31
याकूबम लाबान कली प्रोंइशो
1 मिनु लाबान आ तौपुकीमी “याकूबमी आंइ आफ आ मारेइ मारेइ नेल्ल रोइक्ताक्व। आंइ आफ आ शोंप रे शोंप पाइश्शो दुम्त” देंशो, याकूबमी नेना बाक्त। उत्पत्ती ३०:३५ 2 मिनु याकूबमी “लाबानम आं कली मदाक्ब दुम्त” दे तुइक्ता बाक्त। 3 मिनु परमप्रभु यावेमी याकूब कली “इ आफ आ रागी इ मुर आन बाक्तीक लेश्शा लावो। गो गे नु बाक्नुङ” देंमाक्त। उत्पत्ती २८:१५ 4 मिनु याकूबमी राहेल नु लेआ आस कली गोठीम ब्रेत्तीम्सी बाक्त। 5 मिनु मेको आस कली “इस आफोम ङोंइती आं कली दाक्शो खोदेंशो पा मुल मदाक्ब, दे तुइक्ताक्ङ। आं आफ आ परमप्रभु गो नु बाक्शो बाक्त। 6 गो इस आफ कली दोदेंशो पा आं बोल नेल्लेमी गेय पङा, मेको गे निक्शीम तुइक्नीसी। 7 इस आफोमी आं कली ठगेप्तु। आं गेय ङा तचा माल्शो थोव़क १० खेयप फाइक्तु। तन्न परमप्रभुमी मेको कली आं कली श्येत गेचा, मगेवा बाक्त। 8 इस आफोमी ‘पुत्ले पाङग्रे नेल्ल इ के दुम्ल’ देंमेनु, क्यारश भेडा नेल्लेमी पुत्ले पाङग्रे गिक्तेक्म। मेकोमी ‘रेखा पाइश्शो नेल्ल इ के दुम्ल’ देंमेनु, नेल्ल रेखा पाइश्शो गिक्तेक्म। 9 मोदेंशो पा परमप्रभुमी इस आफ आ क्यारश भेडा बी ब्यफ रोइश्शा, आं कली गेती।
10 क्यारश भेडा आन ब्वांइसीची ना गो ङोमुमी बोका नेल्ल पुत्ले पाङग्रे, रेखा पाइश्शो नु खाल्शो रङ ङा तातामी। 11 मिनु परमप्रभु आ स्वर्ग ङा गेय पाइबमी आं कली ङोमुमी ‘याकूब’ दे ब्रेत्ताक्यी। ‘मिनु गो बाक्ती’ दे लोव़ लेत्ताक्ङ। 12 मिनु मेकोमी आं कली ‘कोव़ङो, ब्वांइसीब बोका नेल्ल पुत्ले पाङग्रे, रेखा पाइश्शो नु खाल्शो रङ ङा बाक्नीम। मारदे हना लाबानमी इ कली मार पशो बाक्बा, गो नेल्ल ताता। 13 गो परमप्रभु नङ। गो इ कली बेथेलम ग्रुम्ता। गे मेकेर फुल्लु का कली तेल लुक्ताक्वी। मिनु आं कली कसम जाप्तीवी। मुल बोक्को, मेको रागी रे ग्रूङो। इ जरमेशो रागी लेतो’ दे माइक्ती” दे आ मीश निक्शी आस कली देंमाक्त। उत्पत्ती २८:१८-२२ 14 मिनु राहेल नु लेआमी “आंस आफ आ खिंमी आस थेरशो रू नु शोंप बाक्मा ङा? 15 आंस कली अर्को रागी ङा मुर खोदेंशो सेल्शा, लेयशा ताक्शो नेल्ल जाप्तु। उत्पत्ती २९:१८,२७ 16 परमप्रभुमी आंस आफ रे लाइश्शो शोंप, आंस कली नु आंस आल के दुम्त। परमप्रभुमी इन कली मार देंबा, मेकोन पने” देंसा बाक्त।
17 मिनु याकूब सुनी कना बोक्शा, आ आलपुकी नु आ मीशपुकी दलओंठ तारी ङोइक्पदा बाक्त। 18 मिनु मारेइ मारेइ पदान-अराम रे आ गेय पा सेल्शो बस्तु भाव नेल्ल खुल्शा, आ शोंप लाइश्शा, आ आफ इसहाक आ खिं कनान रागी लचा गोवा बाक्त।
