1 मिनु बर्स सां सम्‍म अरामी नु इस्राएली आन दातेमी लडाइ मदुम्‍माक्‍‍त। 2 तन्‍न बर्स सां नोले यहूदा ङा पिप येहो-शाफात इस्राएल ङा पिप कली ग्रुम्‍थ ब्रुम्‍माक्‍‍त। १राजा २२:४१ 3 मिनु इस्राएल ङा पिपमी आ गेय पाइब आन कली “गे नेल्‍लेम रामोथ-गिलाद इं के बाक्‍ब, दे तुइक्‍नीनी। मो हना यो गो मेको अराम ङा पिप रे लेश्‍शा ताक्‍चा कली मारेइ मपशो बाक्‍नय” देंमाक्‍त। यहोसु २१:३८ 4 मोपतीके मेकोम येहो-शाफात कली “रामोथ-गिलाद कली लडाइ तोचा कली गे आं कली वारच पाइक्‍नीनी?” दे हिल्‍लो पवा बाक्‍त। मिनु येहो-शाफातमी इस्राएल ङा पिप कली “गो इन खोदेंशो नङ। आं मुरपुकी इन मुर नम। आं शारा नेल्‍ल इन केन नम” देंमाक्‍त। २राजा ३:७

5 तन्‍न येहो-शाफातम इस्राएल ङा पिप कली “ङोंइती परमप्रभु यावे कली हिल्‍लो पने” देंमाक्‍त। 6 मोपतीके इस्राएल ङा पिपम ४ सहे जना खोइ परमप्रभु यावे आ लोव़ पाइब आन कली पुक्‍शा, मेको आन कली “गो रामोथ-गिलाद कली लडाइ तोङ देय मतोङ” दे हिल्‍लो पामी बाक्‍त। मिनु मेकोपुकीमी “तोन, परमप्रभु यावेम मेको इन गुइमी गेब” देंमा बाक्‍त। 7 मिनु येहो-शाफातम “हिल्‍लो पचा कली परमप्रभु यावे आ लोव़ पाइब अर्को सुइ मबाक्‍नीमी” देंमाक्‍त। २राजा ३:११ 8 मिनु इस्राएल ङा पिपम येहो-शाफात कली “परमप्रभु यावे कली हिल्‍लो पचा कली अर्को का बाक्‍ब। मेको इम्‍लाह आ तौ मीकाया बाक्‍ब। तन्‍न गो मेको मुर कली काइ मदाक्‍नुङ। मारदे हना मेकोम आं पर्बम गेनायो रिम्‍शो लोव़ मपाइब। गेना हना यो मरिम्‍शो लोव़ ला पाइब” देंमाक्‍त। मिनु येहो-शाफातमी पिप कली “पिपम मोदेंशो लोव़ मपवल” देंमाक्‍त। २इतिहास १८:७-२७ 9 मिनु इस्राएल ङा पिपम आ मुर आन दाते ङा का कली ब्रेश्‍शा “इम्‍लाह आ तौ मीकाया कली रीब पा चाक्‍को” दे मदा बाक्‍त। 10 मिनु इस्राएल ङा पिप नु यहूदा ङा पिप येहो-शाफात पिपम फेक्‍तीक वा फेक्‍शा सामरीया ङा ठेयब लाप्‍चो आ ङोंइती आस आस नित्‍तीकेम निश्‍शा बाक्‍शो बाक्‍सा बाक्‍त। मिनु परमप्रभु यावे आ लोव़ पाइब नेल्‍ले मेको आस ङोंइती बाक्‍शा नोले दुम्‍ब लोव़ पना पन बाक्‍शो बाक्‍मा बाक्‍त। 11 मेको आन दाते ङा का केनानाह आ तौ सिदकीयाहमी चहिं फलाम के ग्रोव़ सेल्‍सीशो बाक्‍माक्‍त। मिनु मेकोमी “परमप्रभु यावेमी ‘गे एको ग्रोव़मी अरामी आन कली नेल्‍ल मबेक्‍मा सम्‍म ख्रुइक्‍नीनी’ देंत” देंमाक्‍त। 12 मिनु परमप्रभु यावे आ लोव़ पाइब नेल्‍लेमी मेको मोदेंशोन लोव़ पशो बाक्‍मा बाक्‍त। मेकोपुकीमी “रामोथ-गिलाद कली लडाइ तोशा रीब पा ग्राङीन। मारदे हना परमप्रभु यावेम मेको पिप इन गुइमी गेब” देंशो बाक्‍मा बाक्‍त।

