेको कली थमा सुइक्‍बपुकी सेंसीनीम। १थिस्‍सलोनिकी ४:१६-१७ 24 मिनु नोले रागी नुप्‍ची ना जाक्‍ब। मिनु मेकोमी नेल्‍ल सासन, नेल्‍ल अधिकार नु नेल्‍ल सक्ति खतम सेल्‍शा, आ आफ परमप्रभु यावे कली आ राज्‍य गेब। रोमी ८:३८ 25 मारदे हना ख्रीस्‍तमी आ जोरी सत्रु आन कली आ खोइलीम मदिम्‍दा सम्‍म सासन पचा माल्‍ब। भजन संग्रह ११०:१; मत्ती २२:४४ 26 नेल्‍ल क्‍येङा नोले साइक्‍तीक चहिं जोरी सत्रु बेक्‍तीक बाक्‍ब। 27 मारदे हना परमप्रभु यावेमी रागी ङा सक्ति नेल्‍ल कली आ खोइलीम दिप्‍शा वोइक्‍तु। रागी ङा सक्ति नेल्‍ल आ खोइलीम दिम्‍शा वोइक्‍तु, आ चहिं दिम्‍सीशा मबा, दे रुम्‍सीब। भजन संग्रह ८:६ 28 मिनु सक्ति नेल्‍ल परमप्रभु यावे आ गुइम बाक्‍त हना, तौ यो आ गुइम बाक्‍ब। मारदे हना परमप्रभु यावे नेल्‍ल आन कली का ला परमप्रभु यावे बाक्‍ब।

29 बेक्‍शो रे मसेंसीब देंशो लोव़ थमा बाक्‍त हना, बेक्‍शो मुर आन पा ङा अरु थमा सुइक्‍ब मुर ब्‍वाक्‍कुम ख्रुम्‍शा ग्रुंइपांइसीचा, मार मिम्‍नीमी? बेक्‍शो मुर थमा पा मसेंसीनीम हना, मारदे अरु मेको आन पा ङा ब्‍वाक्‍कुम ख्रुम्‍शा ग्रुंइचा पुंइसीनीमी? 30 मारदे गो शुश श्‍येत फाल्‍शा, एको लोव़ शेंना शेंन गाक्‍नुङा? रोमी ८:३६; गलाती ५:११ 31 आं लोक्‍बपुकी, येसु ख्रीस्‍त, इं प्रभु आ मुर दुम्‍तीनी। मिनु इन कली तशा, आं नें बोरपाइक्‍नुङ। तन्‍न शेंना शेंन गाक्‍शा, नाक्‍त किंत किंत बेक्‍चा ङा खोदेंशो दुम्‍नुङ। २कोरिन्‍थी ४:१० 32 एफिसस सहरम शेंना शेंन बाक्‍ङानु, मेकेर ङा मुरपुकीमी जोइ वां खोदेंशो पा खेदा पतीमी। मुर बेक्‍शो रे मसेंसीनीम हना, जय तू्‍य मारदे हना दीसा बेक्‍नय। यसैया २२:१३ 33 सुइमी जोल थमा मसुतीन। मारदे हना मरिम्‍शो मुर नु बाक्‍बम, मुर कली मरिम्‍शो सेल्‍ब। 34 दूली मिम्‍चा प्रोनीन। लेंशा पाप मपने। इन दाते ङा का निक्‍शीमी परमप्रभु यावे आ पर्बम मारेइ मतुइक्‍ब बाक्‍नीम। मेको इन कली मुने दोक्‍चा ङा बाक्‍ब। १थिस्‍सलोनिकी ५:८

35 मिनु मुर कामी “मुर बेक्‍शो रे दोपा सेंसीनीमी? आन रां दोदेंशो बाक्‍बा ङा?” दे हिल्‍लो पाइनीम। 36 गे मूर्खपुकी, वांचेर शोक्‍नीनु, वांचेर मबेक्‍थु, कोच्‍वा मदाप्‍ब। यूहन्‍ना १२:२४ 37 मिनु इन शोक्‍शो, वाशो खोदेंशो मबाक्‍ब। मेको गेडा ला बाक्‍ब। मेको चेरब बाक्‍त हना यो अरु वांचेर बाक्‍त हना यो मोदेंशो बाक्‍ब। 38 तन्‍न परमप्रभु यावेमी नेल्‍ल आन कली आ योव़शो रां गेब। मिनु वांचेरमी आंम आंम कोच्‍वा दाप्‍शो खोदेंशो बाक्‍ब। 39 मारदे हना ब्रोंइशो नेल्‍ल खाल का ङा मबाक्‍नीम। मुर खाल का ङा बाक्‍नीम, जन्‍तु अर्को खाल ङा बाक्‍नीम, बस्‍तु भाव अर्को खाल ङा बाक्‍नीम, चिक्‍ब अर्को खाल ङा बाक्‍नीम नु ङांइ अर्को खाल ङा बाक्‍नीम। 40 मिनु स्‍वर्ग ङा रां बाक्‍नीम नु रागी ङा रां बाक्‍नीम। स्‍वर्ग ङा रां आन दारस का बाक्‍ब नु रागी ङा रां आन दारस अर्को बाक्‍ब। 41 नां आ छेङछेङ का बाक्‍ब नु तास्‍ला आ छेङछेङ अर्को बाक्‍ब। मिनु सोरुल आन छेङछेङ लेंशा अर्को बाक्‍ब। सोरुल का आइक्‍च नु अर्को ठेयब छेङछेङ पाइश्‍शो बाक्‍ब।

