2
परमप्रभु आ योव़शो मुर
1 मोपतीके गे नेल्ल मरिम्शो पचा, मुर आन कली मरिम्शो लोव़ पतीक नु गाइक्तीके ताइक्तीन। मिनु जोल पतीके, गेहे पतीके नु मुर आन लोव़ कुरशा गाक्चा नेल्ल ताइक्तीन। याकूब १:२ 2 नक थिशो आलम दूध तूचा माल्शो खोदेंशो पा, गे यो परमप्रभु यावे आ लोव़ तुइक्चा मालीन। गे मोदेंशो पाइतीनी हना, इन पाप रे ब्रोंइशो थुं बारना बारन लाइब। हिब्रू ५:१२-१३; मत्ती १८:३ 3 मारदे हना गेमी परमप्रभु रिम्शो पाइब बाक्ब, दे तुइक्नीनी। भजन संग्रह ३४:१०
4 येसु ख्रीस्त ब्रोंइचा गेब फुल्लु बाक्ब। मेको आ नेक्था लने। मुरपुकीमी मेको कली ममाल्शो फुल्लु खोदेंशो पा ताइक्ताक्म। तन्न परमप्रभु यावेमी “मेको कली योव़शो नु नेल्ल क्येङा दाक्शो बाक्ब” दे मिम्ब। भजन संग्रह ११८:२२; यसैया ८:१४-१५; मत्ती २१:४२ 5 मिनु गे यो ब्रोंइचा गेब फुल्लु खोदेंशो बाक्नीनी। मोपतीके परमप्रभु यावे आ सोक्तीम सेल्शो खिं ङा फुल्लु दुमीन। परमप्रभु यावे आ ङोंइती राप्ब मुर दुमीन। आ सोक्त ङा चढ़ेतीक गेय पा बाक्कीन। येसु ख्रीस्त आ पतीके परमप्रभु यावेमी इन पशो ताक्ब। एफिसी २:२१-२२; हिब्रू ३:६; रोमी १२:१ 6 मारदे हना परमप्रभु यावे आ लोव़मी मार ब्रेक्शो बाक्ब देंशा हना “नेनीन, गो सियोन डांडामी फुल्लु का वोइक्नुङ। मेको सुर ङा फुल्लु दुम्शा, योव़सीशा नु दाक्सीशा बाक्ब। सु सुमी मेको कली थमा सुदमे, मेको मुर मुने दोक्चा ममाल्नीम” दे ब्रेक्शो बाक्ब। यसैया २८:१६ 7 मोपतीके थमा सुइक्बपुकीमी मेको कली दाक्नीम। तन्न थमा मसुइक्ब खिं सेल्बपुकीमी मेको फुल्लु कली ताइश्शो बाक्तेक्म। तन्न मेको सुर ङा फुल्लु दुम्त। 8 मिनु लेंशा “मेको फुल्लुमी मुर आन कली दाइल पपाइक्ब। मेको ठेयब फुल्लुमी मुर आन कली थिप्पाइक्ब” दे ब्रेक्शो बाक्ब। मुरपुकीमी परमप्रभु यावे आ लोव़ मटितीके दाइल पांइसीनीम, दे ङोंइती मेको आ पर्बम देंशो बाक्ब। भजन संग्रह ११८:२२; यसैया ८:१४; रोमी ९:३३; लूका २:३४
9 तन्न गे परमप्रभु यावे आ योव़शो मुर दुम्तीके, आ राज्य ङा चढ़ेब परमप्रभु यावे आ रागी ङा मुर दुम्तीनी। मारदे मोदेंशो दुम्तीनी देंशा हना, परमप्रभु यावेमी इन कली रिम्शो पशा, छिङछिङ रे ग्रुंइशा, आंम आ छक लाक्चा ङा छेङछेङमी वोइश्शो बाक्त। मिनु अरु नेल्ल आन कली शेंचा, दे मोदेंशो दुम्तीनी। प्रस्थान १९:६; यसैया ४३:२१; प्रकाश १:६; ब्यवस्था ४:२०; ब्यवस्था ७:६; एफिसी ५:८ 10 ङोंइती गे परमप्रभु यावे आ मुर मबाक्नी। मुल परमप्रभु यावे आ मुर दुम्तीनी। ङोंइती गे परमप्रभु यावे आ शिशी मतशो बाक्तीनी। तन्न मुल परमप्रभु यावे आ शिशी ताइब दुम्तीनी। होसे २:२५; रोमी ९:२४-२६
थमा सुइक्ब दोपा बाक्चा माल्नीमी