13 मिनु मीकाया कली ब्रेश्‍शा चाक्‍ब मुरुम मेको कली “परमप्रभु यावे आ लोव़ पाइब नेल्‍लेमी लोव़ का पा पिप कली ग्‍येरपाइश्‍शो बाक्‍नीम। गे यो मेको आन खोदेंशो पा रिम्‍शो लोव़ पने” देंमाक्‍त। 14 तन्‍न मीकायाम चहिं “गो परमप्रभु यावे गेना हना यो ब्रोंइशा बाक्‍शो खोदेंशो पा परमप्रभु यावेमी आं कली मार देंबा, मेको ला देंनुङ” देंमाक्‍त।

15 मिनु मीकाया पिप आ ङोंइती जाक्‍मेनु, पिपमी मेको कली “मीकाया, गो रामोथ-गिलाद कली लडाइ तोङ देय मतोङ?” दे हिल्‍लो पवा बाक्‍‍त। मिनु मेकोमी “लडाइ तोने। मिनु ग्राङीन। मारदे हना परमप्रभु यावेमी मेको इन गुइमी गे‍ब” देंमाक्‍त। 16 मिनु पिपमी मेको कली “परमप्रभु यावे आ नेंमी थमा लोव़ ला पचा, दे गिश खेयप कसम जपाइक्‍नना?” देंमाक्‍त। 17 मिनु मीकायामी “गो इस्राएली नेल्‍ल आन कली गोठला मबाक्‍शो भेडा खोदेंशो पा, डांडा मेर ब्रशो तातामी। मिनु परमप्रभु यावेमी ‘मेको मुर आन ठेयब मुर मबाक्‍ब। मेको नेल्‍ल आन थुं नाइश्‍शा आन खिं लमल’ देंशो बाक्‍ब” देंमाक्‍त। गन्‍ती २७:१७; मत्ती ९:३६ 18 मिनु इस्राएल ङा पिपम येहो-शाफात कली “मार एकोम आं पर्बम मरिम्‍शो लोव़ ङा लाक्‍शा अर्को मारेइ मदेंब, देंङा ममाइ ङा?” देंमाक्‍त।

19 मिनु मीकायामी लोव़ तेम्‍शा “एको परमप्रभु यावे आ लोव़ नेनीन। गो परमप्रभु यावे आ स्‍वर्ग ङा गेय पाइब नेल्‍ल आन कली आ ग्‍युरा गे नु आ पेरा गे राप्‍पाइश्‍शा, परमप्रभु यावे आ नित्‍तीकेम बाक्‍शो ताता। २इतिहास १८:१८; अय्‍युब १:६; यसैया ६:१ 20 मिनु परमप्रभु यावेमी ‘आहाब कली रामोथ-गिलाद नु लडाइ पपाइश्‍शा, मेको कली साइक्‍पाइक्‍चा कली सुम क्‍युक्‍बा?’ दें‍त। मिनु काम लोव़ का पाप्‍तु, अर्कोम अर्को लोव़ पाप्‍तु। 21 मिनु नोले का जाक्‍शा, परमप्रभु यावे आ ङोंइती राप्‍शा ‘गो मेको आ थुं क्‍याक्‍नुङ’ दें‍त। यसैया १९:१४ 22 मिनु परमप्रभु यावेमी मेको कली ‘दोपा?’ दे हिल्‍लो पाप्‍तु। मिनु मेकोमी ‘गो लशा मेको आ नोले दुम्‍ब लोव़ पाइब नेल्‍ल आन शोव़मी जोल पाइब सोक्‍त का दुम्‍नुङ’ दें‍त। मिनु परमप्रभु यावेम मेको कली ‘गे थमा पा मेको कली क्‍युक्‍ने चाप्‍नेवे। गे लावो। मिनु इ देंशो पावो’ दें‍त। १यूहन्‍ना ४:६ 23 मोपतीके परमप्रभु यावेम इन नोले दुम्‍ब लोव़ पाइब नेल्‍ल आन शोव़मी जोल पाइब सोक्‍त कुर पशो बाक्‍ब। परमप्रभु यावेम इन कली खतम दुम्‍‍तीक नाक्‍त चाक्‍शो आ पर्बम नेंपाइक्‍ने थुम्‍शो बाक्‍ब” देंमाक्‍त।

