39
चढ़ेब आन वा सेल्शो
प्रस्थान २८:-
1 परमप्रभु यावेमी मोसा कली दोपा अरेवा, मोपा बेचालेल नु आ मुरपुकीमी हारून कली परमप्रभु यावे आ बाक्तीकेमी गेय पचा कली नीलो प्याजी नु लल रङ ङा श्येले के प्रोव़शो फेक्तीक वा सेल्तेक्म।
चढ़ेब आ कुचु तार वोइक्तीके
2 मेकोमी कुचु तार वोइक्तीके सुन के, नीलो, प्याजी नु लल रङ ङा श्येले नु रिम्शो पा किरशो सुती श्येले के प्रोव़शो वा के सेल्तेक्म। 3 मिनु सुन तुप्शा, पात्लो सेल्शा, आइक्च पा ख्रोइश्शा, श्येले खोदेंशो सेल्तेक्म। मिनु नीलो, प्याजी नु लल श्येलेमी रिम्शो पा किरशो सुती श्येले के प्रोव़शो वा दारशो बुटा आप्शा सेल्तेक्म। 4 मेको कुचु तार वोइक्तीकेमी बलाम सुम्तीके निक्शी सेल्शा, निम्फा पटटी बोइक्ताक्म। 5 मिनु आ पाइक्तीके मेको कुचु तार वोइक्तीके का रेन सेल्तेक्म। मेको खाल का ङा पा रिम्शो पा सेल्तेक्म। मेको पाइक्तीके सुन, नीलो, प्याजी नु लल रङ ङा श्येले नु रिम्शो पा किरशो सुती श्येले के प्रोव़शो वा के सेल्तेक्म। परमप्रभु यावेमी मोसा कली दोपा अरेवा, मोपा सेल्तेक्म।
6 मिनु मेकोमी ओनीक्स हीरा निक्शी चाक्शा, इस्राएल आ तौ आन नें छाप खोदेंशो पा हीराम मुशा ब्रेक्शा सुनम क्येप्ताक्म। 7 मेको हीरा निक्शी कुचु तार वोइक्तीक आ बला ङा टुक्रा तारी फेरतेक्म। मिनु मेको हीरा इस्राएल आ तौ आन कली मिम्चा कली बाक्ब। परमप्रभु यावेमी मोसा कली दोपा अरेवा, मोपा सेल्तेक्म। प्रस्थान २८:१२
निसाफ पतीक झोला
8 मेकोमी निसाफ पतीके ऊरीम नु थुम्मीम वोइक्तीक झोला सेल्पाइक्तु। कुचु तार वोइक्तीके खोदेंशो पा सुन, नीलो, प्याजी नु लल श्येले नु रिम्शो पा किरशो सुती के प्रोव़शो वा के दारशो पा सेल्तेक्म। 9 मेको खेयप का मुक्शोनु, बित्ता का लाइश्शो नु बित्ता का ब्रेम्शो ४ पाटे पा सेल्तेक्म। 10 मिनु ४ लस्कर हीरा सुनम का का पा क्येप्ताक्म। ङोंइती ङा लस्कर लल मानीक माइश्शो हीरा, हाव पुश्पराज माइश्शो हीरा नु गिगी बेरूज माइश्शो हीरा क्येप्ताक्म। 11 मेको आ नोले ङा लस्कर लल फिरोजा माइश्शो हीरा, बुश नीर माइश्शो हीरा नु बुश नु नीलो पन्ना माइश्शो हीरा क्येप्ताक्म। 12 मेको आ नोले ङा लस्कर गिगी नु नीलो रङ ब्वाइश्शो रिम्शो टल्केशो नीलमनी माइश्शो हीरा, गिगी हाकीक माइश्शो हीरा नु प्याजी रङ ङा कटेला माइश्शो हीरा क्येप्ताक्म। 13 मिनु नेल्ल क्येङा नोले ङा लस्कर पीतमनी माइश्शो हीरा, लल रङ ङा ओनीक्स नु नीलो बिलौरा माइश्शो हीरा क्येप्ताक्म। मोपा हीरा नेल्ल कली सुनम क्येप्ताक्म। 