28
याकूब कली सोइश्शो
1 मिनु नोले इसहाकमी याकूब कली अरेशा “गे कनान रागी ङा मीश आल मचाक्को। उत्पत्ती २४:३ 2 साशा, पदान-अराम इम्मा आ आफ बेथुएल आ खिं लावो। मिनु इम्मा आ लोक्ब लाबान आ तमी का चाक्को। उत्पत्ती २२:२३; उत्पत्ती २४:२९ 3 मिनु नेल्ल क्येङा सक्ति पाइश्शो परमप्रभुमी इ कली आसीक गेवल। मिनु इ कली सोशा बोशा, शुश सेलल। हिक्ने मचाप्चा ङा पा शुश दुम्पदल। 4 अब्राहाम कली गेशो आसीक मुल इ कली नु इ चच युइ आन कली गेवल। इ मुल बाक्शो रागीम अर्को रागी ङा मुर बाक्ते, तन्न परमप्रभुमी अब्राहाम कली गेप्तु। मेको इ कली दुम्ल” दे आसीक गेवा बाक्त। 5 मोदेंशो पा इसहाकमी याकूब कली पदान-अराम ङा मुर बेथुएल आ तौ आ खिं सोइक्ता बाक्त। मेको याकूब नु एसाव आस ममा आ लोक्ब लाबान बाक्माक्त।
6 मिनु एसावमी, इसहाकम याकूब कली आसीक गेशा, मीश चाक्चा कली पदान-अराम गे सोइश्शो तुइश्शा, आ आफ आ अरेशो “कनान रागी ङा तमी मचाक्को” दे माइश्शो तुइक्ता बाक्त। 7 याकूबमी आम आफ आस कली टिशा, पदान-अराम गे लशो तवा बाक्त। 8 मिनु एसावम कनान रागी ङा तमीपुकी आ आफ इसहाकम मदाक्शो तुइश्शा, 9 इश्माएल आ बाक्तीके लमाक्त। मिनु मीश निक्शी बाक्शा यो, अब्राहाम आ तौ इश्माएल आ तमी नेबायोथ आ समी महलाथ चाक्गा बाक्त। उत्पत्ती १६:१६; उत्पत्ती २६:३४; उत्पत्ती २५:१३
याकूबमी ङोमु तशो
10 मिनु याकूब बेयर-शेबा रे गाक्शा, हारान सहर गे लमाक्त। 11 मिनु बाक्तीके का जाक्दीश्शा, नाक्दो मेकेर बाक्माक्त। मारदे हना नां रिक्माक्त। मिनु फुल्लु तार आ पिया वोइश्शा इम्माक्त। 12 मिनु इम्मेनु, ङोमुम खप रे सरीङ थिशो क्रेसी का तवा बाक्त। मेको क्रेसीमी परमप्रभु आ स्वर्ग ङा गेय पाइबपुकी तोइश्शो, ङोइश्शो तवा बाक्त। यूहन्ना १:५१ 13 मिनु क्रेसी आ ङरम परमप्रभु यावे राप्शा, याकूब कली “गो परमप्रभु यावे, इ बाजे अब्राहाम नु इ आफ इसहाक आस परमप्रभु नङ। मुल इ इप्शा बाक्तीक रागी इ कली नु इ चच युइ आन कली गेनन्नी। 14 इ चच युइ खप ङा फुरक खोदेंशो पा शुश दुम्नीम। सोशा बोशा, शुश दुम्शा, पूर्ब, पच्छिम, उत्तर, दक्खिनम ब्रशा बाक्नीमी। गे नु इ चच युइ आन पर्बम रागी नेल्ल ङा मुर आसीक ताइनीम। उत्पत्ती १३:१४-१५ 15 गो गे नु बाक्शा, ते लाइनेवे, गो इ कली कोव़नन। गो इ कली एको रागी लेप्पाइक्नन। मारदे हना गो इ कली मप्रोंइनन। इ कली मार मार देंङा, गो मेको नेल्ल पाइनुङ” देंमाक्त।
16 मिनु याकूब आ निन्द्रा रे सेंसीशा “परमप्रभु यावे थमा पा एकेर बाक्ब। गो मतुइक्तु” देंमाक्त। 17 मिनु हिंशा “एको हिंचा ङा बाक्तीके बाक्ब। परमप्रभु आ बाक्तीक खिं बाक्शा, सरीङ ङा लाप्चो बाक्ब” देंमाक्त। प्रस्थान ३:५
18 मिनु याकूब सुनी कना बोक्शा, आ पिया आगा ङा वोइश्शो फुल्लु राप्पाइश्शा तेल लुक्ता बाक्त। उत्पत्ती ३५:१४-१५ 19 मिनु मेको बाक्तीके कली बेथेल नें वोदा बाक्त। ङोंइती मेको सहर आ नें लूज बाक्माक्त। 20 मिनु याकूबमी “परमप्रभु गो नु बाक्त हना, लां कोंइशा कोव़ती हना, जचा नु फेक्चा यो गेती हना, 21 थुं नाइश्शा, आं आफ आ खिं लेत्चा गेती हना, परमप्रभु यावे आं परमप्रभु बाक्ब” दे कसम जवा बाक्त। 22 मिनु परमप्रभु कली “आं राप्पाइश्शा वोइश्शो फुल्लु परमप्रभु आ खिं दुम्ल। आं कली मार मार गेनी, मेको के १० भागमी भाग का थमा पा इन कली गेनन्नी” देंमाक्त। उत्पत्ती ३५:१