24 मिनु केनानाह आ तौ सिदकीयाह, इर ङोइश्‍शा मीकाया आ चोव़चो रबा बाक्‍त। मिनु मेको कली “दोपा परमप्रभु यावे आ सोक्‍त आं रे पा इ थुंम ब्‍वाक्‍थ जाक्‍मे?” देंमाक्‍त। 25 मिनु मीकायाम “गे आंमा आगा ङा कोठाम ख्रुइक्‍थ लवे नाक्‍त, तुइक्‍नेवे” दे मदा बाक्‍त। 26 मिनु इस्राएल ङा पिपम “मीकाया कली ग्‍याइक्‍तीन। मिनु सहर ङा ठेयब मुर आमोन नु पिप आ तौ योआश आस जिम्‍माम गेने। 27 मिनु एको मुर कली चोक्‍शा वोतीन। गो रिम्‍शो पा लेश्‍शा मजाक्‍ङा सम्‍म एको कली शोब्‍ले नु ब्‍वाक्‍कु ङा लाक्‍शा अरु मारेइ मगेने” देंमाक्‍त। 28 मिनु मीकायाम मेको कली “गे रिम्‍शो पा लेश्‍शा जाक्‍तीनी हना, परमप्रभु यावे गो नु मब्‍वाक्‍शो बाक्‍माक्‍त, देंनुङ” देंमाक्‍त। मिनु मेकोम चिनु लोव़ तेम्‍शा “गे नेल्‍लेम एको लोव़ नेंशा, इन थुंम वोतीन” देंमाक्‍त।

29 मिनु इस्राएल ङा पिप नु यहूदा ङा पिप येहो-शाफात रामोथ-गिलाद लसा बाक्‍त। 30 मिनु इस्राएल ङा पिपम येहो-शाफात कली “गो मतुइक्‍चा ङा वा फेक्‍शा लडाइ पथ लाइनुङ। तन्‍न गे इन फेक्‍तीक वा फेक्‍शा बाक्‍कीन” देंमाक्‍त। मिनु इस्राएल ङा पिप मतुइक्‍पांइसीचा ङा वा फेक्‍शा लडाइ पथ लमाक्‍त। 31 मिनु अराम ङा पिपम आ ३२ जना बग्‍गी ङोइश्‍शा लडाइ पाइब आन ठेयब मुर आन कली “इस्राएल ङा पिप ङा लाक्‍शा अरु आइक्‍च ठेयब सुइ नु लडाइ मपने” दे हुकुम गेशो बाक्‍माक्‍त। 32 मिनु बग्‍गी ङोइश्‍शा, लडाइ पाइब आन ठेयब मुरपुकीम येहो-शाफात कली तशा “थमा पा इस्राएल ङा पिप मेकोन बाक्‍ब” देंशा, मेको नु लडाइ पचा कली ल‍मा बाक्‍त। तन्‍न येहो-शाफात ठेयब सेंदा पा वाइ ब्रेम्‍माक्‍त। 33 मिनु मेको बग्‍गी ङोइश्‍शा, लडाइ पाइब आन ठेयब मुरपुकीम “एको दा इस्राएल ङा पिप ममाइ बाक्‍माक्‍त” दे तुइक्‍तमे बाक्‍त। मिनु मेको कली खेदा पचा प्रोंइशा लेम्‍मा बाक्‍त। 34 तन्‍न मुर कामी आ लिब्रा खुक्‍शा, हेंथे पा ब्रा आप्‍शा सोइक्‍ता बाक्‍त। मिनु मेको ब्रामी इस्राएल ङा पिप आ कुचु तेक्‍तीक पाता आ बोंइसेम ख्रवा बाक्‍त। मिनु पिपम आ बग्‍गी खुल्‍ब कली “बग्‍गी हिरशा लडाइ रे ग्रुंइदी। गो ठेयब गार दुम्‍शो बाक्‍नुङ” देंमाक्‍त। 35 मिनु नाक्‍त रे ठेयब लडाइ दुम्‍माक्‍त। पिप चहिं आ बग्‍गीम अरामी आन ङोंइती राप्‍शा बाक्‍शो बाक्‍माक्‍त। मेको आ गार रे ग्रूशो हुश बग्‍गी आगामीन शाइश्‍शो बाक्‍माक्‍त। मिनु मेको पिप मेको नाक्‍दोन बेक्‍माक्‍त। 36 मिनु नां लाक्‍गा नोले लडाइ पाइब आन हुलम “मुर नेल्‍ल इन सहर सहर नु इन बाक्‍तीक लने” देंशो लोव़ नेन्‍मे बाक्‍त।

37 मोपा पिप बेक्‍माक्‍त। मिनु मुरपुकीम मेको कली सामरीयाम चाक्‍शा थिम्‍मे बाक्‍त। 38 मिनु मेकोपुकीम मेको बग्‍गी सामरीया ङा दोम्‍ली काम मुरमे बाक्‍त। मेकेर कुचुमपुकीम आ हुश तुक्‍गमे बाक्‍त। तेल्‍लेमपुकी मेकेर जाक्‍शा, चिक्‍सी‍मा बाक्‍त। मोपा परमप्रभु यावे आ देंशो खोदेंशो दुम्‍माक्‍त। १राजा २१:१९; २राजा ९:२५-२६ 39 आहाब आ पशो अरु गेय, मेको आ पशो नेल्‍ले, मेको आ सेल्‍शो हात्ती आन ख्रुइ के खिं नु मेको आ सेल्‍शो सहरपुकी, मार, मेको इस्राएल ङा पिप आन इतिहासम ब्रेक्‍शो मबाक्‍बा ङा? 40 मोपा आहाब बेक्‍माक्‍त। मिनु मेको आ पा ङा आ तौ अहाज्‍याह पिप दुम्‍माक्‍त।