11 आं दाक्शो लोक्बपुकी, गो इन कली इन थुं बारपाइक्तीक लोव़ पाइनुङ। गो रागीम बाक्यानु, रागी ङा पौना खोदेंशो बाक्नय। मोपतीके इन दला दाक्स पा रागी ङा मुर खोदेंशो मपने। ग्रांग्रा दिचा ङा गेय रे ङोन बाक्कीन। मारदे हना मोदेंशो गेय इन थमा सुइक्तीक थुं नु जीब। भजन संग्रह ३९:१३ 12 थमा मसुइक्ब आन दातेमी रिम्शो पने। मेकोपुकीमी इन पर्बम “मरिम्शो पाइब बाक्नीम” दे मरिम्शो लोव़ पाम्तेक्म हना यो, इन रिम्शो पतीक तशा, परमप्रभु यावे नु ग्रुम्ची ना मेकोपुकीमी परमप्रभु यावे कली ठेयब सेल्मेक्ल। मत्ती ५:१६
13 प्रभु आ पर्बम सरकारमी अधिकार गेशो मुर आन कली टिने। पिप नेल्ल क्येङा ठेयब बाक्ब। मोपतीके टिचा माल्नीनी। रोमी १३:१-७; तीतस ३:१ 14 मिनु आ वोइश्शो ठेयब मुर आन कली यो टिचा माल्नीनी। मेकोपुकी मरिम्शो पाइब आन कली सजाइ गेचा नु रिम्शो पाइब आन कली “गे रिम्शो पाइतीनी” देंचा कली वोइश्शो बाक्नीम। 15 परमप्रभु यावे आ दाक्शो मार बाक्ब देंशा हना, इन रिम्शो पतीकेमी मतुइक्ब नु निप्स मपाइश्शो आन कली सिक्सी पपतीन। १पत्रुस ३:१६; तीतस २:८ 16 पाप रे प्रोंइचा पुंइसीशो मुर दुम्शा बाक्कीन। “पाप रे ब्रोंइचा ताइनुङ” दे मिम्शा मरिम्शो मपने। परमप्रभु यावे आ वाइलीम वाइल दुम्शा बाक्कीन। गलाती ५:१३; २पत्रुस २:१९ 17 मुर नेल्ल आन कली मान पने। थमा सुइक्ब आन कली दाक्तीने। परमप्रभु यावे कली मान पा हिनीन, पिप कली मान पने। रोमी १२:१०; हितोपदेस २४:२१
येसु आ श्येत जशो कोंइतीके
18 गे खिं ङा गेय पाइबपुकी, इन होव़प क्येङा हिंशा टिने। रिम्शो पाइब होव़प कली ला ममाइ, मरिम्शो होव़प कली यो टिचा माल्नीनी। एफिसी ६:५; तीतस २:९ 19 इन होव़पमी इन कली बित्चीम श्येत गेम्तेक्म हना यो, गे परमप्रभु यावे कली मिम्शा, श्येत फाल्शा बाक्कीन। मेको परमप्रभु यावे आ दाक्शो बाक्ब। 20 गे मरिम्शो पशा, तुप्चा पुंइसीनीनु, मेको फाल्शा बाक्तीनी हना, मार रिम्शो पनी ङा? रिम्शो पशा यो, श्येत गेचा पुंइसीशा, फाल्शा बाक्तीनी हना, परमप्रभु यावे आ दाक्शो पाइनीनी। १पत्रुस ३:१४; मत्ती ५:१० 21 मोदेंशो पचा, दे योव़शो ननी। ख्रीस्त यो इन पर्बम श्येत जशा, इन कली कोंइतीक दुम्त। मोपतीके गे आ खोदेंशो पचा माल्नीनी। १पत्रुस ३:१८; मत्ती १६:२४ 22 मेकोमी काइ पाप मपवो। जोल यो मपवो। यूहन्ना ८:४६; यसैया ५२:९ 23 मुरपुकीमी मेको कली शुक्शी लोव़ पाम्तेक्म हना यो, मेको आन कली लोव़ मलेत्त। मिनु श्येत जशा यो, मुर आन कली हिंच मकोंइद। तन्न ठीक पा निसाफ पाइब कली जिम्मा गेंसाक्व। 24 मेको इं पाप क्याम्चा कली शीमी क्येप्शा कांटी थोक्शा साइक्चा पुंइसाक्व। इं पाप पतीक थुं साइक्चा नु इं ठीक पतीक थुं प्रोंइचा, दे साइक्चा पुंइसाक्व। मोपा मेको आ कांटी थोक्शो गारपुकीमी गे साशा ठीक दुम्तीनी। १यूहन्ना ३:५; गलाती ३:१३; रोमी ६:८,११ 25 ङोंइती गे हेंथे गाक्ब भेडा खोदेंशो बाक्तीनी। तन्न मुल इन गोठला नु इन थुं कोव़ब आ नेक्था लेश्शा जाक्तीनी। यसैया ५३:६; यूहन्ना १०:१२