4
एलीशामी वारच पशो
1 मिनु परमप्रभु यावे आ लोव़ पाइब का आ मीश जाक्शा ठेयब सेंदा पा एलीशा कली “इन गेय पाइब आं वोंइश बेक्त। मेको परमप्रभु यावे कली मान पा हिंब बाक्त, दे तुइक्नीनी। तन्न मुल मेको आ जेर जशो मुर जाक्शा आं आल निक्शी आस कली वाइल सेल्चा कली लाइक्चशो बाक्ब” देंमाक्त। 2 मिनु एलीशामी मेको कली “गो इ कली मार पाइनुङा? इ खिंम मार बाक्बा? आं कली देनो” देंमाक्त। मिनु मेकोमी “गो, इन वाइलीम आं खिंम गर का तेल ङा लाक्शा अर्को मारेइ मबाक्ब” देंमाक्त। १राजा १७:१२ 3 मिनु एलीशामी “इ नेक्था ङा मुर आन खिं लशा, श्येत्थ गर का निक्शी ला ममाइ, शुश गर पुंइशा चाक्को। 4 मिनु गे खिं ओव़शा, इ आल आस कली यो आगा ओंइशा, लाप्चो चोक्को। मिनु मेको गर ङा तेल अर्को गर नेल्लेम कुर पावो। मिनु ब्रीशो गार याक्शा वोतो” देंमाक्त। 5 मिनु मेको मीश मुर एलीशा आ बाक्तीक रे गाक्माक्त। मिनु आ खिं जाक्दीश्शा, आ आल आस कली खिंङगा ओंइशा लाप्चो चोक्गा बाक्त। मिनु आ चाक्शो श्येत्थ गर शुशेमी तेल प्रिंदा बाक्त। 6 मिनु मेको गर तेलम ब्रीमा बाक्त। मिनु मेकोमी आ तौ कली “अर्को गर चाक्को” देंमाक्त। मिनु मेकोमी “मुल श्येत्थ गार का यो मबा” देंमाक्त। मिनु तेल यिचा यो देक्माक्त। 7 मिनु मेको लशा, मेको परमप्रभु आ मुर कली शेंदा बाक्त। मिनु मेकोमी “लशा मेको तेल लेयङो। मिनु इ जेर थाप्तो। मिनु लीशो क्येट चहिं इन खिं ङा मुर आन कली थुल्चा कली दुम्ल” दे मदा बाक्त।
एलीशा नु शुनेम ङा मीश मुर
8 काबु नाक्ती एलीशा शुनेम सहर लमाक्त। मेकेर शुश शोंप पाइश्शो मीश मुर का बाक्माक्त। मिनु मेकोम एलीशा कली जथ तूथ ब्रेत्ता बाक्त। मिनु एलीशा मेको मेर गाक्मेनु, जथ तूथ ओव़बाक्माक्त। यहोसु १९:१८ 9 मिनु काबु नाक्त मेको मीश मुरुमी आ वोंइश कली “एको गेना हना यो इं लां रे गाक्ब मुर थमा पा परमप्रभु आ मुर बाक्ब, दे गो तुइक्नुङ। 10 गो तला तार थरपु हिरशा मेको कली आइक्च कोठा का सेल्शा गेय। मिनु मेको कोठाम मेको कली खाट का, टेबल का, नित्तीक का नु बत्ती का वोइश्शा गेचा। मिनु मेको एक जाक्मेनु, मेकेर बाक्तीक पवल” देंमाक्त।
11 मिनु काबु नाक्त एलीशा जाक्शा, नाइक्चा कली मेको कोठाम लशा गोल्माक्त। 12 मिनु मेकोम आ गेय पाइब गेहाजी कली “मेको शुनेम सहर ङा मीश मुर कली ब्रेश्शा कुतो” दे मदा बाक्त। मिनु मेकोम, मेको कली ब्रेत्ता बाक्त। मिनु मेको एलीशा आ ङोंइती जाक्माक्त। 13 मिनु एलीशाम आ गेय पाइब कली “मेको कली ‘गे आं पर्बम इश्का श्येत पाप्तीवी। मुल गो इ कली मार पने चाप्नुङा? मार, गो इ पर्बम पिप नु लडाइ पाइब आन ठेयब मुर नु मारेइ लोव़ पशा गेना?’ दे मेको कली हिल्लो पावो” दे मदा बाक्त। मिनु मेको मीश मुरुमी “गो एक आं मुर आन दातेमीन बाक्नुङ” देंमाक्त। 14 मिनु एलीशाम गेहाजी कली “मो हना मुल गो मेको कली मार पने चाप्नुङा?” देंमाक्त। मिनु गेहाजीम “मेको के तौ मबाक्ब। आ वोंइश खूशो दुम्शो बाक्ब” देंमाक्त। 15 मिनु एलीशामी “मेको कली ब्रेत्तो” देंमाक्त। मिनु गेहाजीम मेको कली ब्रेत्तानु, मेको लाप्चोम राम्माक्त। २राजा २:२५ 16 मिनु एलीशामी “अर्को बर्स इ थुकुम तौ का बाक्ब” देंमाक्त। मिनु मेकोमी “ममाइ, आं प्रभु, गे परमप्रभु आ मुर बाक्नीनी। मोपा इन वाइलीम आं कली जोल मपने” देंमाक्त। उत्पत्ती १८:१०,१४
