1 परमप्रभु यावे आ सोक्‍तीमी “नोले ङा नाक्‍तीम का निक्‍शी थमा सुइक्‍बपुकीमी थमा सुइक्‍चा प्रोंइनीम। मेको मुरपुकीमी हेंथे लां कोंइब नु जोल पाइब वोल आन शेंशो नें‍नीम” देंत। मत्ती २४:२४; २थिस्‍सलोनिकी २:३; २तिमोथी ३:१; २पत्रुस ३:३; १यूहन्‍ना २:१८; यहूदा १८ 2 मेको मुर आन थुं ङा मिम्‍तीके खतम दुम्‍ब। मिनु जोल शेंनीम। 3 मेकोमी “ग्‍युंबे पचा मदुम्‍ब, का निक्‍शी थोव़क जचा मदुम्‍ब” दे शेंनीमी। परमप्रभु यावेमी थमा सुइक्‍ब आन कली सेल्‍शा गेशो मेको जचा थोव़क “गे रिम्‍शो पाइब बाक्‍नीनी” दे जचा ब्‍वचा दुम्‍ब। उत्‍पत्ती ९:३; १कोरिन्‍थी १०:३०-३१; कलस्‍सी २:२३ 4 तन्‍न परमप्रभु यावे आ सेल्‍शो नेल्‍ल रिम्‍शो बाक्‍ब। मुरुमी परमप्रभु यावे कली “गे रिम्‍शो पाइतीनी” दे नेल्‍ल जचा ब्‍वचा दुम्‍ब। उत्‍पत्ती १:३१; मत्ती १५:११; प्रेरित १०:१५ 5 मारदे हना परमप्रभु यावे आ लोव़ नु प्रार्थनामी मेको नेल्‍ल परमप्रभु यावे आ गेशोन बाक्‍ब, दे तुंइ‍सीब।

6 गे एको लोव़ थमा सुइक्‍ब लोक्‍ब आन कली शेंताक्‍वी हना, ख्रीस्‍त येसु आ रिम्‍शो गेय पाइब दुम्‍नेवे। गे थमा सुइक्‍तीक ङा लोव़ नु रिम्‍शो शेंतीके तुइक्‍ना तुइक्‍न आ नोले खोइक्‍नेवे। २तिमोथी २:१५ 7 तन्‍न मुरुमी सेल्‍शो नु मरिम्‍शो कथापुकी मनेनो। परमप्रभु यावे कली मिम्‍शा दाक्‍शा बाक्‍को। १तिमोथी ६:२०; २तिमोथी २:१६,२३; २तिमोथी ४:४; तीतस १:१४; तीतस ३:९ 8 रां कली रिम्‍शो पतीके इच्‍का ला रिम्‍शो बाक्‍ब। परमप्रभु यावे कली मिम्‍शा दाक्‍तीके नेल्‍ल क्‍येङा रिम्‍शो बाक्‍ब। मारदे हना मुल कली रिम्‍शो बाक्‍ब नु गेना हना यो परमप्रभु यावे नु बाक्‍चा कली नोले यो रिम्‍शो बाक्‍ब। १तिमोथी ६:६ 9 एको देंशो लोव़ थमा बाक्‍ब नु नेल्‍ल थमा सुइक्‍चा माल्‍शो बाक्‍ब। 10 एको लोव़ शेंशा श्‍येत जशा, शेंतीक गेय पाइनय। मारदे हना ब्रोंइचा गेब परमप्रभु यावे कली आस पाइनय। मेको नेल्‍ल मुर आन कली प्रोंइब बाक्‍ब। मोपा थमा सुइक्‍बपुकी पाप रे ब्रोंइचा ताइनीम।

11 एको लोव़ अरेशा शेंदो। 12 गे ठिटा बाक्‍ते हना यो, लोव़ पतीकेमी, मुर नु गेय पतीकेमी, दाक्‍तीकेमी, थमा सुइक्‍तीकेमी नु ग्रांग्रा मदि‍शोमी थमा सुइक्‍ब नेल्‍ल आन कली कोंइतीक दुमो। मिनु तोक्‍शो लोव़ पचा मगेमी। तीतस २:१५; २तिमोथी २:२२ 13 गो मजाक्‍ङा सम्‍म मुर आन कली परमप्रभु यावे आ लोव़ पढेशा, नेंपाइक्‍ना पाइक्‍न नु शेंना शेंन बाक्‍को। 14 थमा सुइक्‍ब आन शेंब खाल्‍पापुकीमी इ पिया तारी गुइ वोइश्‍शा, परमप्रभु यावेमी तुइक्‍पाइश्‍शो लोव़ पशा, इ कली गेय पतीके सक्ति गेशो बाक्‍त। मेको गेय रिम्‍शो पा पावो। १तिमोथी १:१८; १तिमोथी ५:२२; प्रेरित ६:६; प्रेरित ८:१७; २तिमोथी १:६ 15 मोपा बाक्‍को। मेको इ पशो तशा, नेल्‍लेमी इ थमा सुइक्‍तीके बारशो तामेक्‍ल। 16 आंम कली नु इ शेंतीके कली रिम्‍शो पा होस पावो। मोदेंशो पा, गे आंम इ कली नु इ लोव़ नेंब आन कली श्‍येत रे प्रोंइनेवे। रोमी ११:१४