42 मोदेंशो मुर आन बेक्‍शो रे सेंसीचा यो बाक्‍ब। शोक्‍शो रां, वांचेर खोदेंशो पा, जाम्‍शा लाइब। सेंसीशो रां चहिं गेना हना यो लीब रां बाक्‍ब। 43 शोक्‍शो रां मरिम्‍शो बाक्‍ब। सेंसीशो रां चहिं थम दारशो बाक्‍ब। शोक्‍शो रां मारेइ पने मचाप्‍ब दुम्‍शो बाक्‍ब। सेंसीशो रां चहिं सक्ति पाइश्‍शो बाक्‍ब। फिलिप्‍पी ३:२१; कलस्‍सी ३:४ 44 बेक्‍चा माल्‍शो रां शोक्‍शो बाक्‍ब, परमप्रभु यावे आ सोक्‍तीम गेशो रां सेंसीशो रां बाक्‍ब। बेक्‍चा माल्‍शो रां बाक्‍त हना, परमप्रभु यावे आ सोक्‍तीम गेशो रां यो बाक्‍ब। 45 मार ब्रेक्‍शो बाक्‍ब देंशा हना “नेल्‍ल क्‍येङा ङोंइती ङा मुर, आदम, ब्रोंइब दुम्‍माक्‍त” दे ब्रेक्‍शो बाक्‍ब। नेल्‍ल क्‍येङा नोले ङा आदम चहिं ब्रोंइतीक सोक्‍त गेब दुम्‍त। उत्‍पत्ती २:७; २कोरिन्‍थी ३:१७ 46 तन्‍न परमप्रभु यावे आ सोक्‍तीम गेशो रां ङोंइती ङा ममाइ। ङोंइती बेक्‍चा माल्‍शो रां बाक्‍ब। नोले ला सोक्‍तीम गेशो रां बाक्‍ब। 47 ङोंइती ङा मुर रागी ङा खप के सेल्‍शो बाक्‍त। नोले ङा मुर स्‍वर्ग रे बाक्‍ब। 48 ङोंइती ङा मुर खप के सेल्‍शो खोदेंशो पा, खप के सेल्‍शो बाक्‍तेक्‍म। ङोंइती स्‍वर्ग रे जाक्‍शो मुर खोदेंशो पा, स्‍वर्ग ङा मुर बाक्‍नीम। 49 दोपा गो खप के सेल्‍शो मुर खोदेंशो बाक्‍नया, मोपा गो स्‍वर्ग ङा मुर खोदेंशो यो दुम्‍नय। उत्‍पत्ती ५:३

50 आं लोक्‍बपुकी, मुल हुश नु रुश पाइश्‍शो मुर परमप्रभु यावे आ राज्‍य ओव़ने मचाप्‍नीम। बेक्‍शा जाम्‍शा लाइब रां, गेना हना यो लीब रां दुम्‍ने मचाप्‍ब। 51 मुल इन कली ख्रुइश्‍शो लोव़ का शेंनन्‍नी। गो का निक्‍शी बेक्‍शा लाइनय, का निक्‍शी ब्रोंइशा बाक्‍नय। गो बेक्‍शा लशो नु ब्रोंइशा बाक्‍शो नेल्‍ल फाइक्‍चा पुंइसीनय। १थिस्‍सलोनिकी ४:१५-१७ 52 मेको छिन काम दुम्‍ब। याम काम दुम्‍ब। नोले ङा नाक्‍त ङा तुराही ताप्‍ची ना मेको दुम्‍ब। मारदे हना मेको तुराही नेंसीब। बेक्‍शो मुर, मबेक्‍चा ङा पा सेंसीनीम। मिनु गो फाइक्‍चा पुंइसीनय। मत्ती २४:३१ 53 मारदे हना मेको जाम्‍‍शा लाइब रां, मजाम्‍चा ङा रां दुम्‍चा माल्‍ब। मेको बेक्‍‍‍शा लाइब रां, मबेक्‍चा ङा रां दुम्‍चा माल्‍ब। २कोरिन्‍थी ५:४ 54 मिनु जाम्‍शा लाइब रां, गेना हना यो लीब रां दुम्‍चा माल्‍ब। बेक्‍ब रां, गेनायो मबेक्‍चा ङा रां दुम्‍चा माल्‍ब। मेना मेको ब्रेक्‍शो लोव़ थमा दुम्‍ब “ब्रोंइतीक सक्तिमी बेक्‍चा कली ग्रात। 55 ए बेक्‍चा, इ ग्रातीक ते लमे? ए बेक्‍चा, इ हिंपाइक्‍तीक ते लमे?” दे ब्रेक्‍शो बाक्‍ब।यसैया २५:८,; होसे १३:१४ 56 पाप पशोमी बेक्‍चा कली हिंपाइक्‍ब। परमप्रभु यावे आ अरेशो लोव़ तुइक्‍बमी पाप पशो यो तुइक्‍ब। मेको आ अरेशो आ सक्ति बाक्‍ब। रोमी ७:८; रोमी ११:१३ 57 तन्‍न गो परमप्रभु यावे कली “गे रिम्‍शो पाइब बाक्‍नीनी” देंनय। मारदे हना मेकोमी इं प्रभु येसु ख्रीस्‍त आ पशोमी ग्राचा गेप्‍तु।

58 मोपतीके आं दाक्‍शो लोक्‍बपुकी, इन खोइली थेक्‍शा, दल्‍गीर मपथु, प्रभु आ गेय पना पन बाक्‍कीन। प्रभु आ नेंमी पशो गेय गेनायो मोशीन मलाइब, दे तुइक्‍तीन।