14 मेको हीरा १२ ओटा बाक्तेक्म। मिनु इस्राएल आ तौ आन नें का का पा मेको आन तार छाप थोक्शो खोदेंशो पा मुशा ब्रेक्शो बाक्तेक्म। हीरा का आ तारी थर का आ नें ब्रेक्शो बाक्त। 15 मेको निसाफ पतीक झोला कली क्येख सुन के डोरी किरशो खोदेंशो पा सिक्री सेल्तेक्म। 16 मेकोपुकीमी निसाफ पतीक झोला कली सुन के ग्याइक्तीक निक्शी नु मुन्द्रा निक्शी चेम्तेक्म। मिनु मेको मुन्द्रा निसाफ पतीक झोला आ सुर निक्शीमी वोइक्तेक्म। 17 मेकोपुकीम सुन के सिक्री निक्शी निसाफ पतीक झोला आ सुरम वोइश्शो मुन्द्रा निक्शीमी लिक्ताक्म। 18 मेको सिक्री निक्शी चढ़ेब आ कुचु तार वोइश्शो वा आ बला ङा हीरा क्येप्शो सुनम हेक्ताक्म। 19 मेकोपुकीमी सुन के मुन्द्रा निक्शी सेल्तेक्म। मेको निक्शी निसाफ पतीके ऊरीम नु थुम्मीम वोइक्तीक झोला आ उइ आगा गे पाइक्ताक्म। मोपा मेको झोला कुचु तार वोइक्तीके वा आ तार बाक्त। 20 मेकोपुकीमी लेंशा सुन के मुन्द्रा निक्शी सेल्तेक्म। कुचु तार वोइक्तीके आ बला सुम्तीके उइ ङा सुरम वोइक्तेक्म। दारपाइश्शो पाइक्तीके आ तारी क्येप्ताक्म। 21 मिनु मेको निसाफ पतीके ऊरीम नु थुम्मीम वोइक्तीक झोला आ मुन्द्रामी नीलो डोरीम लिक्शा, कुचु तार वोइक्तीक वामी पाइक्ताक्म। मोपा मेको निसाफ पतीके झोला दारपाइश्शो पाइक्तीक तार बाक्शो कुचुम वोइक्तीक वा रे एर ओंथ मयाक्सेक्ल, दे पाइक्ताक्म। परमप्रभु यावेमी मोसा कली दोपा अरेवा, मोपा सेल्तेक्म।
कुचु तार वोइक्तीके आगा ङा वा
22 मिनु मेको कुचु तार वोइक्तीके आगा फेक्तीक नेल्ल नीलो प्याजी रङ ङा वा के फेरतेक्म। 23 मिनु पिया ख्रीतीक पोव़ला सेल्तेक्म। मेको पोव़ला आ एर ओंथ मगाक्चा ङा पा आ सुर थम बोल्यो पा प्रोव़तेक्म। 24 मेको फेक्तीके आ उइ ङा सुर एर ओंथ गे नीलो, लल नु प्याजी रङ नु रिम्शो किरशो सुती श्येले के प्रोव़शो वा के सेल्शो दारीम क्युक्शा सेल्तेक्म। 25 मिनु मेकोपुकीम क्येख सुन के आइक्च किङगो सेल्तेक्म। फेक्तीक उइ गे किङगो का दारीम का ख्राक्शा क्युक्तेक्म। 26 किङगो का दारीम का नु किङगो का दारीम का पा ख्राक्शा, बिर हिरशा क्युक्तेक्म। मेको परमप्रभु यावे आ ङोंइती गेय पची ना फेक्तीक वा दुम्त। परमप्रभु यावेम मोसा कली दोपा अरेवा मोपा सेल्तेक्म।
आगा ङा फेक्तीके सेल्शो
