1 मिनु अब्राम ९९ बर्स दुम्‍मेनु, परमप्रभु यावे अब्राम आ ङोंइती ग्रूशा, मेको कली “गो नेल्‍ल क्‍येङा सक्ति पाइश्‍शो परमप्रभु नङ। गे, गो नु बाक्‍शा, ठीक पाइब दुमो। उत्‍पत्ती ३५:११; प्रस्‍थान ६:३; ब्‍यवस्‍था १०:१२ 2 मिनु गो गे नु आं कबल पाइनुङ। गो इ मुर हिक्‍ने मचाप्‍चा ङा पा शुश सेल्‍नुङमी” देंमाक्‍त। 3 मिनु अब्राम खुम्‍की पा बाम्‍माक्‍त। परमप्रभुमी मेको कली 4 “नेनो, मेको गो, गे नु आं कबल पतीके बाक्‍ब। गे शुश रागी ङा मुर आन किकी पिपी दुम्‍नेवे। 5 मुल रे इ नें अब्राम देंचा मदुम्‍ब। इ नें अब्राहाम दुम्‍चा माल्‍ब। मारदे हना गो इ कली शुश रागी ङा मुर आन किकी पिपी सेल्‍तन। रोमी ४:११,१७ 6 गो इ रे शुश मुर सेल्‍नुङमी, रागी रागी ङा मुर सेल्‍नुङ। इ रे पिपपुकी यो दुम्‍नीम। 7 मिनु गो गे नु लोव़ पा आं कबल पाइनुङ। गो इ चच युइ नु यो आं कबल पाइनुङ। मेको गेना हना यो लीब कबल बाक्‍ब। गो इ परमप्रभु नु इ चच युइ आन परमप्रभु नङ। 8 मुल गे इ बाक्‍तीक रागीमी अर्को रागी ङा मुर बाक्‍नेवे। नोले गो एको कनान रागी गेना हना यो इन कली नु इ चच युइ आन कली गेनन्‍नी। गो चहिं मेको आन परमप्रभु दुम्‍नुङ” दे अब्राहाम कली देंमाक्‍त। उत्‍पत्ती ३५:२७; हिब्रू ११:९-१०; प्रेरित ७:५

9 मिनु परमप्रभुमी अब्राहाम कली “आं कबल पशो ङा लोव़ नेल्‍ल टिवो। मिनु इ नोले इ चच युइपुकीमी नेल्‍ल पालामी यो आं कली मिम्‍शा, टिचा माल्‍नीम। 10 गे नु इ नोले ङा तौ चच युइ आन पचा माल्‍शो कबल मार बाक्‍त देंशा हना, इ चारतीक ङा कुशुल कुल पा ख्रोइक्‍चा माल्‍नेवे। गे नु इ चच युइ, वोंइश मुर नेल्‍ल कली कुशुल ख्रोइक्‍तीक चिनु ख्रोइक्‍चा माल्‍नीम। लेवी १२:३; यूहन्‍ना ७:२२ 11 मेको गे नु गो इस कबल पशो आ चिनु बाक्‍ब। इजीकीएल २०:१२; ब्‍यवस्‍था ३०:६; रोमी ४:११ 12 मुल रे इ पाला ङा मुरुम आन तौ कली ८ नाक्‍ती दुम्‍मानु, ख्रोइक्‍तीक चिनु ख्रोइक्‍चा माल्‍नीम। इ खिंम जरमेशो वोंइश आल, तेको तेको रागी रे ग्‍याप्‍शो इ वाइल नु आन तौ नेल्‍ल आन कली यो ख्रोइक्‍तीक चिनु ख्रोइक्‍चा माल्‍नीम। 13 इ खिंम जरमेशो, इ चांदीम ग्‍याप्‍शो मुरपुकी कली यो ख्रोइक्‍तीक चिनु ख्रोइक्‍चा माल्‍नीम। मिनु आं कबल पशो ङा चिनु इ रांम बाक्‍चा माल्‍ब। मेको गेना हना यो लीब कबल बाक्‍ब। 14 ख्रोइक्‍तीक चिनु मख्रोइश्‍शो वोंइश मुर नु वोंइश आल आन मुर आन दाते रे तिल्‍चा पुंइसीनीम। मारदे हना मेकोपुकीमी आं कबल पशो प्रोंइशो बाक्‍नीम” देंमाक्‍त।

