4
यरूसलेम आ पर्बम लोव़
1 मिनु परमप्रभु यावेमी “ए मुर, गे इंटा का चाक्शा इ ङोंइती वोतो। मिनु मेको तारी यरूसलेम सहर आ नकसा सेलो। 2 मिनु मेको कली पुम्शो कोंइदो। मेको आ एर ओंथ लडाइ पचा कली लाइश्शो खिं सेलो। मिनु मेको आ गारो ङोइक्चा कली खप तेलो। एर ओंथ लडाइ पाइब आन बाक्तीक सेलो। मिनु आ एर ओंथ मेको गारो प्रेत्चा कली मुडा ठीक सेलो। 3 मिनु नोले फलाम के ग्योंब का चाक्शा, सहर नु इ दातेम फलाम के गारो खोदेंशो पा वोतो। मिनु गे सहर गे कोव़ङो। मिनु मेको सहर कली पुम्शो सेल्शा कोंइदो। शुश पुम्शो कोंइदो। मेको इस्राएली आन खिं ङा मुर आन कली चिन्ड का दुम्ब।
4 मिनु नोले गे पेरा गे हिरशा इपो। मिनु इस्राएली आन खिं ङा मुर आन सजाइ ततीक इ तार वोतो। गे गिश नाक्ती सम्म मेक गे हिरशा बाक्नेवे, मिश नाक्ती सम्म मेको आन सजाइ ततीक कुरचा माल्नेवे। 5 मारदे हना गो इ कली गिश नाक्त मोपा बाक्चा माल्नेवे, मेको देंनुङ। मेको सहे सां ९० नाक्त दुम्चा माल्ब। नाक्त का के बर्स का बाक्ब। मोपा गे इस्राएली आन खिं ङा मुर आन सजाइ कुरचा माल्नेवे। 6 मिनु मेको नाक्त नेल्ल नुम नोले, लेंशा ग्युरा गे हिरशा इपो। मिनु मेना यहूदा आ खिं ङा मुर आन सजाइ कुरचा माल्नेवे। मिनु मेको आ पर्बम गो इ कली ४० नाक्त बाक्पाइक्नुङ। नाक्त का के बर्स का बाक्ब। 7 मिनु गे पुम्शो यरूसलेम गे कोव़शा, इ गुइ ङा वा तिल्शा, मेको सहर आ पर्बम नोले दुम्तीक लोव़ पावो। 8 कोव़ङो, गो इ कली डोरीम फ्रेंशा वोइक्नन। मोपा गे एको पुम्तीक नाक्ती नुप्चा क्येङा ङोंइती एर ओंथ लोक्सीने मचाप्नेवे।
9 मिनु मेको चेरब, क्योव़ज, सिबी, दाल, चिरस नु उवा चाक्शा ग्योंब काम कुर पा इ कली शोब्ले चोंइसो। गे मेको सहे सां ९० नाक्त सम्म मलोक्सीथु बाक्ङेनु, मेको जचा माल्नेवे। 10 इ नाक्ती ङा जचा थोव़क नाक्शा २० शेकेल ङा दुम्चा माल्ब। गे गेना हना यो गो देंङा ना जचा माल्नेवे। शेकेल का ११.५ ग्राम चांदी के क्येट बाक्ब। 11 गे तूचा कली ब्वाक्कु यो पुक्चा माल्नेवे। हिन का ६ भाग ङा भाग का तूचा माल्नेवे। मेको गेना तूचा माल्नेवे, इ कली देंनुङ। हिन का ४ लिटर खोदेंशो बाक्ब। 12 गे क्योव़ज के बटुक खोदेंशो सेल्शा जावो। गे मुर आन ङोंइती मुर आन ख्री चोशा, मेको चोचा माल्नेवे” देंत। 13 मिनु परमप्रभु यावेमी “मोपा इस्राएल ङा मुर आन शोब्ले जचा माल्नीम। गो मेको आन कली रागी रागी ङा मुर आन बाक्तीक खेरनुङमी। मेको आन दातेम मोदेंशो ग्रांग्रा दिशो शोब्ले जचा माल्नीम” देंत। होसे ९:३ 14 मिनु गो “परमप्रभु, परमप्रभु यावे, गो आल रेन मोदेंशो ग्रांग्रा दिशो मदुम्शो नङ। गो गेनायो आंमा बेक्शो नु ब्वाकी ङा जन्तुम साइश्शो श्ये मब्वङ। ग्रांग्रा दिशो गेनायो मजङ” देंती। प्रस्थान २२:३०; प्रेरित १०:१४ 15 मिनु मेकोम आं कली “दुम्ब, गो इ कली मुर आन ख्री आ पा ङा, इ शोब्ले चोचा कली गोबर गेनुङ” देंत।
16 मिनु मेकोमी आं कली “ए मुर, गो यरूसलेम रे अन्न तेक्नुङ। मेकोपुकीम हिंशा शोब्ले नाक्ना नाक्न जाइनीम। मिनु पुक्ना पुक्न सुर्ता पन पन ब्वाक्कु तूनीम। इजीकीएल ५:१६; लेवी २६:२६ 17 मेकोपुकीम शोब्ले नु ब्वाक्कु मताइनीम। मुर काम अर्को कली तवानु ग्रीचोक पा हिंनीम। मिनु मेकोपुकी सजाइ ततीके सोव़ना सोव़न लाइनीम” देंत।