27 हारून नु आ तौ आन कली रिम्शो पा किरशो सुती श्येले के प्रोव़शो वा के फेक्तीक यो सेल्तेक्म। 28 रिम्शो पा किरशो सुती श्येले के प्रोव़शो वा के पियाम रुक्तीक नु गुक्तीक ताकी नु सुरुवाल सेल्तेक्म। 29 रिम्शो पा किरशो सुती श्येले के प्रोव़शो वा के नीलो, प्याजी नु लल रङ ङा श्येलेमी दारशो बुटा आप्शो किप्तीकपुकी सेल्तेक्म। परमप्रभु यावेमी मोसा कली दोपा अरेवा, मोपा सेल्तेक्म।
कुप्फीम पांइतीके सेल्शो
30 मेकोपुकीमी क्येख सुन के फू खोदेंशो पा कुप्फीम पांइतीके चेम्तेक्म। मेकेर छाप मुशो खोदेंशो पा “परमप्रभु यावे कली ला” दे मुशा ब्रेक्ताक्म। प्रस्थान २९:६; प्रस्थान २७:३६; लेवी ८:९; जकरिया १४:२०; 31 कुप्फीम पांइतीके कली पियाम गुक्तीकेमी नीलो श्येलेमी फ्रेंताक्म। परमप्रभु यावेमी मोसा कली दोपा अरेवा, मोपा सेल्तेक्म।
मोसामी ताम्बु ङा गेय कोव़शो
32 मिनु परमप्रभु यावे आ बाक्तीक ग्रुम्तीक ताम्बु ङा गेय नेल्ल नुम्त। परमप्रभु यावेमी मोसा कली दोपा अरेवा, मोपा इस्राएल ङा मुरपुकीमी नेल्ल सेल्तेक्म।
33 मिनु मेकोपुकीमी परमप्रभु यावे आ बाक्तीक नु आ मारेइ मारेइ मोसा आ बाक्तीकेमी चाक्तेक्म। मार मार चाक्गमे बाक्त देंशा हना, ताम्बु नु आ ग्योंब नेल्ल, ब्वेक्तीक, फलेक, लाइश्शो कोक्के, थाम नु राप्पाइक्तीकपुकी, 34 लल रङम नुप्शो सांड आ कुशुल के सुम्तीके, नेल्ल क्येङा रिम्शो कुशुल के सुम्तीके, फारतीके, 35 कबल पशो सन्दोस, मेको आ कुरतीक कोक्के नु सुम्तीके, 36 टेबलम वोइक्चा माल्शो मारेइ मारेइ नु कोंइतीक शोब्ले, 37 क्येख सुन के बत्ती दातीके नु आ दियारी आन कली ठीक सेल्तीके थोव़क नु बत्ती कली तेल, 38 सुन के चढ़ेतीक, लुक्चा कली तेल, ब्रोव़शो रिना पाइब धूप, ताम्बु ओव़तीके ङा फारतीक वा, 39 कांसा के चढ़ेतीक, मेको आ कांसा के मी तिक्तीक जाली, कुरतीक कोक्के नु चढ़ेतीक आ मारेइ मारेइ, चिक्तीक ठेयब बोस नु मेको निप्पाइक्तीके, 40 ताम्बु आ लाङगा ङा फारतीक नु थामपुकी, आन राप्पाइक्तीकपुकी, लाङगा ओव़तीक ङा फारतीक वा, आ फ्रेंतीकपुकी नु किलापुकी, मिनु परमप्रभु यावे आ बाक्तीक ग्रुम्तीक ताम्बु ङा गेय पचा कली मारेइ मारेइ नेल्ले, 41 परमप्रभु यावे आ बाक्तीक ङा गेय पचा कली हारून कली फेक्तीक वा नु आ तौ आन कली परमप्रभु यावे कली चढ़ेब दुम्चा कली आन फेक्शा गेय पतीके वा नेल्ल चाक्तेक्म। 42 परमप्रभु यावेमी मोसा कली दोपा अरेवा, मोपा इस्राएल ङा मुरपुकीमी सेल्तेक्म। 43 मिनु मोसामी मेको नेल्ल कोव़तु। मिनु परमप्रभु यावेमी दोपा अरेवा, मोपा ठीक सेल्शो तशा, मोसामी मेको नेल्ल आन कली आसीक गेप्तु।