5
चढ़ेब आन कली सजाइ
1 मिनु परमप्रभुमी “चढ़ेबपुकी, एको लोव़ नेनीन। इस्राएलीपुकी इन नोफा दाइश्शा नेनीन। पिप आ खिं ङा मुरपुकी, नेनीन। एको निसाफ इन मरिम्शो पशो आ पर्बम बाक्ब। गेपुकी मिस्पा सहरमी दाइश्शो ब्वारद नु ताबोर सहरमी ब्रशो ग्याइल खोदेंशो दुम्शो बाक्नीनी। 2 मेकोपुकीमी शित्तीममी मुर बिक्शा बेक्तीक सेल्तेक्म। गो मेको नेल्ल आन कली सजाइ गेनुङ।
इस्राएलीपुकीमी सजाइ तशो
3 गो एफ्राइम आ पर्बम नेल्ल तुइक्नुङ। मिनु इस्राएल यो गो नु ख्रुइक्ने मचाप्ब। एफ्राइम, गे तेल्लेम पतीकेमी ग्रुम्शो बाक्नेवे। इस्राएल ग्रांग्रा दिचा ङा दुम्शो बाक्ब। होसे १:२; होसे ६:१० 4 मेको आन गेय आ पर्बम आन परमप्रभु गे लेत्ने मचाप्नीम। तेल्लेम पचा मेको आन थुंमी बाक्ब। मिनु मेकोपुकीमी परमप्रभु यावे कली मतुइक्नीम। होसे ४:१२ 5 इस्राएली आन ठेयब लेत्तीकेमी मरिम्शो पाइब बाक्नीम, दे आन सांकछी बाक्ब। एफ्राइम ङा मुरपुकी आंम पाप पतीकेमी खतम दुम्नीम। यहूदा ङा मुरपुकी यो मेकोपुकी नु खतम दुम्नीम। 6 मिनु मेको आन क्यारश भेडा नु बी ब्यफ लाइश्शा, परमप्रभु यावे कली माल्थ लाइनीमी। तन्न मेकोपुकीमी मेको कली मथित्नीम। मारदे हना मेको आन क्येङा ङोन लत। यसैया १:११-१५ 7 मेकोपुकी परमप्रभु यावे रे नोले शोंइसीशो बाक्नीम। मेकोपुकीमी हेंथे पा आल थिशो बाक्नीम। मेको आन औंसी ङा चाडमी आन बाली नाली नु मेको आन कली खतम सेल्ब। होसे २:१३
थर निक्शी आस कली सजाइ
8 गिबामी तुराही नु रामाह सहरमी ग्रोव़ ताप्पीन। बेथ-आवेनमी लडाइ ङा तुराही ताप्पीन। बेन्यामीन ङा मुरपुकी ङोंइती बारीन। २राजा १५:३७; यसैया ७:१-९; होसे ४:१५ 9 सजाइ ङा नाक्ती एफ्राइम गोरशो रागी खोदेंशो दुम्ब। मुल मार मार दुम्बा, मेको इस्राएली आन कली देंने थुम्ता। 10 यहूदा थर ङा ठेयब मुरपुकी सांद ङा फुल्लु याक्ब खोदेंशो दुम्तेक्म। गो आं गाइक्तीक मेको आन तारी ब्वाक्कु खोदेंशो पा मोइक्नुङमी। ब्यवस्था १९:१४ 11 एफ्राइम ङा मुरपुकी सजाइ तशा, आन थुं लुक्च लत। मारदे हना मेकोपुकी जाम्शा लाइब मूर्ति आन नोले खोइक्तेक्म। 12 मिनु गो एफ्राइम ङा मुर आन कली तुम्ब नु यहूदा ङा मुर आन कली राक्शो खोदेंशो दुम्शो बाक्नुङ।
13 एफ्राइम नु यहूदामी आस श्येत तुइक्तसे नोले, एफ्राइममी अस्सुर ङा ठेयब पिप कली ‘वारच पने’ दे पुंइथ मुर सोइक्ताक्व। तन्न मेकोमी इ कली वारच पने मचाप्ब। होसे ७:११; होसे १०:६; होसे १२:२ 14 मारदे हना गो एफ्राइम कली गुप्स खोदेंशो नु यहूदा कली ठिटा गुप्स खोदेंशो दुम्शो बाक्नुङ। गो मेको आन कली खतम सेल्शा, आं लां खोइक्नुङ। गो मेको आन कली कुरशा लाइक्नुङ। मिनु मेको आन कली आं रे रोइक्ने मचाप्नीम। होसे १३:७; होसे ६:१
15 मिनु गो आं बाक्तीकेमी लेश्शा बाक्नुङ। मेकोपुकीमी आन मरिम्शो पशो तुइश्शा, आं कली ममाल्मे सम्म बाक्नुङ। मिनु मेकोपुकीमी शुश श्येत जशा, आं कली माल्नीम” दे परमप्रभुमी देंत। यसैया २६:१६