1 वाइलीम वाइल नेल्‍लेमी आन होव़प मान ताक्‍चा शिरशो बाक्‍नीम, दे मिम्‍चा माल्‍नीम। मोपा मुरपुकीमी परमप्रभु यावे आ नें नु आ शेंतीके आइक्‍च मसेल्‍नीम। एफिसी ६:५; तीतस २:९-१० 2 सु सु आन होव़प थमा सुइक्‍ब बाक्‍मा, मेको आन पर्बम “थमा सुइक्‍ब लोक्‍ब दुम्‍शा, मान गेचा ममाल्‍नुङ” दे ममिम्‍तमेक्‍ल। मेकोपुकीमी ङोंइती क्‍येङा रिम्‍शो पचा माल्‍नीमी, दे मतो। मारदे हना मेको आन गेय गेब थमा सुइक्‍ब नु दाक्‍शो मुर दुम्‍त। मोदेंशो पचा शुश शेंदो। फिलेमोन १६

3 सुमी अरु शेंतीक शेंबा, मेकोमी इं प्रभु येसु ख्रीस्‍त आ थमा लोव़ नु आ शेंतीके नु मगारचा ङा शेंब। मेको आं देंशो थमा लोव़ चहिं परमप्रभु यावे कली मिम्‍ब नु दाक्‍ब थुं रे बाक्‍ब। २तिमोथी १:१३ 4 मेको अरु लोव़ शेंब ठेयब लेश्‍शो मारेइ मजोक्‍ब बाक्‍नीम। आन लोव़ ला आ तार पशा, जिचा पोक्‍चा माल्‍नीम। मेकोपुकीमी गेहे पाइब, जीब, मरिम्‍शो लोव़ पाइब नु मरिम्‍शो मिम्‍ब सेल्‍नीम। २तिमोथी २:१४; तीतस ३:१०-११ 5 मेकोपुकीमी मुर आन दातेमी जिचा पोक्‍नीम। आन थुं गशो खोदेंशो दुम्‍शा, थमा लोव़ रुप्‍‍ने मचाप्‍नीम। परमप्रभु यावे कली मिम्‍चा, दाक्‍चा क्‍येट चेम्‍तीके बाक्‍ब, दे मिम्‍नीम। 6 परमप्रभु यावे कली बोल्‍यो थमा सुइक्‍चा चहिं थुं नाइक्‍तीक बाक्‍ब। १तिमोथी ४:८; मत्ती ६:२५-३४; फिलिप्‍पी ४:११-१२; हिब्रू १३:५ 7 मारदे हना गोपुकीम जरमेशोनु, मारेइ पने मचाक्‍नय। बेक्‍शोनु यो मारेइ मलाइक्‍नय। अय्‍युब १:२१; भजन संग्रह ४९:१८; उपदेसक ५:१४ 8 जचा फेक्‍चा गाप्‍त हना, ग्‍येरसय। हितोपदेस ३०:८ 9 तन्‍न सु सु शुश क्‍येट थीब दुम्‍चा दाक्‍नीमी, मेको आन थुं थाम्‍चा पुंइसीशा, ग्‍याइलीम रेश्‍शो खोदेंशो पा, निप्‍स मपाइश्‍‍शो नु श्‍येत जाइब दुम्‍नीम। आंम कली खतम सेल्‍सीशो बाक्‍नीम। हितोपदेस २८:२२; मत्ती १३:२२ 10 क्‍येट कली दाक्‍ब मरिम्‍शो आन क्‍येङा यो मरिम्‍शो बाक्‍ब। मोपा क्‍येट दाक्‍ब का निक्‍शीमी थमा सुइक्‍तीके प्रोंइशा, आंम थुं कली तूशो खोदेंशो पा शुश खाइक्‍पाइक्‍तेक्‍म। एफिसी ५:५; १तिमोथी १:१९