41 आसा आ तौ येहो-शाफात यहूदा ङा पिप दुम्‍माक्‍त। मेना इस्राएल ङा पिप आहाबम सासन पशो ४ बर्स दुम्‍शो बाक्‍माक्‍त। १राजा १५:२४ 42 येहो-शाफात पिप दुम्‍मेनु ३५ बर्स दुम्‍शो बाक्‍माक्‍त। मिनु मेकोम यरूसलेमम २५ बर्स सासन पवा बाक्‍त। मेको आ ममा आ नें अजुबाह बाक्‍माक्‍त। मेको शिल्‍ही आ तमी बाक्‍माक्‍त। 43 मेको गेना हना यो आ आफ आसा आ लांम गाक्‍माक्‍त। मिनु मेको रे गेनायो मलेम्‍माक्‍त। मेकोमी परमप्रभु यावे आ ङोंइती मार रिम्‍शो बाक्‍मे, मेको पवा बाक्‍त। मो हना यो मेकोम डांडा मेर सेल्‍शो थानपुकी मप्रेदा बाक्‍त। मिनु मेना सम्‍म मुरपुकीम मेकेर पूजा पना पन धूप चोना चोन बाक्‍मा बाक्‍त। 44 येहो-शाफात इस्राएल ङा पिप नु यो गारशा बाक्‍माक्‍त। १राजा १५:१४; २राजा १२:४

45 येहो-शाफात आ पशो अरु गेय, आ सक्ति कोंइशो, मेको आ लडाइ पशो, मार, मेको यहूदा ङा पिप आन इतिहासम ब्रेक्‍शो मबाक्‍बा ङा? 46 मेकोमी आ आफ आसा आ पालाम लीशो थान ङा तेल्‍लेम वोंइश मुर आन कली क्‍याम्‍दा बाक्‍त। २इतिहास १७:-२०:-

47 मेना एदोमम सुइ पिप मबाक्‍मा बाक्‍त। मिनु मेकेर सोइश्‍शो मुर कामी मेको रागीम सासन पवा बाक्‍त। १राजा १५:१२ 48 येहो-शाफातम ओफीर रे सुन चाक्‍चा कली टारसीस ङा खोदेंशो पा जहाजपुकी सेल्‍पदा बाक्‍त। तन्‍न मेकोपुकी एस्‍योन-गेबेरम बिग्रेतीके समुन्‍द्रम लने मचाप्‍‍मे बाक्‍त। 49 मेना आहाब आ तौ अहाज्‍याहम येहो-शाफात कली “इन गेय पाइबपुकी आं गेय पाइब नु जहाजम लचा गेने” देंमाक्‍त। तन्‍न येहो-शाफात मबिस्‍से बाक्‍त। १राजा ९:२८ 50 मिनु नोले येहो-शाफात बेक्‍माक्‍त। मिनु मेको आ आफ दाऊद आ सहरम थिम्‍चा पुंइसे बाक्‍त। मिनु मेको आ पा ङा आ तौ येहोराम पिप दुम्‍माक्‍त।

51 आहाब आ तौ अहाज्‍याह सामरीयाम इस्राएल ङा पिप दुम्‍माक्‍त। मिनु मेकोम बर्स निक्‍शी इस्राएलम सासन पवा बाक्‍त। मेना यहूदा ङा पिप येहो-शाफात पिप दुम्‍शो १७ बर्स दुम्‍शो बाक्‍माक्‍त। २राजा ८:१६ 52 पिप अहाज्‍याहमी परमप्रभु यावे आ ङोंइती मार मरिम्‍शो बाक्‍मे, मेको पवा बाक्‍त। मेको आ आंम आफ नु इस्राएली आन कली पाप पपाइक्‍ब नेबात आ तौ येरोबाम आ लांम गाक्‍माक्‍त। १राजा २२:४० 53 मेकोम बाल देवता कली पूजा पवा बाक्‍त। मेकोमी आ आफोम परमप्रभु यावे, इस्राएली आन परमप्रभु कली गाइक्‍पाइश्‍शो खोदेंशो पा, मेकोमी यो परमप्रभु कली गाइक्‍पदा बाक्‍त। १राजा १२:२८-३०