6
खा ब्वाक्कु तार ग्रूशो
1 परमप्रभु यावे आ लोव़ पाइब आन हुल काम एलीशा कली “एको इं बाक्शो खिं इं कली थम आइक्च बाक्ब। 2 मुल गो यर्दन खोला आ नेक्था लय। मिनु मेकेर नेल्लेम शी चाक्शा खिं का सेल्सय” देंमा बाक्त। मिनु एलीशाम “दुम्ब लने” देंमाक्त। 3 मिनु मेको आन दाते ङा काम “गे यो इन गेय पाइबपुकी नु लाइनीनी?” देंमाक्त। मिनु एलीशाम “दुम्ब गो यो लाइनुङ” देंमाक्त। 4 मिनु एलीशा मेकोपुकी नु लमाक्त। मिनु मेकोपुकी यर्दन खोला जाक्दीश्शा रवा तिम्चा गोव़मे बाक्त। 5 मिनु मुर काम रवा तिम्ना तिम्न पवानु, आ खा बुइश्शा ब्वाक्कुम ओव़माक्त। मिनु मेको ठेयब सेंदा पा “आबी, आं प्रभु, मेको दा पुंइशा चाक्शो खा कका बाक्ब” देंमाक्त। 6 मिनु मेको परमप्रभु आ मुरुम “मेको ते दोक्म” दे हिल्लो पवा बाक्त। मिनु मेकोम एकेर दोक्त, दे कोंइदा बाक्त। मिनु एलीशाम मेकेर शी का ख्रोइश्शा ब्वारदा बाक्त। मिनु मेको खा ब्वाक्कु तार ग्रूमाक्त। 7 मिनु एलीशाम “शोल्शा लतो” देंमाक्त। मिनु मेको मुरुम आ गुइ दिंशा शोल्शा लदा बाक्त।
एलीशाम मिक्च मताइब सेल्शो
8 काले अराम ङा पिप इस्राएल नु लडाइ पना पन बाक्माक्त। मिनु मेकोम आ गेय पाइब लडाइ पाइब आन ठेयब मुरपुकी नु सल्ला पा “गो आं बाक्तीक मेकेर सेल्नुङ” देंमाक्त। 9 मिनु परमप्रभु आ मुरुम इस्राएल ङा पिप कली “मेकेर रे गाक्ची ना होस पा गाक्कीन। मारदे हना अरामी मेकेर लशो बाक्नीम” देंमाक्त। 10 मोपतीके इस्राएल ङा पिपमी आ मुर आन कली मेकेर गाक्नीनु “होस पा गाक्कीन” दे का निक्शी खेयप हिंच कोंइदा बाक्त। मिनु मेकोपुकी होस पा बाक्मा बाक्त।
11 मोपतीके अराम ङा पिपमी “इस्राएल ङा पिपम इं बाक्तीक दोपा तुइक्ता” दे थाम्पा गाइक्ता बाक्त। मिनु मेकोम आ लडाइ पाइब आन ठेयब मुर आन कली ब्रेश्शा “गे इन दाते ङा सुमी चहिं इस्राएल ङा पिप कली लोव़ शेंदीनी? लो, देनीन” देंमाक्त। 12 मिनु मेको लडाइ पाइब आन ठेयब मुर आन दाते ङा काम “आं प्रभु पिप, आं प्रभु, गो सुइम मो मपक। तन्न इस्राएल ङा परमप्रभु यावे आ लोव़ पाइब एलीशाम गे इन इप्तीक कोठाम ब्वाक्शो यो शेंब” देंमाक्त। 13 मिनु पिपमी “मेको ते बाक्मे माल्शा तुइश्शा जाक्कीन। मिनु गो मुर आन कली सोइश्शा, मेको कली ग्याइक्पाइक्नुङ” देंमाक्त। मिनु मेकोम “मेको दोथान सहरम बाक्ब” देंमाक्त। 14 मिनु पिपम शारा नु बग्गी पाइश्शो ठेयब सक्ति पाइश्शो लडाइ पाइब आन हुल का मेक सोइक्ता बाक्त। मिनु मेकोपुकी नाक्दो लशा, मेको सहर पुम्दमे बाक्त।