17 मिनु मेको कोव़ज कुरशो दुम्शा, एलीशाम देंम ना तौ का थिमाक्त।
18 मिनु मेको आल कोल्शा, काबु आ आफ नु खेत्ला आन अन्न खुप्तीकेम लमाक्त। २राजा ४:१६ 19 मिनु मेकोमी आ आफ कली ठेयब सेंदा पा “आं पिया ब्वती, आं पिया ब्वती” देंमाक्त। मिनु आ आफोम आ गेय पाइब का कली “एको कली आ ममा आ बाक्तीक लतो” दे मदा बाक्त। लूका १०:४ 20 मिनु मेको गेय पाइब मुरुम मेको आल कली आ ममा आ बाक्तीक चाक्दीदा बाक्त। मिनु मेको आल आ ममा आ थुकुम नाक्ती उइक्थ दुम सम्म बाक्शा बेक्माक्त। 21 मिनु मेको मीश मुरुमी मेको आल कली इर परमप्रभु आ मुर आ ब्राख्येम लाइश्शा खोल्शा वोइश्शा लाप्चो चोक्शा ग्रूशा गाक्माक्त। 22 मिनु मेकोमी आ वोंइश कली ब्रेश्शा “आं कली गेय पाइब का नु गधा का सोइक्तीनी। मिनु गो रीब पा परमप्रभु आ मुर बाक्तीक लशा लेत्नुङ” देंमाक्त। 23 मिनु आ वोंइशेमी “मुलाक्त मारदे लचा माल्दे? औंसी यो ममाइ, नाइक्तीक नाक्त यो ममाइ” दे मदा बाक्त। मिनु मेकोमी “लचा माल्नुङ” देंमाक्त। 24 मिनु मेकोमी गधाम लगम पाइश्शा, आ गेय पाइब कली “गो नाइक्तो मदेंङा सम्म खुलो देश मपावो” दे मदा बाक्त। 25 मोपा मेको गाक्शा, परमप्रभु आ मुर बाक्तीके कारमेल डांडाम जाक्माक्त। मिनु परमप्रभु आ मुरुम मेको कली ङोन रेन तशा आ गेय पाइब गेहाजी कली “कोव़ङ, दे मेरे जाक्ब शुनेम सहर ङा मीश मुर बाक्ब। 26 गे दोरशा लशा मेरे कली ‘मार नेल्ल रिम्शोन बाक्बा? मार, इ वोंइश रिम्शोन बाक्मे? इ आल रिम्शोन बाक्मे?’ दे हिल्लो पावो” दे मदा बाक्त। मिनु मेकोम हिल्लो पवानु “नेल्ल रिम्शोन बाक्नीम” देंमाक्त। 27 मिनु मेको परमप्रभु आ मुर बाक्तीक डांडाम जाक्शा, एलीशा आ खोइल मुबा बाक्त। मिनु गेहाजी मेको कली फ्राचा कली जाक्मेनु, परमप्रभु आ मुरुम एको कली “मपावो, एको कली ठेयब श्येत दुम्शो बाक्ब। तन्न परमप्रभु यावेमी मेको लोव़ ख्रुइश्शा, आं कली मशेंदी” देंमाक्त। 28 मिनु मेको मीश मुरुमी “ए आं प्रभु, मार गो तौ पुंइशो नङा ङा? आं कली आस कोंइशा मोशा मसेल्यीनी देंशा पुंइशो मनङा ङा?” देंमाक्त। 29 मिनु एलीशाम गेहाजी कली “इ किप्शुर किम्सो। एको आं कोक्के कुरशा दोरशा लावो। लांम सुइ ग्रुम्तीवी हना, मेकोपुकी नु लोव़ पचा कली मदिक्को। सुइमी इ कली लोव़ पाम्तेक्म हना, मेको आन कली लोव़ मलेत्तो। एको आं कोक्के लाइश्शा, मेको आल आ कुलुम वोतो” दे मदा बाक्त। 30 तन्न मेको आल आ ममामी “परमप्रभु यावे ब्रोंइशा बाक्शो खोदेंशो पा नु इन ब्रोंइशा बाक्शो खोदेंशो पा गो इन कली मप्रोंइनुङ” देंमाक्त। मोपतीके एलीशा बोक्शा, मेको मीश मुर आ नोले खोदा बाक्त। 31 गेहाजी चहिं ङोंइती लशा मेको कोक्के मेको आल आ कुलुम वोदा बाक्त। तन्न मेको मारेइ मदुम्माक्त। मोपतीके एलीशा कली ग्रुम्चा कली गेहाजी लेम्माक्त। मिनु मेको कली “मेको आल मसेस” देंमाक्त।