11 मोपतीके गे परमप्रभु यावे आ मुर दुम्‍शा, मेको नेल्‍ल रे ङोन बाक्‍को। ठीक पतीके, परमप्रभु यावे कली मिम्‍शा दाक्‍चा, थमा सुइक्‍चा, मुर आन कली दाक्‍चा, थमा सुइक्‍चा मप्रोंइचा नु ब्रेम्‍शो दुम्‍चा ला मिम्‍तो। २तिमोथी ३:१७; २तिमोथी २:२२ 12 थमा सुइश्‍शा ग्राङो। “गेना हना यो परमप्रभु यावे नु बाक्‍ब दुम्‍ती” दे मिम्‍तो। गे शुश मुर आन ङोंइती इ थमा सुइश्‍शो आ पर्बम रिम्‍शो लोव़ पाप्‍तीवी। मेना गे गेना हना यो ब्रोंइशा बाक्‍चा ताइब, दे ब्रेत्‍चा पुंइसीशो बाक्‍ते। १तिमोथी १:१८; १कोरिन्‍थी ९:२५-२६; २तिमोथी ४:७; १तिमोथी ४:१४; हिब्रू ३:१ 13 नेल्‍ल आन कली ब्रोंइचा गेब परमप्रभु यावे नु ख्रीस्‍त येसु पन्‍तीयस पिलातस कली रिम्‍शो सांकछी गेब बाक्‍त। गो इ कली परमप्रभु यावे नु ख्रीस्‍त येसु आस ङोंइती अरेनुङ। यूहन्‍ना १८:३६-३७; प्रकाश १:५ 14 मार अरेनुङ देंशा हना, इं प्रभु येसु ख्रीस्‍त मजाक्‍म सम्‍म गे मेको आ शेंशो लोव़ मखाल्‍थु शेंदीमी। मिनु सुइमी दोस गेचा मतामेक्‍ल। 15 येसु ख्रीस्‍त जाक्‍मेनु, नेल्‍ल आसीक तशा, नेल्‍ल सक्ति पाइश्‍शो पिप आन पिप नु प्रभु आन प्रभु दुम्‍शा जाक्‍त। ब्‍यवस्‍था १०:१७; प्रकाश १७:१४ 16 मेको ला गेनायो मबेक्‍ब। सुइ आन कोव़ने मचाप्‍चा ङा पा छेङछेङमी बाक्‍ब। सुइमी मेको कली गेनायो मताम। तने यो मचाप्‍नीमी। मेको मान तशा नेल्‍ल क्‍येङा सक्ति पाइश्‍शो बाक्‍ब। आमेन। प्रस्‍थान ३३:२०; यूहन्‍ना १:१८

17 गे मुल शुश क्‍येट थीब आन कली “ठेयब लेश्‍शो मदुमीन। जाम्‍शा लाइब शोंप कली आस मपथु, परमप्रभु यावे कली आस पने। मारदे हना परमप्रभु यावेमी इं कली शुश तेम्‍शा गेब। आ गेशो तशा ग्‍येरसीन” दे माइक्‍मी। भजन संग्रह ६२:११; लूका १२:१५-२१ 18 मेकोपुकीमी रिम्‍शो गेय पतीकेमी गेनायो मनुप्‍ब शोंप पाइश्‍शो दुम्‍मल। हाइश्‍शो दुम्‍शा, मुर आन कली गेब दुम्‍चा माल्‍नीम। 19 मो पाम्‍तेक्‍म हना, नोले रिम्‍शो दुम्‍नीम। बोल्‍यो जग खोदेंशो पा, गेना हना यो ब्रोंइशा बाक्‍चा ताइब दुम्‍नीम। मेको ला थमा ब्रोंइचा बाक्‍ब। मत्ती ६:२०; लूका १६:९

20 तिमोथी, इ कली शेंशो लोव़ रिम्‍शो पा पावो। जाम्‍शा लाइब लोव़ नु जिचा पोक्‍तीक लोव़, तुइक्‍ब थुं रे पीब देंखु पाइनीम। मेको रे ङोन बाक्‍को। २तिमोथी १:१२-१४; १तिमोथी ४:७ 21 मारदे हना का निक्‍शीमी मोदेंशो लोव़ मिम्‍शा पशा, आन थमा सुइक्‍तीके जाम्‍शा लत। परमप्रभु यावे आ शिशी गे नु लील। १तिमोथी १:६; २तिमोथी २:१८