19 लाबान आ भेडा आन ऊन ख्रोइक्थ लशो बाक्माक्त। मेना राहेलमी आ आफ आ खिं ङा मूर्तिपुकी खुइ पा कुरा बाक्त। न्यायाधीस १७:५; न्यायाधीस १८:१७; १सामुएल १९:१३; २राजा २३:२४; जकरिया १०:२ 20 याकूबमी अरामी लाबान कली “गो लशो” दे मदेंथु, गाक्मा बाक्त। 21 मोदेंशो पा याकूब आ मारेइ मारेइ कुरशा, प्रोक्माक्त। मिनु सुनी बोक्शा, युफ्रेटीस खोला शोक्समा बाक्त। मिनु गिलाद डांडा गे लमा बाक्त।
22 मिनु लमा आ नाक्त सां नोले मुरुमी “याकूब प्रोक्त” दे लाबान कली शेंदमे बाक्त। 23 मिनु लाबानमी आ लोक्ब आन कली ब्रेश्शा, मेकोपुकी नु ७ नाक्ती सम्म याकूब कली माल्शा, गिलाद डांडाम ग्रुमा बाक्त। उत्पत्ती ३१:४७ 24 मिनु परमप्रभुमी अरामी लाबान कली ङोमुमी “गे होस पावो। याकूब कली मारेइ मपावो” देंमाक्त।
25 मिनु लाबानमी याकूब कली ग्रुमानु, आ ताम्बु गिलाद ङा पहाडम कीङा बाक्त। याकूबम चहिं आ ताम्बु आइक्था ङा डांडाम कीशा, वोदा बाक्त। 26 मिनु लाबानमी याकूब कली “गे मार पवी? मारदे आं मतुइक्थु प्रोक्नी? आं तमीपुकी लडाइमी ग्याइश्शो खोदेंशो पा लाइक्तीवी। 27 गे मारदे ख्रुइश्शा गाक्नी? मारदे आं कली मारेइ मदेंनी? गो इन कली ग्येरशा, कुम्सो पशा, खैजडी नु बीना ताप्शा, लां सम्म चोव़दीशा सोइक्तन्नी वा। 28 गे आं कली आं चचपुकी नु आं तमीपुकी नु पुक्पु पाइक्मुचा मगेवी। मरिम्शो पाइब बाक्ते। 29 इ कली श्येत गेचा आं गुइमी बाक्ब। तन्न सिनाक्दो इ आफ आ परमप्रभुमी आं कली ‘गे होस पावो। याकूब कली मारेइ मरिम्शो मपावो’ दे लोव़ पाप्तु। 30 मिनु गे इ आफ ग्रुम्चा शुश दाक्ताक्वी हना यो, मारदे आं खिं ङा मूर्ति खुइ पा लदी?” दे हिल्लो पवा बाक्त। 31 मिनु याकूबमी लाबान कली “गे इन तमी निक्शी आं गुइ रे रोइक्नीनी, दे हिंती। उत्पत्ती ३१:१९ 32 इन मूर्तिपुकी चहिं सुका आ ताम्बुम थित्नीनी, मेको मब्रोंइल। इन लोक्ब आन ङोंइती आं बाक्तीकेम इन के मार बाक्मे, कोव़शा लतीन” देंमाक्त। मारदे हना याकूबमी राहेलम मेको मूर्तिपुकी खुइ पशो, दे मतुइक्ता बाक्त।
33 मिनु लाबानमी याकूब आ ताम्बु, लेआ आ ताम्बु, गेय पाइब निक्शी आस ताम्बु ओव़शा, माल्शा मथिदा बाक्त। लेआ आ ताम्बु रे ग्रूशा, राहेल आ ताम्बु ओव़माक्त। 34 मिनु राहेलम मेको खिं ङा मूर्ति आन कली दलओंठ आ तारी ङा नित्तीकेमी ख्रुइश्शा, मेको आ तारी निस्से बाक्त। मिनु लाबानमी ताम्बु नेल्लेमी माल्शा मथिदा बाक्त। 35 मिनु राहेलमी “आं प्रभु, मगाइक्तीने, गो इन ङोंइती बोक्ने मचाप्नुङ, मारदे हना गो मथिचा दुम्ती” देंमाक्त। मोपतीके माल्शा मथिदा बाक्त। लेवी १५:१९-२०