15 मिनु परमप्रभु आ मुर आ गेय पाइब सुनी कना बोक्शा लाङगा ग्रूमाक्त। मिनु मेना शारा नु बग्गी पाइश्शो लडाइ पाइब आन हुलमी सहर पुम्शो तवा बाक्त। मिनु मेको गेय पाइब लशा आ होव़प कली “आबी, आं प्रभु, मुल मार पय” देंमाक्त। 16 मिनु मेको परमप्रभु यावे आ लोव़ पाइबमी “महिनो। मेकोपुकी नु बाक्शो आन क्येङा गो नु बाक्शो शुश बाक्नीम” देंमाक्त। 17 मिनु एलीशामी “परमप्रभु यावे, एको आ मिक्च ताइब सेलीन। मिनु एकोम तवल” दे पुना बाक्त। मिनु परमप्रभु यावेम मेको गेय पाइब आ मिक्च ताइब सेला बाक्त। मिनु मेकोमी एलीशा आ एर ओंथ ङा डांडा नेल्लेम मी ब्रशो शारा नु बग्गीम ब्रीशो तवा बाक्त। यहोसु ५:१३ 18 मिनु अरामीपुकी तोइश्शा मेको आ बाक्तीक पिमानु, एलीशाम परमप्रभु यावे कली “एको मुर आन कली मिक्च मताइब सेलीन” दे पुना बाक्त। मिनु एलीशाम पुंइशो खोदेंशो पा, परमप्रभु यावेम मेको आन कली मिक्च मताइब सेल्मी बाक्त। उत्पत्ती १९:११ 19 मिनु एलीशाम मेको आन कली “एको लां ममाइ। एको सहर यो ममाइ। गे आं नोले खोइय्यीनी। मिनु गो इन माल्शो मुर आ बाक्तीक चाक्दीत्नन्नी” दे माइक्मी बाक्त। मिनु एलीशाम मेको आन कली सामरीयाम चाक्दीम्मी बाक्त।
20 मिनु मेकोपुकी सामरीया सहरम जाक्दीम्मा नोले एलीशाम “ए परमप्रभु यावे, एको मुर आन कली मिक्च ताइब सेलीन। मिनु एकोपुकीम लेंशा तने चाप्मेक्ल” दे पुना बाक्त। मिनु परमप्रभु यावेमी मेको आन कली मिक्च ताइब सेल्मी बाक्त। मिनु मेकोपुकीम कोव़ङमेनु, सामरीया सहरम बाक्शो तामे बाक्त। 21 मिनु इस्राएल ङा पिपमी मेको आन कली तशा, एलीशा कली “आं आफ, मार गो एको आन कली सदुमी। एको आन कली सदुमी?” दे हिल्लो पवा बाक्त। 22 मिनु एलीशाम “मेको आन कली मसतीन। मार, गे आंमा इन लिब्रा नु तरवारम ग्याइश्शो आन कली साइक्ने चाप्नीनी ङा? गे एको मुर आन कली जचा तूचा गेने। मिनु एकोपुकी जशा तूशा आन होव़प बाक्तीक लमल” देंमाक्त। लेवी १९:१८; २इतिहास २८:९-१५; हितोपदेस २५:२१-२२ 23 मिनु पिपमी मेको आन कली ठेयब भोज का सेल्शा थुल्मी बाक्त। मिनु मेकोपुकी जशा तूशा पामे नोले मेको आन कली आन होव़प बाक्तीक सोइक्तीमी बाक्त। मिनु मेको आन होव़प बाक्तीक लेम्मा बाक्त। मेना रे अरामीपुकीमी इस्राएली आन कली लडाइ तोतीक नु मार मार रोइक्तीक मपामे बाक्त।