32 मिनु एलीशा खिं जाक्मेनु, मेको आल कली आ ब्राख्येम बेक्शो थिदा बाक्त। 33 मिनु एलीशा आगा ओव़शा लाप्चो चोक्शा, परमप्रभु यावे कली पुना बाक्त। प्रेरित ९:४० 34 मेको नोले मेको ब्राख्येम ङोइश्शा, मेको आल आ शोव़म आ शोव़, मेको आ मिक्चम आ मिक्ची नु मेको आ गुइम आ गुइ वोइश्शा, मेको आल तार गोल्माक्त। मिनु मेको आल होना होन लमाक्त। १राजा १७:२१ 35 मिनु एलीशा बोक्शा कोठाम एर ओंथ पवा बाक्त। मिनु मेको लेंशा खाट ङोइश्शा मेको आल कली कोव़ङानु, मेको आलम ७ खेयप हाक्च पा, आ मिक्च पाक्गा बाक्त। 36 मिनु एलीशाम गेहाजी कली “मेको शुनेम सहर ङा मीश मुर कली ब्रेश्शा, एक चाक्को” दे मदा बाक्त। मिनु मेकोमी मेको कली ब्रेत्ता बाक्त। मिनु मेको मीश मुर जाक्मेनु, एलीशामी मेको कली “इ तौ लतो” दे मदा बाक्त। 37 मिनु मेको आगा ओव़शा एलीशा आ खोइलीम खप सम्मन बाम्माक्त। मिनु मेको नोले आ तौ लाइश्शा ग्रूशा लमाक्त।
बोसुम ओश्येर बाक्शो
38 मिनु एलीशा लेश्शा गिल्गाल लमाक्त। मेना मेको रागीम ठेयब अन्काल दुम्शो बाक्माक्त। परमप्रभु यावे आ लोव़ पाइब आन हुल का मेको आ ङोंइती बाक्मा बाक्त। मिनु मेकोम आ गेय पाइब कली “चुप्लुम ठेयब बोस का काशा एको परमप्रभु यावे आ लोव़ पाइब आन हुल आन कली खोले क्येवो” दे मदा बाक्त। 39 मेको आन दाते ङा का चहिं गिग खाइ माल्थ रू मेर लमाक्त। मिनु ब्वाकी ङा वोबीस थिदा बाक्त। मिनु मेकोम मेको सेक्शा पोल्टो का पा चाक्गा बाक्त। मेकोमी मेको मार बाक्मे, दे मतुइक्थु प्रेक्शा खोलेम सुप्ता बाक्त। 40 मिनु मुरपुकीम जामेक्ल, दे मेको तेम्शा ख्रेत्तीमी बाक्त। मिनु मेकोपुकीम जशा, ठेयब सेंदा पा “ए परमप्रभु आ मुर, एको बोसुम दा ओश्येर कका बाक्त” देंमा बाक्त। मिनु मेकोपुकीम मेको जने मचाप्मे बाक्त। 41 मिनु एलीशाम “इच्का खोइ फस चाक्कीन” देंमाक्त। मिनु मेकोम मेको फस बोसुम कुर पवा बाक्त। मिनु मेकोमी “मुल मेको आन कली एको जचा गेने” देंमाक्त। मेको नोले मेको बोसुम ओश्येर मबाक्माक्त।
सहे का मुर आन कली थुल्शो
42 मिनु बाल-शालीशा ङा मुर काम परमप्रभु आ मुर कली आ ङोंइती मीशो क्योव़ज के २० ओटा शोब्ले नु नक मीशो अन्न चाक्शा जाक्माक्त। मिनु एलीशाम “एको मुर आन कली जचा गेने” देंमाक्त। मत्ती १५:३३,३७; मत्ती १६:९-१०; यूहन्ना ६:९ 43 मिनु मेको आ गेय पाइबमी “गो एको सहे का मुर आन कली जचा थोव़क दोपा जचा गेनुङमी” देंमाक्त। मिनु मेकोमी लेंशा “एको मुर आन कली जचा गेमी। मारदे हना परमप्रभु यावेम ‘मेको नेल्लेम जशा यो, इच्का हेंब’ देंशो बाक्ब” देंमाक्त। 44 मिनु मेकोमी मुर आन ङोंइती ख्रेत्तीमी बाक्त। मिनु परमप्रभु यावे आ देंशो खोदेंशो पा, मेको मुरपुकीम जशा यो हेंमाक्त।