36 मिनु याकूब चुरशा, लाबान कली “मार दूली पङा। आं कली मार मरिम्शो पशो आ पर्बम खेदा पनी? 37 आं मारेइ मारेइम माल्तीनी, इन थोव़की मार थिन्नी? इन लोक्ब नु आं लोक्ब आन ङोंइती देनीन। एकोपुकीमी इस दातेमी निसाफ पामेक्ल। 38 गो गे नु २० बर्स बाक्ती। इन क्यारश भेडाम पाठा मशाम्देम। इन बगाल ङा बोका का यो मब्वङ। 39 जन्तुमी साइश्शो यो इन कली मचाक्गु। गो आंमा थाप्ताक्ङ। नाक्दो, नाक्ती जन्तुमी साइक्तेक्म हना यो, गे आं कली थाप्पाइक्तीनी। प्रस्थान २२:११-१२ 40 नाक्ती हुप्शोम बाक्ती, नाक्दो ग्यू बेक्शा, यो मइप्थु, नां सोंइताक्ङ। 41 मोदेंशो पा गो इन खिंमी २० बर्स गेय पाता। इन तमी निक्शी आस पर्बम गो १४ बर्स गेय पाता। ६ बर्स इन क्यारश भेडा आन पर्बम गेय पाता। गे आं गेय ङा तचा माल्शो थोव़क १० खेयप फाइक्तीनी। उत्पत्ती २९:२०,३०; उत्पत्ती ३०:३१-३६ 42 आं आफ आ परमप्रभु, अब्राहाम आ परमप्रभु नु इसहाक आ मान पा हिंशो परमप्रभु गो नु मबाक्शो हना, गे आं कली मुल श्येत्थ सोइक्तीनी वा। परमप्रभुमी आं श्येत नु आं गेय तशा, सिनाक्दो इन कली हुइक्ताक्व” देंमाक्त। उत्पत्ती ३१:२४,५१
43 मिनु लाबानमी याकूब कली “एको तमी निक्शी आं तमी बाक्नीस। एको आल आं आल बाक्नीम। एको क्यारश भेडा आं के बाक्नीम। इ तशो नेल्ल आं के बाक्ब। आं तमी आस कली मुलाक्ती गो मार पने चाप्नुङा ङा? एको आस तौ आन कली गो मार पने चाप्नुङा ङा? 44 मोपतीके गे नु गो कबल पस, इस ङोंइती सांकछी बाक्मल” दे मदा बाक्त। 45 मिनु याकूबम फुल्लु का चाक्शा राप्पाइश्शा, 46 आ मुर आन कली यो “फुल्लु खुप्तीन” देंमाक्त। मिनु मेकोपुकीमी यो फुल्लु खुप्तमे बाक्त। मिनु मेकेर जामे बाक्त। 47 मिनु लाबानमी मेको कली येगार-सहादुता, दे नें वोदा बाक्त। याकूबम चहिं मेको कली गलेद, दे नें वोदा बाक्त। उत्पत्ती ३१:२३ 48 मिनु लाबानमी “एको फुल्लु खुप्तीके मुलाक्ती इस पशो कबल आ सांकछी बाक्ब” देंमाक्त। मोपतीके मेको कली गलेद देंनीम। गलेद आ अर्थ सांकछी ङा फुल्लु खुप्तीके बाक्ब। यहोसु २४:२७ 49 मिनु मेको राप्पाइश्शो फुल्लु कली मिस्पा नें वोदा बाक्त। मारदे हना लाबानमी “परमप्रभु यावे गे नु गो इस ब्राची ना इस कली कोव़ब बाक्ल। न्यायाधीस ११:११ 50 गे आं तमी आस कली श्येत गेप्तीवी हना, अर्को मीश चाक्तीवी हना, गो इस दातेमी मुर सांकछी मबाक्तेक्म हना यो, परमप्रभु इस सांकछी बाक्ब” देंमाक्त।
51 मिनु लाबानमी लेंशा, याकूब कली “कोव़ङो, एको खुप्शो फुल्लु नु मेको लाइश्शो राप्पाइश्शो फुल्लु गो इस दातेमी बाक्ब। 52 एको खुप्शो फुल्लु गो रे इ बाक्तीके, गे रे आं बाक्तीके श्येत गेथ मलमल। 53 अब्राहाम आ परमप्रभु, नाहोर आ परमप्रभु नु आन किकी पिपी आन परमप्रभुम इस दातेमी निसाफ पवल” देंमाक्त। मिनु याकूबमी इसहाक आ मान पा हिंशो परमप्रभु आ नें थिशा, कसम जवा बाक्त। 54 मिनु मेको डांडामी याकूबमी चढ़ेतीके चढ़ेवा बाक्त। मिनु आ खिं ङा मुर आन कली “शोब्ले जने” दे गेवा बाक्त। मिनु जशा, मेको नाक्दो मेक उइ बाक्मा बाक्त। उत्पत्ती ३१:४२ 55 मिनु लाबान सुनी कना बोक्शा, आ तमी नु आ चच आन कली पुक्पु पाइश्शा, आसीक गेशा, आ खिं लेम्माक्त।