15 मिनु परमप्रभुमी अब्राहाम कली “गे इ मीश कली ‘साराइ’ मदेंचा, मुल रे मेको कली ‘सारा’ नें वोइक्‍चा माल्‍नेवे। 16 गो मेको कली आसीक गेनुङ। गो इ कली मेको रे तौ का गेनुङ। मिनु सारा रागी रागी ङा मुर नु जात जात ङा मुर आन पिप आन ममा दुम्‍ब” दे परमप्रभुमी देंमाक्‍त। उत्‍पत्ती १२:२-३ 17 मिनु अब्राहाममी खुम्‍की पा बाप्‍शा, रिश्‍शा “सहे का बर्स ङा मुरुम आल थीबा? सारा ९० बर्स दुम्‍शा, आल थिने चाप्‍‍बा?” दे आंम कली देंमाक्‍त। उत्‍पत्ती १८:१२; उत्‍पत्ती २१:६; लूका १:१८; रोमी ४:१९-२१ 18 मिनु अब्राहाममी परमप्रभु कली “इश्‍माएल इन ङोंइती बाक्‍ल” देंमाक्‍त। 19 मिनु परमप्रभुमी “ममाइ, इ मीश सारामी थमा पा तौ का थीब। मेको आ नें इसहाक वोइक्‍चा माल्‍नेवे। मेको नु आं कबल पतीक गेना हना यो दुम्‍ब। मेको आ नोले ङा आ तौ चच युइ नु यो लीब। 20 इश्‍माएल आ पर्बम मार देंने, गो मेको नेल्‍ल नेंता। नेनो, गो मेको कली आसीक गेनुङ। मेको सोशा बोशा, शुश दुम्‍ब। गो मेको कली १२ जना पिप आन आफ सेल्‍नुङ। गो मेको कली ठेयब जात दुम्‍पाइक्‍नुङ। उत्‍पत्ती १६:१०; उत्‍पत्ती २१:१३,१८; उत्‍पत्ती २५:१६ 21 तन्‍न आं कबल इसहाक नु पाइनुङ। सारामी बर्स का नोले इसहाक थीब” देंमाक्‍त। 22 मिनु परमप्रभु अब्राहाम नु लोव़ पने थुम्‍शा लमाक्‍त।

23 मिनु परमप्रभुमी लोव़ पवा नाक्‍ती अब्राहाममी आ तौ इश्‍माएल, आ खिंमी जरमेशो नु ग्‍याप्‍शो वाइल नु आ खिं ङा वोंइश मुर नेल्‍ल आन कली ख्रोइक्‍तीक चिनु ख्रोइक्‍पाइक्‍मी बाक्‍त। 24 अब्राहाममी ख्रोइक्‍तीक चिनु ख्रोदा नाक्‍ती ९९ बर्स दुम्‍शो बाक्‍माक्‍त। 25 आ तौ इश्‍माएल ख्रोइक्‍तीक चिनु ख्रोइक्‍तीक नाक्‍ती १३ बर्स दुम्‍शो बाक्‍माक्‍त। 26 मिनु अब्राहाम नु इश्‍माएल नाक्‍त कामी ख्रोइक्‍तीक चिनु ताम्‍से बाक्‍त। 27 आ खिं ङा वोंइश मुर नेल्‍ल, आ खिंम जरमेशो नु रागी रे ग्‍याप्‍शो वाइल नेल्‍लेम यो मेको नाक्‍ती ख्रोइक्‍तीक चिनु तामे बाक्‍त।