सामरीयाम अन्काल दुम्शो
24 तन्न इच्का नाक्त नोले अराम ङा पिप बेन-हादादमी आ लडाइ पाइब आन कली खुप्शा सामरीयाम सोइश्शा, मेको कली एर ओंथ नेल्ल रे पुम्पदा बाक्त। 25 मिनु मोपा पुम्दमे नोले मेको सहरम थम ठेयब अन्काल दुम्माक्त। मेकेर गधा आ पिया का कली ८० शेकेल चांदी नु काब का ङा ४ भाग, ङा भाग का ढुकुर आन ख्री कली ५ शेकेल चांदी थाप्चा माल्दा बाक्त। शेकेल का ११.५ ग्राम बाक्ब। काब का १.२ लिटर खोदेंशो पुक्तीके बाक्ब। काब ङा ४ भाग ङा भाग का, १/४ लिटर खोदेंशो बाक्ब। 26 काबु नाक्त इस्राएल ङा पिप सहर ङा गारो तार हिरसे बाक्त। मिनु मीश मुर काम पिप कली “आं प्रभु पिप, आं प्रभु आं कली वारच पाइय्यीनी” देंमाक्त। 27 मिनु पिपमी “परमप्रभु यावेमी इ कली वारच पवल। गो ते रे वारच पाइक्नना? अन्न तुप्तीक रे देय अङगुर ख्राक्तीक रे?” देंमाक्त। 28 मिनु पिपम मेको कली “इ कली मार दुम?” दे मदा बाक्त। मिनु मेको मीश मुरुम “एको मीश मुरुम आं कली ‘मुलाक्ती इ तौ ब्वचा योक्को। मिनु दीसा चहिं आं तौ ब्वय’ देंत। ब्यवस्था २८:५३ 29 मिनु गो आं तौ कली ब्वाइतक। मिनु गो एको कली ‘मुलाक्त ब्वचा कली इ तौ चाक्को’ दे माइक्ता। तन्न एकोम आ तौ ख्रुइश्शा मग्रुंइद” देंमाक्त। 30 मिनु पिपमी मेको मीश मुर आ लोव़ नेंशा, आ वा खाक्गा बाक्त। मुरपुकीम मेको कली आगाम अरन्डी फेक्शो तामे बाक्त। मारदे हना मेको सहर ङा गारो तार गाक्शो बाक्माक्त। 31 मिनु मेकोम “मुलाक्त गो शाफात आ तौ एलीशा आ पिया मख्रोइक्ता हना, परमप्रभुम सजाइ ला ममाइ, मेको क्येङा यो शुश पाइय्यील” देंमाक्त। 32 मिनु पिपम आ लोव़ कुरब मुर का कली एलीशा आ बाक्तीक सोइक्ता बाक्त। मेना एलीशा खाल्पापुकी नु आ खिंम बाक्शो बाक्माक्त। तन्न मेको लोव़ कुरब मुर जाक्चा क्येङा ङोंइती एलीशाम मेको खाल्पा आन कली “मेको मुर साइक्बम आं पिया ख्रोइक्पाइक्चा कली मुर सोइश्शो गे मतनी? कोव़ङीन, मेको आ लोव़ कुरब जाक्मेनु, लाप्चो चोक्कीन। मिनु थम बोल्यो पा नेप्शा बाक्कीन। मार मेको आ होव़प मेको आ नोनोले मपिशो बाक्बा ङा?” देंमाक्त। 33 मिनु एलीशाम मेकोपुकी नु लोव़ पना पन बाक्मेनु मेको लोव़ कुरब मुर जाक्माक्त। मिनु पिपमी “एको खतम दुम्तीक परमप्रभु यावे रे जाक्शो बाक्ब। मुल गो मारदे परमप्रभु यावे कली आस पा बाक्नुङा?” देंमाक्त। आमोस ३:६